Qeqqata Kommuniani utoqqarnit nuannarineqarluarluni misigisaqarfiulluartartorlu tassaavoq nunanut allanut angalasarneq. Angalasarneq angalanissaq sioqqullugu, angalanermi, angalareernermilu pissanganartorpassuarnik nassataqartoq.

Isumassarsitsialak arlalinngortoq
Taamani 1999-imi kommune illoqarfittut ikinngutigisaminut Canada-mi Nunavut-mut angalanissamut aningaasaliimmat utoqqaat 25-t angalatinneqarput. Angalanermi tassani utoqqaat kulturikkut assigiinngissuseq Kalaallit Nunaannut nunanullu issittormiunut allanut sanilliullugu assigiissutsit misigalugillu takuaat.

Angalanerup taassuma kingorna utoqqaat nunanut allanut angalasarnissaanik isuma pinngorpoq, taamaaliornikkut kommunemi utoqqaat nunarsuaq uummaarinnerusumik misiginiassammassuk, angalanerlu inuunermut nukissaqassutsikkut allatigullu qanoq sunniuteqartarnersoq misigisarniassammassuk. Taamaattumik utoqqaat angalasarnerat 2002-miilli ukiut tamaasa pisartussatut aalajangiiffigineqarpoq.

Pilersaarusiornermi angalanermilu peqatigiinneq
Ulluni 14-ini angalaneq angalaneriinnaanngilaq. Nuannersua aamma uaniippoq, sumut angalanissamik ujartuineq, qaammatit arfineq-marluk arfineq-pingasut ingerlanerini angalanissamik pilersaarusiorneq, ataatsimut anguniagaq pillugu naapittarneq peqatigiittarnerlu, naggataatigullu sinnattoq piviusunngortillugu misigisaqarniarluni angalaneq.

Qeqqata Kommunia utoqqarnik nunanut allanut angalatitsisarnera suli ingerlanneqartoq, ullumikkut isumassarsiaq taanna Sisimiuniit Kalaallit Nunaanni kommunenut allanut siammarsimavoq.

Imaassinnaavoq illit ikinngutitit ilisarisimasatillu peqatigalugit aappaagu nunanut allaut angalasutit?

Angalalluarisi!