Sisimiuni 42-nik utoqqarnut inissiaqarpoq, taakkunannga 30-t Niviarsiaq-miillutik, aqqaneq-marlullu Salliaq-miillutik. Tamatuma saniatigut Itillimi tallimanik, Sarfannguanilu marlunnik utoqqarnut inissiaqarluni.
Kommunep utoqqarnut inissiaatai tamarmik innarluutilinnut tulluarsagaapput, taamaaliornikkut illit ulluinnarni pisariaqartitarnut naapertuuttumik initaarsinnaaniassagavit.
Tamatuma saniatigut ulluinnarni sapinngisamik nammineersinnaanissat kommunep anguniagarivaa, taamaakkaluartorli ulluinnarni ilinnut oqilisaataasussanngorlugu angerlarsimaffimmi ikiorteqarnissat pisariaqartutut nalilerneqartillugu angerlarsimaffimmi ikiorteqartinneqassaatit. Angerlarsimaffimmi ikiortit pillugit uumap toqqarneratigut paasisaqarnerusinnaavutit
Utoqqarnut inissiamut nuussinnaavunga?
Inissiat A/S Inissiaatileqatigiiffik INI-p isumagisarivai, kikkulli utoqqaat inissiaannut innersuunneqassanersut kommunep nalilersortarlugit. Utoqqaat 63-inik ukioqalereersimasut utoqqarnut inissianut qinnuteqarsimasut ataatsimiititaliamit nalilersorneqartarput, utoqqaallu inissiaannut nuunnissamut utaqqisut allattorsimaffiinut allatsissaguit soraarninngoreersimassaatit.
Qinnuteqartut eqqarsaatigalugit pisariaqartitsineq naapertorlugu nuuttussanik nalilersuisartut ataavartumik nalilersuisarput.
Imaanngilarli 63-inik ukioqaleruit nuussasutit. Inissiamut nuunnissamut qaqugukkut innersuunneqarnissat kissaatiginerlugu qinnuteqaaterni ilanngutissavat, taamaalilluni assersuutigalugu 67-inik, 70-inik, 75-inik il.il. ukioqaleruit nuunnissarnut utaqqisinnaallutit.
Inimik tunineqarninnut atatillugu pisariaqartitarnut naapertuuttumik pisatsersornissamut ikiorserneqarsinnaavutit. Initaat kørestol-ertunut naleqqussarneqarnissaa aamma kissaatigisinnaavat, tamannali kommunep A/S Inissiaatileqatigiiffik INI-mik suleqateqarluni qinnuteqaatit akuerineqassanersoq nalilersussavaa.
Utoqqarnut inissianut nuunnissamut qinnteqaateqarfissaq uunga aasinnaavat.
Paasissutissat annertunerusut
Utoqqaat inissiaannut qinnuteqarnissamut ilitsersorneqarnissat pisariaqartissagukku, annertunerusumilluunniit apeqqutissaqaruit, kommunemi utoqqarnut immikkoortortaqarfimmut saaffiginninnissarnut tikilluaqqusaavutit. Adressia oqarasuaataalu ataani takusinnaavatit.