Utoqqarnut, inuusuttunut, innarluutilinnut siusinaartumillu pensionisialinnut pisinnaassutsikkut pisinnaasakillisimasunut kommunemi angerlarsimaffimmi ikiortit ikiorsiisinnaapput.

Kikkut angerlarsimaffimmi ikiorserneqartarpat?
Inuunerni piffissap ilaani ulluinnarni suliassanut pisinnaasakillisimatillutit nukissaalatsisimatillutillu, angerlarsimaffimmi pisariaqartumik suliassanut angerlarsimaffimmi ikiortinit ikiorserneqarsinnaavutit.

Angerlarsimaffimmi ikiorteqartartut tassaakkajunnerupput utoqqaat, taamaakkaluartorli ukiutit apeqqutaanatik ikiorserneqarnissamik qanoq pisariaqartitsinerit apeqqutaavoq.

Qanoq ililluni angerlarsimaffimmi ikiorteqartitsisoqalertarpa?
Angerlarsimaffimmi ikiortit pisortaat angerlarsimaffernut pulaarnermini ataatsimut isiginnilluni sutigut ikiorserneqassanersutit naliliissaaq.

Taamatut naliliinermi qanoq annertutigisumik sutigullu ikiorserneqarnissat, piffissarlu qanoq annertutigisoq atorneqassanersoq naliliiffigineqassaaq, ataatsimiititaliallu akuersineratigut angerlarsimaffimmi ikiorteqartalissaguit, tamanna allakkatigut isumaqatigiissutigineqassalluni.

Tamanna tunuliaqutaralugu angerlarsimaffimmi ikiortip pisariaqartitsinerit aallaavigalugu ikiorsersinnaalissavaatit, soorluttaaq allanngorartumik pisariaqartitsinerit eqqarsaatigalugu pisariaqartitatit naapertorlugit ikiorserneqartarnissat qulakkeerumallugu, isumaqatigiissutip nutarterneqartarnissaa angerlarsimaffimmi ikiortip ataavartumik isumagisassaraa.

Taamaasilluni angerlarsimaffimmi ikiortit pisortaata pisariaqassutsimik naliliinera aallaavigalugu angerlarsimaffimmi ikiorti sulisarpoq. Tamatuma saniatigut angerlarsimaffimmi ikiorteqartitsinissamik naliliinermi tunngavissanik assigiinngitsunik maleruagassaqarpoq, maleruagassallu taakku uumap toqqarneratigut atuarsinnaavatit (qallunaatut).

Angerlarsimaffimmi ikiorteqarneq qanoq ingerlasarpa?
Ulluinnarni ikiorserneqartarnerni ikiorsiisoq kisimi pineqarani aamma illit ulluinnarni ilorrisimaarnissarnut nammineq pimoorullugu peqataanissat pisariaqarpoq. Taamaasilluni nammineq suliniuteqarani ikiorserneqarani, ikiorserneqarneq suleqatigiinneruvoq.

Tamatta assigiinngitsutigut pisariaqartitsisarpugut, ilinnullu ikiorsiissutigineqartoq pisariaqartitsinerit aallaavigalugu ikiorsiissutigineqarpoq. inuttut ikiorsiineq paaqqutarinninnerlu, soorlu uffarnermi eqqiluisaarnermilu kiisalu suliassatigut eqqiaanermik, pisiniarfilerinermik, errorsinermik assigisaanillu angerlarsimaffimmi ikiortit pingaarnertut suliassaraat.

Ilaatigut aamma aputaajaanissamut Teknikkimut avatangiisinullu ingerlatsivimmit ikiorserneqarsinnaavutit, angerlarsimaffimmilu ikiorserneqarnissarnut soorlu imertarnissamut, ikiorsiissutinik pissarsinissamut assigisaanillu angerlarsimaffimmi ikiortit immikkut kiffartuunneqarnissarnut suleqateqarluni.

Utoqqaat angerlarsimaffianit nerisassanik kissartunik pisinikkut pajutsittarnissamik aamma angerlarsimaffimmi ikiortit neqerooruteqartarput. Tamanna Angerlarsimaffinni kiffartuussisut aamma isumagisarpaat.

Qanoq ikiorserneqassaanga?
Pisariaqartitavit naliliiffigineqarnissaannik pisariaqartitsissaguit, utoqqaat angerlarsimaffiata naqqani Angerlarsimaffimmi ikiortit allaffiannut imaluunnit Qeqqata Kommuniani saaffissarnut ikiorserneqarnissat pillugu saaffiginnissuteqarnissarnut tikilluaqqusaajuaannarputit.

Qeqqata Kommunia
Makkorsip aqq. 2
postboks 1014
3911 Sisimiut
Oqarasuaat: (+299) 70 21 00
Allakkasuartaat: (+299) 70 21 77