Sutigut ikiorserneqarsinnaavunga?
Kalaallit Nunaanni inuit nalunaarsuiffiannut nalunaarsimaguit, sapaatillu akunneri kingullit 13-it akissarsiaqarlutit minnerpaamik 182 tiimit sulisiffeqarsimallutit, namminerlu piumassuserinngisannik suliffissaaleqilerlutit, taava iliuusissamik pilersaarusiorfigineqassaatit, tassanilu sulileqqinnissannut qanoq pisoqartariaqarnera nalunaarsorneqassalluni.
 
Tamatuma saniatigut suliffeqanngikkallarnermi ikiorsiissutinik pisinnaavutit, tassalu suliffeerukkallarninniit nalunaarneqaruit ulloq siullermiit aningaasatigut ikiorneqarsinnaalluti.
 
Taamaammat suliffissaarukkuit ullormit siullermiit suliffissarsiortarfimmut saaffiginninnissat pingaaruteqarpoq, tassa suliffeerunnerit nalunaarutigigukku ikiorsiissuteqarnissaq nalilersuiffigineqassammat. Taama ikiorsiissuteqarneq suliffissaarukkarlarnermi ikiorsiissutinik taaneqartarpoq, ataatsimullu katillugit sapaatip akunnerini 13-ini tunniunneqarsinnaallutik.
 
Suliffissaarukkallarnermili aatsaat ikiorsiissutinik pisinnaavutit, allamik suliffissannik tunineqarsinnaanngitsutit naliliiffigineqarpat, peqatigitillugulu suliffissamik tigusinissamut piareersimasussaatitaanerit akuerissutigigukku. Tamanna ima paasineqassaaq, piffissap iluani suliffissamik neqeroorrfigineqaruit taanna tigussagit.
 
Qanoq tunniunneqarsinnaasut annertutigippat?
Inatsisartut suliffeqanngikkallarnermi ikiorsiissutit pillugit peqqussutaat naapertorlugu SIK-p isumaqatigiissutaani ilinniagaqarsimanngitsut aningaasarsiaasa 90 procentia tunniunneqarsinnaavoq. Taakkulu ullunut 14-inut kingumoortumik tunniunneqartassallutik, akerlu pisartagalinnut tamanut atuuttuulluni.
 
Malittarisassat annertunerusumik paasisaqarfigerusukkukkit suliffissarsiuussisarfimmit itisilerneqarsinnaapput, tassa inulerisutut isumaginnittunnit, imaluunniit peqqussut nammineq atuarsinnaavat, tulliuttumut iseruit una tooruk.

Sapaatit akunneri 13-ini kingullerni akissarsiavit allagartai kiisalu akileraartarnermut allagartaq aningaaserivimmilu kontoit normua aamma eqqaamallugit.
 
Allanik periarfissaqarpunga?
Sulisinnaannginnerit pissutigalugu ilinnut ilaquttatilluunniit pissaqartinngikkukkit, imaluunniit suliffissaaleqiguit suliffissaarukkarlarnermili ikiorsiissutinik pisinnaanak, taava allatigut kommunemiit ilitsersorneqarsinnaavutit tapersersorneqarutillu.