Napparsimanermi ikiorserneqarneq
Aningaasarsiaqarlutit suliffeqaruit napparsimalerlutillu, taava suliffeqanngikkallarnermi ikiorsiissutinik pisinnaanissamut periarfissaqarputit, tassa napparsimanikkut sulisinnaanngitsutut nailiiffigineqaruit.

Nalinginnaasumik ullut pingajuanniit suliffeqanngikkallarnermi ikiorsiissutinik tunniussisoqarsinnaavoq. Pissutsilli immikkut ittut tunngavigalugit tamanna ullormit siullermiit pisinnaasarluni, tamatumunngali tunngasutigut inulerinermik sullissisunnik oqaloqateqarnissat innersuussutigineqassaaq.

Napparsimanermi suliffeqanngikkallarnermi ikiorsiissutit sapaatip akunneri pingasut tikillugit pisinnaavatit. Taakkuninnga sivisunerusumik napparsimaguit, taava suliaq ilinnut tunngasoq nalilersuiffigineqassaaq, tamatumani kommunemiit pisortatigut ikiorsiissutinik suli pisariaqartitsinersutit nalilersuiffiginiarlugu.