Suliffissaaleqineq ataasiakkaat inuunerannut annertuumik sunniuneqarsinnaavoq.

Nammineq pisuussutiginagu suliffissaaleqigaanni, allatigulluunniit peqquteqartumik sulisinnaanngikkaanni, inuutissarsiuuteqaleqqinnissamut pisortanit ikiorserneqarnissat ilitsersorneqarnissarluunniit imaluunniit ingerlariaqqinnissamut assingusumik ikiorserneqarnissaq pisariaqartinneqakkajuttarpoq.

Suliffissaaleqineq pillugu saaffiginnissutinut tamanut Qeqqata Kommuniani Suliffissarsiuussisarfik qitiusumik saaffiginnittarfiuvoq. Suliffissarsiuussisarfik Piareersarfiup allaffeqarfiinut atavoq, tassanilu suliffissaaleqisutut periarfissatit pisinnaatitaaffitillu pillugit ilitsersorneqarsinnaavutit. Allaffiup adressia ataani takusinnaavat.

Iliuusissatut pilersaarut
Kinaluunniit suliffissaaleqinerminut nammineq pisuussuteqanngitsoq ilitsersorneqarnissaminut pisinnaatitaaffeqarpoq, tamatumalu saniatigut inuutissarsiuuteqaleqqinnissamut aqqutissarisinnaasunik takussutissiisumik iliuusissatut pilersaarusiornissamut ikiorserneqarsinnaatitaalluni.

Siullertut suliffissarsiuussisarfik saaffissaavoq, tassani siunnersortit saaffiginnittut ataasiakkaat peqatigalugit suliffissaaleqinermi neqeroorutit periarfissallu isummersorfigissallugit. Kommunep nunaqarfiisa pingasuusut arlaanni najugaqaruit, najugarisanni kommunep allaffia siullertut saaffigissavat.

Aappaattut kommunemi isumaginninnermi siunnersorti imaluunniit sullissisoq peqatigalugu iliuusissatut pilersaarut suliarineqassaaq. Sisimiut illoqarfiani suliffissarsiuussisarfik kommunemi siunnersortinik qanimut suleqateqarpoq, taakkulu suleqatigineqarnerisigut pitsaanerpaamik aaqqiissutissamik ujartuisoqarsinnaalluni.

Iliuusissatut pilersaarutip ilaatigut ilitsersuinerit, ilinniagaqaqqinnissat pikkorissarnissallu imarisinnaavai, ilaatigullu nutaamik suliffittaarnissamik innersuussinerit. Iliuusissatut pilersaarutip suliffissaqartitsiniartarfiup iliuusissatut eqqarsaatit piviusunngotinnissaannut sakkussaavoq.

Tamanna pillugu maleruagassat suut atuunnersut nammineerlutit atuarusukkukkit, Suliffeqanngikkallarnermi ikiorsiissutit pillugit inatsisartut peqqussutaat uani nammineerlutit atuarsinnaavat.

Pisortanit ikiorserneqarneq
Inuutissarsiuuteqaleqqinnissat qulakkeerumallugu kommunep ikiorsiineranut atatillugu ulluinnarni inuuniarnissarnut aningaasatigut aamma ikiorserneqarsinnaavutit.

Qanoq ilillutit suliffissaaleqilersimanerit kiisalu suliffissaaleqilernissat sioqqullugu qanoq sivisutigisumik suliffeqarsimanerit apeqqutaallutik ikiorserneqassaatit.

Piareersarfik - Sisimiut
Adammip Aqquserna 2 A
Box 349
3911 Sisimiut
Oqarasuaat: (+299) 86 53 05
Fax: (+299) 86 43 70
E-mail