Piginnaanngorsagaaqqinneq sunaava?
Peqqiilliornerit inuttulluunniit atukkatit pillugit inuutissarsiornissamut naleqqussarsinnaanngikkuit, piginnaanngorsagaaqqinnissamut qinnuteqarsinnaavutit.

Pimoorullugu peqataaneq
Piginnaanngorsagaaqqiineq tassaavoq, piginnaanngorsagaaqqinnissamik qinnuteqartumit pimoorullugu aallunneqartariaqartoq. Kommunemi suliffissarsiuussisarfiup isumaginninnermi siunnersortillu suleqatigineqarnerisigut, ataasiakkaat pisariaqartitaat periarfissaallu aallaavigalugit iliuusissamik pilersaarusiortoqarlunilu piginnaangorsagaaqqinneqarneq aallartinneqartarpoq.

Piginnaanngorsagaaqqinnissamut ikiorserneqarsinnaavunga?
Suliat tamarmik assigiinngillat, taamaattumillu kikkut piginnaangorsagaaqqinneqarsinnaanersut pillugu maleruagassiortoqarsinnaananilu ersarissumik nassuiaasiortoqarsinnaanngilaq. Ataatsimulli isigalugu, assersuutigalugu piginnaanngorsaaqqinnissamut peqqussummi piumasaqaatit naammassineqarpata, innuttaasut pisortanit ikiorserneqarnissaminnut pisinnaatitaaffeqarput.

Imaappoq innuttaasut kommunep suliffissarsiuussisarfianut isumaginninnermiluunniit siunnersortimut saaffiginninnerminni inuutissarsiuuteqaqqinnissaminnut tapersersorneqarnissamik pisariaqartitsisutut nalilerneqartut, piffissaliussap iluani pisortat ikiorsiissutaannik pissarsisinnaapput.

Piginnaangorsagaassagaanni suut aqqutissaappat?
Annertunerusumik tapersersorneqarnissamik pisariaqartitsinersutit siullermik nalinginnaasumik suliffissarsiuussisarfiup Piareersarfiullu nalilertarpaat, taamaattumillu isumaginninnermi siunnersortimut attaveqarnissarnut ikiussallutit.

Isumaginninnermi siunnersorti peqatigalugu inuttut inissisimanerit ersarissarneqartarpoq, inuttullu ingerlariaqqinnissannut pisortanit ikiorserneqaataasussat takussutissartaanik iliuusissatut pilersaarusiortoqartarluni.

Iliuusissatut pilersaarut alloriarnissamut aallaavigalugu suliffissarsiuussisarfik suleqatigalugu suliffeqarfinnut attaveqarnissat pilersaarusiussavat. Assersuutigalugu inuutissarsiuuteqalernissannut piginnaassutsikkut qaffassaataasinnaasunut pikkorissarnernut ilinniarnernulluunniit peqataasinnaavutittaaq.

Piginnaanngorsagaaqqinnissamut ikiorserneqarnerpit nalaani piginnaanngorsagaaqqinnissamut atatillugu aningaasat immikkut tunniunneqartartut kommunemit pissarsiarisassavatittaaq. Aningaasat taakku naalakkersuisunit annertussusiligaallutik pisortanit ikiorsiissutaapput.

Sunaana anguniarneqartoq?
Ikiorserneqareernerpit kingorna nammineersinnaalernissat, inuiaqatigiinnilu allat naligalugit inuutissarsiorsinnaalernissat siunertaavoq. Anguniakkalli anguneqarnissaanut eqqaamasariaqarpat, periarfissat suunerinik ilinniartinneqarnissannut pimoorullugu tunniusimanngikkuit, ingerlariaqqinnissamullu nammineq soqutiginninngikkuit pisortat ikiorsersinnaanngimmatsit.

Paasissutissat annertunerusut
Annertunerusumik ikiorserneqarnissat pisariaqartikkukku apeqqutissaqaruilluunniit, illoqarfigisanni suliffissarsiuussisarfimmut nunaqarfimmiluunniit aqutsisut allaffiannut saaffiginninnissannut tikilluaqqusaavutit.

Tamatuma saniatugut Piginnaanngorsaaqqinnissamut ikiorsiisarneq pillugu Inatsisartut peqqussutaat 2001-imeersoq atuarsinnaavat kiisalu peqqussummut allannguutit tapiliussalluunniit 2006-imeersut atuarsinnaavatit.