Qitornat ulluinnarni atugartussutsimigut ajornartorsiuteqarluni innarluuteqarsimappat, imaassinnaavoq pisortat tungaanniit ikiorserneqaataasinnaasumik annertuumik innarluuteqarsimasoq.

Innarluuteqarnermut atatillugu meeqqap ilaqutaasa aningaasartuutikkut ikiorserneqarsinnaanngorlugit innarluuteqartutut pisortatigoortumik nalunaarsorneqarnikkut taamatut ikiorsiineq pisinnaavoq.

Suna piumasaqaataava?
Innarluutilittut nalunaarsorneqartoqassatillugu ilaatigut nakorsap naliliineranik nakorsallu oqaaseqaasiaanik ilaqartinneqartussamik meeqqap misissugaasimanissaa kiisalu ilaatigooriarluni nalunaarsorneqarnissamut isumaginninnermi siunnersortip sullissisulluunniit isummernissaa piumasaqaataasarpoq.

Nalunaarsorneqarnissaq Namminersornerullutik Oqartussani Ilaqutariinnut Pisortaqarfiup suleqatigineqarneratigut pisarpoq, nalunaarsorneqarnermullu atatillugu iliuusissatut pilersaarusirotoqartarluni.

Iliuusissatut pilersaarut sunaana?
Ilaqutariinnut Pisortaqarfiup iliuusissatut pilersaarut tullinnguuttutut nassuiaatigaa:

”Innarluutillip kissaataa naapertorlugu periarfissaatillugulu periarfissagissaarluni ulluinnarni ptsaasumik atugaqarnissaata qulakkeerneqarnissaani iliuusissatut pilersaarut sakkussaavoq pingaaruteqartoq. Iliuusissatut pilersaarutitigut innarluutilimmut anguniagalersuisoqartarpoq, anguniakkallu anguneqarnissaannut sakkussanik ikiuutissanillu malittarisassiortoqartarluni”.

Ilinnut ikiorsiissutigineqartoq ilinnut naapertuuttussanngortikkumallugu iluaqutissanngortikkumallugulu nalinginnaasumik innarluutilinnut ulloq unnuarlu angerlarsimaffinni sulisut imaluunniit tapersersortit iliuusissatut pilersaarut ulluinnarni atortarpaat. Tapersersortit pillugit paasissutissat annertunerusut uumap toqqarneratigut pissarsiarisinnaavatit.

Suna kinguneqaataassava?
Innarluutilittut nalunaarsorneqarnermi meeraq angajoqqaanilu ulluinnarni ajornartorsiutinut aningaasartuutinullu ikiorserneqarsinnaasarput, ilaatigullu aamma piffissaq, naammagittarsinnaassuseq, immikkut ilisimasaqarnissaq, immikkut avatangiiseqarnissaq imaluunniit imikkut ikiorserneqarnissaq sungiusarneqarnissarluunniit pisariaqartarpoq.

Kikkut nalunaarsorneqarsinnaappat?
Annertuumik innarluutilittut nalunaarsorneqarnissamut kikkut innersuunneqarsinnaanersut siumoortumik aalajangersaaffigineqarsinnaanngilaq. Nalunaarsorneqarnissamut suliniarnerit inummiit inummut assigiinngillat, innarluutilittullu pisortatigoortumik nalunaarsorneqarnissami aqquterpassuit aqqutigeqqaagassaasarlutik.

Innersuussutigineqassaaq, annertunerusumik ilitsersorneqarnissamut kiisalu qitornavit annertuumik innarluutilittut nalunaarsorneqarnissaanut qinnuteqarnissap pisariaqassusaanik naliliinissamut ikiorserneqarnissamut Qeqqata Kommunianut saaffiginnissuteqassasusi.

Nalunaarsortinnissaq nammineq aalajangigassaavoq
Eqqaamajuk, innarluutilittut nalunaarsugaanissaq inuuo nammineq oqartussaaffigimmagu. Taamaasiortoqarnissaanik neqeroorfigineqarussi akuersaarasi qujaannarsinnaavusi, akuersisoqarnissaami tamatigut pisariaqarmat, tassa inunnit nalunaarsugassa namminerniit.

Peqatigitillugu nalunaarsorneqannginneq nalunaarsugaanissamilluunniit itigartitsisimaneq imaanngilaq, meeqqavit innarluutillip ulluinnarni oqinnerusumik atugaqartinnissa eqqarsaatigalugu kommunep ikiorsinnaassanngikkaa.

Annertuumik innarluutilittut nalunaarsugaaneq Ilaqutariinnikkut pisortaqarfik peqatigalugu pisarpoq, Qeqqata Kommunianili aamma ikiorserneqarnissaq tapersiiffigineqarnissarlu toqqaannartumik kommunemiit pisinnaavoq. Tamanna annertunerusumik atuarsinnaavat una toorlugu.

Annertuumik innarluutillit ikiorserneqartarnerat pillugu inatsisartut peqqussutaat uumap toqqarneratigut aamma atuarsinnaavat.