Angajoqqaanut, minnerunngitsumillu meeqqanut naapisimaarfitsialaanissaminik meeqqerivik "Âjo" anguniagaqarpoq. “Âjo”-mi meeqqat pingasuniit arfinillit tikillugit ukiullit 36-t inissaqartinneqarput. Meeqqat ininut marlunnik agguataagaapput:
”Qajaasat”-ni meeqqat 18-it inissaqartinneqarput, “Paannaat”-nilu aamma 18-it inissaqartinneqarlutik.
Meeraq kingusinnerpaamik nal. 09.30 takkussimasassaaq. Meeraq kingusinaassatillugu ullorluunniit taanna takkutissanngippat, nal. 09.30 nallertinnagu angajoqqaat nalunaaruteqassapput.
Meeqqat aaneqanngitsoortut isumaginninnermi ingerlatsivimmut nalunaarutigineqartarput, isumaginninnermilu ingerlatsivimmi pigaartumit aaneqartarlutik.
Nerisarneq
Nal. 08.30-p tungaanut ullaakkorsiortitsisarput, meerarlu kingusinaarluni takkunniaraangami ullaakkorsioreersimalluni takkuttassalluni. Angajoqqaat, meeqqat sulisullu qaammammut ataasiarlutik ullaakkorsioqatigiittarput.
nal. 11.00 ullup-qeqqasiortarput.
Ualikkullu nal. 14.00 ualikkorsiortarlutik.
Meeraq nerisassanik arlaannit sapigaqarpat, angajoqqaat qinnuigissavagut meeqqap sapigai pillugu sulisut nalunaarfigeqqullugit, soorluttaaq nakorsamit uppernarsaammik tunniusseqqullugit. Taava meeqqap sapigai igaffimmiup ilisimassavai.
Sammisassaqartitsineq
Nal. 09.00-ip tungaanut meeqqat ataatsimoortarput, tamatumalu kingorna ininut marlunnut avinneqartarlutik. Iniminni ullormut sammisassat aallutilertarpaat. Sapaatip akunnera allortarlugu sulisut sammisassanik pilersaarusiortarput, pilersaarutillu paasissutissiivimmut nivinngarneqartarlutik. Taamaasilluni pisussanut angajoqqaat malinnaasinnaasarput.
Angajoqqaat meeqqallu kissaataat tunngavigalugu meeqqat ullup qeqqanut sinitsinneqarsinnaasarput.
Meeqqap atisaat pillugit:
Meeqqat sapinngisamik silap qanoq issusaanut naleqquttunik atisalersorsimasassapput. Imaappoq, aaqqateqartassapput, nasaqartassapput, gummeqartassapput il.il. Atisat paarlaassorneqarnissaat pinngitsoortikkumallugu atisat atsiorneqartarnissaat eqqaamallugu.
Aasaanernai sila atoruminartillugu silamiittarpugut, taamaattumik meeqqat atisassamaateqartinneqarnissaat pingaaruteqarpoq.
Meeraq aamma meeqqerivimmi isersimmatissaminik nassassaaq.
Napparsimaneq
Meeqqat qanerluttut, timmittut, kissarnillit allatigulluunniit tuniluussinnaasumik nappaatillit/naajorarnillit meeqqerivimmeeqqusaanngillat. Meeqqat meeqqerivimmiinnerminni kissarninittut angajoqqaanit aaneqassapput.
Pinngussanik nassartarneq
Meeqqat tallimanngornikkut pinngussanik nassarsinnaatitaasarput, pinngussallu nassarneqartut angajoqqaat meeqqallu namminneq akisussaaffigalugit. Pinngussat batteritortut nipiliortullu nassaqqusaanngillat.
Aalajangersimasumik sammisassaqartitsinerit
- Ullaakkut eqaarsaarneq
- Qajaat marlunngornikkut eqaarsaartarput
- Paannaat sisamanngornikkut eqaarsaartarput
- Meeqqat akuersissummik pigisallit aasaanerani naluttarfimmiissinnaatitaasarput
- Meeqqanut atualertussanut sapaatip akunneri tamaasa immikkut sammisassaqartinneqartarput. Tamanna januaarimit maaji tikillugu ingerlanneqartarpoq.
- Meeqqat atualertussat Santa Luciartinneqartarput
- Aalajangersimasunik sammisaqarluni sammisassaqartitsineq
- Sapaassuit aallartinnissaannut aalajangersimasumik sammisassaqartitsisoqartarpoq.
Maalaarutit/nuannaarutit
Maalaarutissaqaruit, nuannersumilluunniit avitseqatigerusukkutsigut sulisunut angajoqqaalluunniit sinniisaannut anngusissaatit. Attaveqatigiilluarnissaq meeqqeriviup anguniagaraa!
Suleqatigiilluarnissarput kissaatigalugu Meeqqerivik ”Âjo” tikilluaqqusivoq.
Ammasarfiit
Ataasinngornermiit tallimanngorneq ilanngullugu nal. 07:00-miit nal. 17:00 tikillugu.
2011-mut ukiumoortumik pilersaarut
Attavigiuk
Meeqqerivik ”Âjo”:
Aqqusinersuaq 13
Postbox 7
3911 Sisimiut
Oqarasuaat: (+299) 86 40 69
Allakkasuartaat: (+299) 86 62 97
E-mail