”NUNIAFFIK” ataatsimoorussamik ulluunerani Meeqqeriviuvoq
NAJUGAA:
Aadammip Aqquserna 4, A1495
3911 Sisimiut

OQARASUAATAA:  (+299) 86 64 25 / FAX: (+299) 86 60 25.
E.mail: nuni@greennet.gl

MEEQQERIVIMMI INISSAT:
Meeqqerivik “NUNIAFFIK” meeqqanut 62-nut inissaateqarpoq.
Meeqqerivittaani meeqqat 38, meeraaqqerivittaani meeqqat 24.

MEEQQERIVIUP PISORTAA: 
Katrine Larsen Lennert

MEEQERIVIUP AMMASARFII:
Ataasinngorneq – Tallimanngorneq: Nal: 7:00 – 17:00.

NERISAQARNEQ:
Meeraaqqerivimmi: Ullup qeqqasiorneq, nal:  10:30
  Ualikkorsiorneq, nal:         14:00
Meeqqerivittaani: Ullup qeqqasiorneq, nal:  11:00
  Ualikkorsiorneq, nal:         14:00

Ullup qeqqanut nerilernerit tamaasa meeqqat vitamin-imik tunineqartarput, mikinerpaat kisimik pinnatik. Nerereernerup kingorna meeqqat kigutigissarneqartarput sulisunit ikiorneqarlutik. Anginerit periarfissinneqartarput namminneerlutik kigutigissarnissaminnut, sapaatip akunnerata ingerlanerani ulloq aaliangersimasoq.

Nuniaffik anguniagai:
• Meeraq ataavartumik nappaateqanngippat, sulisut pisussaaffigissanngilaat piffissami sivikitsumi meeqqamut nakorsaatinik tunioraasarnissaq. Pisariaqavissappat sulisut angajoqqaallu oqaloqatigiissinnaapput, peqqutigalugu, akisussaaffik tamanna angajoqqaat akisussaaffigimmassuk.
• Meeraq silamut naleqquttunik atisalersorneqartassaaq.
• Piumasaqaatigaarput, barnevogn-it, cykel-it, qamuteeqqat, kurebræt-it allallu nassatat nalillit kælder-imut ilisaqqullugit, tamannalu angajoqqaat namminneq isumagisassarivaat. Taamatut piumasaqarnitsinnut peqqutaavoq, pigisat nalillit iluamik inaalinneqarsimanngitsut imaluunniit atsiorneqarsimanngitsut, tammassagaluarpata Meeqqeriviup akisussaaffigisinnaanngimmagit, taamaattumillu taarsersinnaanagit. Erseqqissaatigissavarpullu, nassatat silamiittartut inaalinneqarsimanngippata, Meeqqeriviup aneerasaartarfiata silataanut ilineqassammata.
• Meeqqerivimmi sulisut pisinnaatitaaffeqarput, meeraq Meeqqerivimmiittoq pillugu, angajoqqaanit aallertarneq aaqqiagiinngissutaalersimappat, sulisut aaliangiisoqannginnerani takussutissamik piumasaqaateqarsinnaallutik. Tassani peqqutigaarput, kinaluunniit angajoqqaaq meeraq pillugu meeqqamut mattunneqassanngitsoq kissaatigigatsigu.
• Pingaarpoq, meeraq meeraaqqerivimmiit meeqqerivimmut nuunnginnermini nangeqartarunnaarsimanissaa.
• Pingaarpoq, meeraq meeraaqqerivimmiit meeqqaerivimmut nuunnginnermini sinittarnerata minnerpaaffianiitsinnissaa.

AGGIUSSISARNEQ:
Meeqqat kingusinnerpaamik Meeqqerivik-mut apuuteriissapput nal: 9:30.
Kingusinaassappata, napparsimappata, fri-ssappata allamilluunniit peqquteqarlutik takkutissanngippata, akisussaasut pinngitsooratik nal: 9:30 nallertinnagu Meeqqerivik-mut nalunaaruteqareersimassapput.
Taamatut piumasaqarnitsinnut peqqutigaarput, meeqqat qassiuneri igaffimmut kingusinnerpaamik nal: 9:30 nalunaarutigineqareertussaammata.
Pingaarnertullu illup iluani arlaannik pilersaaruteqartoqartillugu, suliassaqartoqartillugu meeqqat peqataatinneqartarnissaat pingaartittaratsigu.
Pingaartipparputtaaq sapinngisamik meeqqat angerlarsimaffimminni ullaakkut nerereersimasarnissaat. Peqquteqavillutilli angerlarsimaffimmi meeraq nerisimanngippat, periarfissaqarpoq Meeqqerivimmi ullaakkorsiutinik nerinissaminut. Ersarissumilli piumasaraarput, ullaakkut nerinerup killigititaa angajoqqaat akisussaasullu ataqqissagaat, Meeqqerivimmi ullaakkorsiortitsisarneq ingerlanneqartarpoq nal: 6:45 – 8:00, tassa meeraq meeqqerivimmi nerissappat kingusinnerpaamik Meeqqerivimmut apuutereersimassaaq nal: 8:00. Piffissarititaasoq qaangerneqarsimappat, angajoqqaat meeqqap nerinissaa meeqqerivimmi isumagissavaat.

PINNGUSSANIK NASSARTARNEQ:
Meeraq meeqqerivik-mut pinngussanik nassarsinnaavoq, ilisimasariaqarporli meeqqap pinngussat nassatassai angajoqqaavisa akisussaaffigisassammatigik. Ulloq suna meeqqat Meeqqerivik-mut pinngussanik nassarfigissaneraat inimi sulisut aaliangiiffigisinnaavaat.
Pinngussanik nassarnermi piumasaraarput, meeqqat pinnguaat akisuut, erligisaat ulorianartulluunniit Meeqqerivik-mut nassartinneqartassanngitsut. Pingaarnertullu, meeqqat nassataasa atsiorneqarsimanissaat piumasaraarput.
Ilisimatitsissutigissavarpullu, pinngussat suulluunniit nassarneqartut aserussagaluarpata tammassagaluarpataluunniit Meeqqerivik-up akisussaaffigisinnaanagillu  taarsersinnaanngikkai.

SAMMISAQARTITSINEQ:
Sammisaqartitsineq ullaakkut nal: 9:30 aallarnerneqartarpoq, tassanilu init namminneq aaliangertarpaat, ullormi tassani suut sammineqassanersut. Erseqqissaatigissavarput, illumi annertuunik pisussanik pilersaaruteqartoqartillugu, pingaartikkatsigu pinngitsoorata siumungaaq angajoqqaanut nalunaarutisarnissaa.

MEEQQERIVIUP ANGUNIAGAI:
• Meeraq toqqissisimalluni paaqqutarineqassasoq, Meeqqerivimmiissasorlu.
• Meeraq peqqinnartumik ulluinnarni inooriaaseqassasoq, nuannaarlunilu Meeqqerivimmiissasoq.
• Meeraq imminut tatiginermik sassarsinnaanermillu peqassasoq.
• Meeraq inersimasumut tatiginnittuussasoq, ilaminullu ataqqinnittuulluni.
• Meeqqat sulisullu imminnut ataqatigiissasut, ammaffigalutillu.
• Meeraq kinaassusaanik ilinniartinneqassasoq, nammineersinnaaneralu piorsarneqarluni.
• Meeraq suliassanut aaliangeeqataasassaaq.
• Meeqqat inooriaatsimut, avatangiisitsinnullu ataqqinnittuunissaannik ilinniartinneqassapput, naleqqussarneqarlutillu.
• Meeraq ungasarpat, ungasarunnaarnissaanut angajoqqaat sulisullu suleqatigiilluassapput.
• Angajoqqaat sulisullu meeraq pillugu attaveqatigiilluassapput.

MEEQQERIVIUP PIUMASAI / PISINNAATITAAFFIILU:
• Meeraq Meeqqerivimmi isersimmatissaminik peqassaaq, pinngitsooratillu isersimmatit atsiorneqarsimassapput.
• Meeqqat atisassamaatissaannik pinngitsoorani peqqumaateqartoqassaaq, ilaatigut atisaminnut quisoorsinnaanerat masatsertoorsinnaanerallu sillimaffiginiarlugit.
• Meeqqat atisaat suulluunniit atsiorneqarsimassasut piumasaraarput, peqqutigalugu meeqqat amerlasuut assigiinnik peqarsinnaanerat sillimaffiginiarlugu, pingaarnertullu paarlaassisoortoqassanngimmat.
Eqqaasitsissutigissavarput, atisanik taarsiisoqariataassatillugu, pinngitsoorani pisinermut allagartaq Meeqqeriviup pisortaanut takutinneqaqqaassammat.
• Meeraq 38° sinnerlugu kissarneqalersimappat, ullormulluunniit arlaleriarluni timmissimappat, tuniluussinnaasumilluunniit nappaateqartoq paasineqarpat, pinngitsoorani angajoqqaanut akisussaasuusunut nalunaarutigineqassaaq, peqqutigalugu sunaluunniit nappaat tuniluussinnaasoq Meeqqerivimmeeqqusaanngimmat.

Ilisimatittsissutigissavarput, ukiut tamaasa Isumaginninnermi Ikiortinngornianit, meeqqat atuarfiannit, ilaatigullu Perorsaasunngorniat Ilinniarfiannit ilinniartuuteqartaratta.

Suleqatigiilluarnissatsinnut qujareerluta.

Meeqqerivik “NUNIAFFIK”-mi sulisut.

2011-mut ukiumoortumik pilersaarut