Angerlarsimaffimmi paarsisartut ulluuneranilu meeqqeriviit Ilinniartitaanermut Immikkoortortap ataaniipput, angerlarsimaffimmilu paarsisartunut ulluuneranilu meeqqerivimmut inissamik inniminniiniarneq meeqqerivimmiisitsiunnaarnissarlu Ilinniartitaanermut Immikkoortortamut saaffiginnissutigineqartarlutik.
Qeqqata Kommuniani Sisimiuni meeqqat angajoqqaallu ulluunerani paarsisartunut tikilluaqquai.
Sisimiuni angerlarsimaffimmi paarsisartut tallimaapput, taakkulu tamarmik meeqqanik sisamanik paarsaqartarlutik.

Meeqqat ukioqanngitsuniit arfinillit tikillugit ukiullit angerlarsimaffimmi paarsisartunit paarineqartarput. Meeraq angerlarsimaffimmi paarsisartuni paarineqaleraangat meeqqerivimmut allatsinneqartarpoq. Meeraq pingasut missaanni ukioqaleraangat meeqqerivimmut nuunnissaanik angajoqqaat neqeroorfigineqartarput, meeqqerivimmullu nuussagaangamik nalinginnaasumik aggustip aallaqqaataani nuuttarlutik. Angajoqqaat meeqqaminnik siusinnerusukkut kingusinnerusukkulluunniit meeqqerivimmut nuutsitserusukkunik periarfissaqarput.

Angajoqqaat angerlarsimaffimmilu paarsisartut akornanni attaveqatigiinneq
Meeraq angerlarsimaffimmi paarsisartuni aallartinnginnerani angajoqqaat qitornartik ilagalugu pulaarnissaannik neqeroorfigineqartarput.
Angajoqqaat meeqqaminnik paarsisitsinerminni toqqissisimanissaat anguniarnilugu pulaarnermi tassani angajoqqaat, meeqqat paarsisullu akornanni pitsaasumik attaveqatigiilernissap aallartinneqarnissaa pingaaruteqarpoq. Angajoqqaat pulaarnerminni angerlarsimaffimmi paarsisartut ulluinnarni sulerisarnerinik ilisimatinneqartarput, soorluttaaq meeraq, immikkut mianerisariallit, meeqqap nerisarnera, nappaateqarpat nappaataa il.il. paarsisussamut ilisimatitsissutigineqarnissaat pingaaruteqartoq.
Meeqqap sungiusimanngisaminut nuunnera sapinngisamik ilungersunannginnissaa kissaatigineqarpoq, taamaattumillu ullut siulliit meeraq akunnialuinnarni paarsisartumiittaruni pitsaanerussalluni.

Angerlarsimaffimmi paarsisartuni ulluinnarni atukkat
Angerlarsimaffimmi paarsisartut meeqqanik isumassuilluartut sulisorineqarput. Angerlarsimaffimmi paarsisartup meeraq pinnguarnikkut angerlarsimaffimmilu ulluinnarni suliassanut peqataatinneqartarneratigut ineriartortittarpaa.
Pingasunngornerit tamaasa angerlarsimaffimmi paarsisartu Innuttaasut Illuanni ataatsimoortarput, (juuli aggustilu minillugit), tassungalu atatillugu ataatsimut misigisassarsiornissat allatullu aaqqissuussinerit aaqqissuunneqartarlutik.
Innuttaasut Illuanni naapittarnikkut meeqqap paarsisumi sulinngiffiini paarsisussani sungiusartarpaa, nutaamik ilisarisimasaqalertarpoq, meeqqanik ikinngutitaartarpoq, sammisassanullu assigiinngitsunut peqataasarluni.
Aasaanerani juulimi aggustimilu angerlarsimaffimmi paarsisartut sapaatip akunneranut akunneq ataaseq naluttarfimmik atuinissaminnut periarfissaqartarput.
Angerlarsimaffimmi paarsisartut sulinerminnut atatillugu perorsaanermut siunnersortimit tapersersorneqartarput, perorsaanermullu siunnersorti akulikitsumik angerlarsimaffimmi paarsisartunut pulaartarluni. Pingaartumik meeqqat ukioqanngitsuniit pingasut tikillugit ukiullit pisariaqartitaat ineriartornerallu pillugit pikkorissarnissanut angerlarsimaffimmi paarsisartut peqataanissaannik neqeroorfigineqartarput.

Angerlarsimaffimmi paarsisartumi allami paarineqarneq
Angerlarsimaffimmi paarsisartoq napparsimatillugu, qaangiuttoorsimanerminut taarsiullugu sulinngiffeqarpat, feriarpat pikkorissarpalluunniit meeraq angerlarsimaffimmi paarsisartumit allamit paarineqassaaq. Taamaattoqartillugu meeqqap toqqissisimanissaa anguniarlugu angerlarsimaffimmi paarsisartup allanngorartinnginnissaa anguniarneqassaaq.
Angerlarsimaffimmi paarsisartoq tassanngaannartumik napparsimalertillugu, ulloq taanna angerlarsimaffimmi paarsisartoq meeqqanik tigusisussaq attavigineqassaaq.

Angajoqqaanik suleqateqarneq
Meeqqap toqqissisimasuunissaani angerlarsimaffimmi paarsisartup angajoqqaallu akornanni suleqatigiilluarnissaq pingaaruteqarluinnarpoq. Angerlarsimaffimmi paarsisartup angajoqqaallu akornanni ulluinnarni oqaloqatigiittarneq ataqqinninnerlu meeqqap ulluinnarni toqqissisimasuunissaani sunniuteqartorujussuusarpoq.
Angerlarsimaffimmi paarsisartut minnerpaamik ukiumut sisamariarlutik paarsaqartitsisartut katersortassavaat.
Meeraq paarsartik pillugu angerlarsimaffimmi paarsisartut nipangiussisussaatitaapput. Nipangiussisussaatitaaneq angerlarsimaffimmi paarsisartunut suliunnaarnertisigut atorunnaarneq ajorpoq.
Qitornavit angerlarsimaffimmi paarineqarnera qanoq ingerlanersoq pillugu angerlarsimaffimmi paarsisartorisat oqaloqatigiuk.
Qitornavit feriarnissaminik pisariaqartitsisarnera aamma eqqumaffigissavat.

Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaat nr. 10, 5. december 2008-meersoq