Akuleriisitsilluni paaqqinnittarfik ”Nuka” Qeqqata Kommunianit pigineqarpoq, 1993-imilu Namminersornerullutik Oqartussanit maannakkut allakkeriviusumi pilersinneqarluni.

1995-imi juunip aallaqqaataani ”Nuka” maannakkut inissisimaffigisaanut nuunneqarpoq, Sisimiut Kommuneanullu marlunnik immikkoortortalerlugu – meeraaqqerivik meeqqerivillu – tunniunneqarluni.

2006-imi oktobarip aallaqqaataani paaqqinnittarfik meeraaqqerivimmik ilaneqaqqippoq, taamaalillunilu maannakkut meeqqanut 52-nut inissaqartitsilluni. 2009-mi novembarip aallaqqaatani kommune inimik nutaamik immikkut pilersitsisariaqarsimavoq, utaqqisoqannginissaa anguniarlugu. 

Meeqqat ima agguarneqarput: ukioqanngitsunit pingasunik ukiullit tikillugit ininut marlunnut avinneqarput, inillu taakku marluk tamarmik aqqaneq-marlunnik meerartaqarlutik. Pingasuniit arfinillit tikillugit ukiullit 28-t, inini marlunni immikkoorttinneqarsimapput, inimi anginermi meeqqat 20-t inissinneqarsimapput. Mikinerusumilu meeqqat arfineq pingasunut inissaqartinneqarlutik.

”NUKA” naatsumik oqaluttuaralugu
Paaqqinnittarfimmi kajumissaarineq/ilinniartitsineq atorneqarneruvoq. Inerteqquteqarneq atugaanngilaq – angorusunneqartut eqqartorneqartarput – oqaasertalersuisoqartarlunilu.

Meeqqanik immikkut pisariaqartitsisunik saniatigut sullisivugut, tammannalu tunngavigalugu killissamik ilinniartitsisoqartarpoq, pilersaarusiorneq ingerlanneqartarluni pictogram-it atorlugit. Tamannalu siuariartorpoq ingerlalluarlunilu.

Sulisut oqaluttariaatsiminnut eqqummaaripput, oqalunnerminnilu nipitik qaffannagit inussiarnersumik oqaluttarnissartik anguniagaralugu. Inuttut sulisutullu pikkorissarnerit ingerlanneqartarput.

Pinnguartarfik oqquusimasumiilluni ungalusaqarlunilu arsaattarfiup eqqaaniippoq. Ukioq naallugu haali/timersortarfik meeqqerivimmiunut atorneqartarpoq ataasinngornikkut ullaap tungaani.

Aasaanerani ippernat paaminartaqaat, taamaakkaluartorli meeqqerivimmiut taqusserlutik asiartarput. Uumasunik takuniaasoqartarsinnaavoq, tuttut umimmaallu. 

Paaqqinnittarfimmit avatangiiseq atorluarneqartarpoq, soorlu suliassaminnut naasunik, ivikkanik, orpikkanik, sioqqanik ujaqqanik, atoqqinneqarsinnaasunillu katersisarlutik. Silagitsillugu silamiinnerusarput. Ukiup qanoq ilinera aallaavigalugu sammisassaqartitsinerit ingerlanneqartarput, pingaartumillu juullilernerani, seqinniarneq, anaalerivissiorneq, poorski il.il. pingaartinneqartarlutik.

Meeqqat suliarisartagaat/assassugarisartagaat sapinngisamik angajoqqaanut saqqummesinneqartarput qaammatip naanerini.

Pisoqaleraangat angajoqqaat "Atuisooqatigiit" pilersaarusioqataatinneqartarput tassa angajoqqaat sulisullu piumasaat katunnerisigut pilersaarusiortoqartarluni.

Ukiuleraangat issileraangallu ilaatigut pisuttuanngitsoortarput/ aniinngitsoortarput. Issip -20 gradit ataassimagaangagu meerartagut aneeqqusaajunnaartarmata.

Ilaatigooriarluni kikkunnut tamanut nuannaarutaasumik ikinngutit ilaquttallu paaqqinnittarfimmut pulaartarput.

Ammasarfiit:
Paaqqinnittarfik ullut tamaasa 06.45-mit 17.00-p tungaanut ammasarpoq.
Januaarip arferngani, Kunngi Pingasuni, aamma maajip aallaqqaataani Sulisartut Ulluanni/Namminersornerulernerup eqqunneqarnerani, ullup affaa ammasarpoq.
Juunip 21-ani Inuiattut Ullorsiornermi, paaqqinnittarfik matoqqasarpoq.

Attavissaq:
Postbox 59
3910 Kangerlussuaq
Oqarasuaat: (+299) 84 11 75       
Fax: (+299) 84 11 73
E-mail