Meeqqerivik "Sisi" pingasunit ukiulinniit atualernissamik tungaanut meeqqeriviuvoq. Meeqqerivik 1969-imi sanaajuvoq, ukiullu ingerlanerini assigiinngitsutigut nutartissimalluni. Meeqqerivik ininut pingasunut agguagaavoq.
Sammisassat:
Meeqqerivimmi meeqqat ullaakkut inimi nerisarfimmi ataatsimoornermik aallartittarput, ataatsimuulaarneq pereeraangat iniminnut ukioqatigiiaat sulisutik pingasut, perorsaasoq, perorsaanermut ikiorti, ikiortilu ilinniarsimanngitsoq ataatsimoorfeqartarput, tassani meeqqat peroriartornerannut killiffiannut naleqquttumik sammisaqartinneqartarlutik.
11.30-matunissap tungaanut: Init assigiinngitsunik sammisaqarfiusinnaasut ammassapput, assassortarfik, pinngussanik pinnguartarfik, ini pinnguartarfik meeqqat sulisunik peqateqarlutik pinnguarfiusinnaasaat pinngussanik atortulersorneqanngitsoq, silami aneerusuttut imaluunniit aneernissaminnik pisariaqartitsisut kaammattorneqarsimasut aneersinnaallutik. Piffissami tassani meeqqat ukioqatiginngisaraluminnik naapitaqarlutillu pinnguaqateqartarput, sulisullu inini allaneersut aamma naapittarlugit.
Nal.11.30-13.00 ullup qeqqasiorneq meeqqap nammineq neriartorfigisinnaasaa piffissaavoq.
14.00-15.00: Piffissaq ualikkorsiorfik meeqqap nammineq neriartorfigisinnaasaa.
Angajoqqaanik suleqateqarneq:
Ullaakkut meeqqat angajoqqaallu gangvagtimit tikilluaqquneqartarput, ullaat tamaasa kaffeqarlunilu teeqartarpoq angajoqqaanut piumasunut piffissalinnullu nerrivimmut ingilluni oqaloqatigiittoqarsinnaalluni. Ukiumut sisamariarluni ullaakkorsioqatigiinneq pissalluni.
Ukiumut sisamariarluni atuisut ataatsimeeqatigiittarput, ukiumut pilersaarusiorneq, perorsaanermut tunngassutilinnik, meeqqat pisariaqartitaannut tunngasunik, angajoqqaallu nutaat suleriaatsimik saqqummiiffiginerannik imaqartartunik, ukiumut marloriarluni meeqqat ataasiakkaat angajoqqaavinik pilersuisuinillu oqaloqateqarnerit ingerlanneqartarput, tamanna pisarpoq TRAS meeqqat oqaatsimikkut ineriartornerata killiffii, SPU meeqqat atualernissaannut naliliiniut ingerlanneqareeraanngat.
Meeqqerivik ’Sisi’-p pingaarnerutillugit anguniagai makkuupput
Pingaartipparput meeqqap nammineersinnaanera, nammineq pilersitsisinnaanera, kinaassutsiminik ilisimaarinninnissaa, minnerunngitsumillu toqqisisimanissaa anguniassallugu, taakku angajoqqaat suleqatiginerisigut anguniagassaralugit. Ineqatigiit ukiumut anguniagaat meeqqat killiffii, kiisalu meeqqanut aalajangersimasumut pingaarneq ujartorlugu anguniagaqartarpugut, angajoqqaanullu immikkkut paasissutissanik saqqummiisinnaasarluta.
1. Meeqqap kinaassutsiminik ilisimaarinninissaa aqqutissiussallugu:
- meeqqap angajoqqami qatanngutimilu aqqi, najukkanilu ilisimaarinissaa aqqutissiutissallugu
- niviarsiaraaneq, nukappiaraaneq sumiuussuseq allaanerussutsillu akuerineratigut
- timip pisataanik ilisimasarititsinikkut
- ilaqutttat avatangiisillu eqqartornissaannut periarfissinnerisigut
2. Meeqqat peqateqarsinnaanngortillugit:
- pinnguarnikkut, ullumikkorpiaq misigissutsikkut qanoq inissisimanerup akuerineratigut
- pisinnaasat, sanngiiffiillu akuerinerisigut
- akerleriissinnaanerisigut kaammattuinikkut aqqutissiuussinikkut
- nersualaarinikut kaammatuuinikkullu
- meeqqat meeqqeriviup iluani ininut allanut pulaarsinnaanerat periarfissartinneratigut
3. Meeqqat toqqissisimasut:
- meeqqat toqqissisimassappata angajoqqaavi suleqatigineqassapput
- meeqqqap ineriartornermigut killiffimminullu naapertuuttumik piumaffigalugillu killissaqartinnerisigut
- meeqqat sulisullu imminnut ammaffigisut
- assigiimmik suleriaaseqarnikkut/pissuseqarfiginninnikkut
- sulisut anguniakkaminnik tunaartaminillu ilisimaarinnittut ineriartortullu
4. Pisunut malinnaasut:
- illoqarfimmi pisunut pisussanullu nassuiaallugillu peqataatinnerisigut
- misigissutsikkut inissisimaffiannut tunngasunik eqartuinikkut sammisaqartitsinikkullu
- ukiup qanoq ilinera naapertorlugu sammisaqartarnikkut
5. Atualernissamut piareersimaffiusoq:
- pinnguarneq, takorluuisinnaaneq, eqqaamannissinnaaneq, naatsorsuisinnaaneq, oqaasinnguisinnaaneq, assassornikkullu misigisartitsinikkut periarfissiineq aqqutissiuinerlu
6. Angerlarsimaffimmut tapertaassaaq suleqatiginnillunilu:
- meeqqap pisariaqartitai salliutillugit paaseqatigiinnikkut angajoqqaat sulisullu suleqatigiinnerisigut
7. Meeqqap nammineersinnaassusaanik aqqutissiuisoq:
- atisalersornermi, atisaajarnermi, nerinermi, oqaasinnguinermi, eqqiluisaarnermi, sammisassaqartitsinermi, inooqataanermilu nammineq periarfissinnerisigut
8. Meeqqat akisussaaqataasut:
- meeqqat pisussaaffiinik nassuiaattarnerisigut piumaffigissarnerisigullu, aperisarnerisigut, sammisassanik aalajangeeqatigiittarnikkut paasisitsinikkullu, nerinermi nerereernermilu torersaaqatigiinnermi, atisanik pigisanillu paarisinnaanermik akisussaaffiliinikkut
9. Meeqqat namminneq pilersitsisinnaasut:
- titartaanermi, qiortaanermi, sammisassartitsinermi nammineq takorluuinertik paasinninnertillu malillugu pilersitsisinnaanerisaat periarfissinnerisigut
- misigissutsit aallaavigalugit pinnguarnikkut pilersitsisinnaaneq periarfissillugu
10. Meeqqat isummersinnaasut:
- meeqqap toqqissilluni piareernissaata ataqqinneratigut
- aaqqissuussaasumik tulleriiaarinikkut
- sorusunnerinik paasinninnikkut
- oqaloqatigiinnikkut, oqaluttuarnikkut, isiginnaartitsinikkut, atuakkanik atuarnikkut, meeqqap oqaatigiumasaanik nassuiaataanillu tusarnaarnikkut
11. Inuiattut oqaatsivut salliutinneqartut:
- meeqqamut akisussaasut angajoqqaallu peqatigalugit kalaallisut oqaatsitta salliutinneqarnerisigut
- oqaaseqatigiinngisat oqaatigineqartut isumaannik nassuiaattarnerisigut
- kisitsisit, amerlassutsit, erinarsorneq, pinnguarnerlu atorlugit siuarsaanikkut
12. Nunatta pissarititaanik atorluaaneq:
- inuussutissanik nunatta immattalu pissaritiaanik atorluaanikkut ilisimasassarsiortitsinikkullu
13. Meeqqat timikkut tarnikkullu peqqissut:
- eqaarsaariarnerit, qitinneq, nunaliartarnerit, pisuttuarnerit, isiginnaartitsisunut isiginnaariarnerit, nipilersortunut/erinarsortunut tusarnaariarnerit, meeqqap inuttut misigissutsikkullu atukkamigut pisariaqartitaa aallavigalugu meeqqerivimmi periarfissiineq
2012-mut ukiumoortumik pilersaarut
"Sisi" uunga attavigineqarsinnaavoq
Aqqusinersuaq 20
Postbox 1
3911 Sisimiut
Oqarasuaat: (+299) 86 41 93
Fax: (+299) 86 35 93
E-mail