Sisimiuni angerlarsimaffimmi paarsisartut
Angerlarsimaffimmi paarsisartoq Ilinniartitaanermut Immikkoortoqarfimmut atavoq, angerlarsimaffimmilu paarsisartumut allatsittarneq anisarnerlu Ilinniartitaanermut Immikkoortoqarfiup allaffiani ingerlanneqartarpoq.
Sisimiuni angerlarsimaffimmi paarsisartut pingasuupput, tamarmillu meeqqanik sisamanik tigummiaqartarlutik.
Meeqqat ukioqanngitsuniit sisamat tikillugit ukiullit angerlarsimaffimmi paarsisartunit paarineqartarput. Meeraq angerlarsimaffimmi paarsisartuni paarineqaleraangat meeqqerivimmut allatsinneqartarpoq.

Meeraq angerlarsimaffimmi paarsisartunut aallartileraangat
Meeraq angerlarsimaffimmi paarsisartuni aallartinnginnerani angajoqqaat qitornartik ilagalugu pulaarnissaannik neqeroorfigineqartarput.
Angajoqqaat meeqqaminnik paarsisitsinerminni toqqissisimanissaat anguniarnilugu pulaarnermi tassani angajoqqaat, meeqqat paarsisullu akornanni pitsaasumik attaveqatigiilernissap aallartinneqarnissaa pingaaruteqarpoq. Angajoqqaat pulaarnerminni angerlarsimaffimmi paarsisartut ulluinnarni sulerisarnerinik ilisimatinneqartarput, soorluttaaq meeraq, immikkut mianerisariallit, meeqqap nerisarnera, nappaateqarpat nappaataa il.il. paarsisussamut ilisimatitsissutigineqarnissaat pingaaruteqartoq.
Meeqqap sungiusimanngisaminut nuunnera sapinngisamik ilungersunannginnissaa kissaatigineqarpoq, taamaattumillu ullut siulliit meeraq akunnialuinnarni paarsisartumiittaruni pitsaanerussalluni.

Angerlarsimaffimmi paarsisartuni ulluinnarni atukkat
Angerlarsimaffimmi paarsisartut meeqqanik isumassuilluartut sulisorineqarput. Angerlarsimaffimmi paarsisartup meeraq pinnguarnikkut angerlarsimaffimmilu ulluinnarni suliassanut peqataatinneqartarneratigut ineriartortittarpaa.
Marlunngornerit tamaasa angerlarsimaffimmi paarsisartut Innuttaasut Illuanni ataatsimoortarput, (juuli aggustilu minillugit), tassungalu atatillugu ataatsimut misigisassarsiornissat allatullu aaqqissuussinerit aaqqissuunneqartarlutik.
Innuttaasut Illuanni naapittarnikkut meeqqap paarsisumi sulinngiffiini paarsisussani sungiusartarpaa, nutaamik ilisarisimasaqalertarpoq, meeqqanik ikinngutitaartarpoq, sammisassanullu assigiinngitsunut peqataasarluni.
Aasaanerani juulimi aggustimilu angerlarsimaffimmi paarsisartut sapaatip akunneranut akunneq ataaseq naluttarfimmik atuinissaminnut periarfissaqartarput.
Angerlarsimaffimmi paarsisartut sulinerminnut atatillugu perorsaanermut siunnersortimit tapersersorneqartarput, perorsaanermullu siunnersorti akulikitsumik angerlarsimaffimmi paarsisartunut pulaartarluni.

Angerlarsimaffimmi paarsisartumi allami paarineqarneq
Angerlarsimaffimmi paarsisartoq napparsimatillugu, qaangiuttoorsimanerminut taarsiullugu sulinngiffeqarpat, feriarpat pikkorissarpalluunniit meeraq angerlarsimaffimmi paarsisartumit allamit paarineqassaaq. Taamaattoqartillugu meeqqap toqqissisimanissaa anguniarlugu angerlarsimaffimmi paarsisartup allanngorartinnginnissaa anguniarneqassaaq.
Angerlarsimaffimmi paarsisartoq tassanngaannartumik napparsimalertillugu, ulloq taanna angerlarsimaffimmi paarsisartoq meeqqanik tigusisussaq attavigineqassaaq.

2012-mut ukiumoortumik pilersaarut

Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaat nr. 10, 5. december 2008-meersoq