Piginneqatigiilluni inissialiornerit
Piginneqatigiilluni inissiaatileqatigiiffik inissialiorfinni sanaartukkanut, tassaavoq piginneqatigiilluni inissiaatileqatigiiffiulluni ingerlanneqarlunilu ikinnerpaamik sisamanik inissiartalinnik sanaartortitsisoq.
Piginneqatigiilluni inissialiat quleriinngorlugit imaluunniit akulikitsutut pukkitsutulluunniit sanaartorneqassapput, inissiallu tamarmik immikkut isaariaqartinneqarlutillu igaffeqartinneqassapput, kiisalu immikkut uffarfeqarlutillu perusuersartarfeqassallutik. Piginneqatigilluni inissialiat najugaqarfissiami sanaartukkanut allanut naapertuuttunngorlugit sanaartorneqassapput.
Piginneqatigiilluni inissialiat illutut ataasiakkaatut affarleriittulluunniit sanaartorneqarnissaannik Namminersorlutik Oqartussat immikkut ittumik akuersissuteqarsinnaapput.

Sanaartornermi tapiissutit namminerlu akiliutit
Maleruagassatigut tunngavissat naapertorlugit, sanaartornermi aningaasartuutinit tapiiffigineqaataasinnaasut 25 procentiat tikillugu Namminersorlutik Oqartussat kommunalbestyrelsilu erniaqanngitsumik akilersugassaanngitsumillu tapiissuteqarsinnaapput.
Namminersorlutik Oqartussat kommunalbestyrelsillu attartortitassaat, illup ineqarfittassaanut 110 kvadratmeterinut annerpaaffiligaapput, illuluunniit annerussagaluarpat kvadratmeterimullu akisunerugaluarpalluunniit kvadratmeterimut annerpaamik 19.100 koruuninik tapiissuteqarsinnaallutik.
Piginneqataasussat tamarmik namminneq akiliuteqartussat, sanaartornermi aningaasartuutissat imaluunniit piginneqataassutsinut naligitinneqartut 5 procentiinik akiliisinnaappata aatsaat Namminersorlutik Oqartussat kommunilu tapiissuteqarsinnaapput, takuuk piginneqatigiilluni inissianut piginnittup atuisinnaatitaanera.
Katillugit sanaartornermi aningaasartuutissat, piginneqatigiilluni inissiaatileqatigiiffiup nammineerluni aningaasalersussavai.

Piginneqatigiilluni inissianik, namminersortut piginneqatigilluni inissiaatileqatigiiffinnut allanut tunineqarnissaat siunertaralugu sanaartorsinnaanerat, Piginneqatigilluni inissiaatileqatigiiffiit pillugit inatsisartut peqqussutaanni kapitali 3-kkut periarfissaavoq. Kommunalbestyrelsi aalajangiinikuuvoq, attartortitsinissamik siumoortumik neriorsuisoqarsinnaappat, piginneqatigiilluni inissiassanut akuersissuteqartoqartarnissaa pitsaanerussasoq.

Naammassinera atulernissaalu
Piginneqatigiilluni inissiat naammassineqarpata, atulerneqarsinnaanissaanut akuerissut kommunip suliarissavaa. Sanaartugaq naammassineqarniariarpat, taava sanaartornermi naatsorsuutit inaarutaasut, atulernissaanut akuersissutip assilinera, peqatigiiffiup aningaaserivianit Namminersorlutik Oqartussanut kommunimullu qularnaveeqqusiussaqarluni taarsigassarsinermi allagartat kiisalu sanaartukkat sillimmaserneqarsimanerinik uppernarsaat peqatigiiffiup nassiutissavai.

Inaarutaasumik sanaartukkanut pisortat tapiissutaat inaarutaasumik aalajangerneqassapput, sanaartornermilu naatsorsuutit akuersissutigineqarsimasut tunuliaqutaralugit tunniunneqassallutik. Pisortat tapiissutaat erniaqaratillu akilersugassaanngillat.

Qinnuteqaatit paasissutissallu annertunerusut
Piginneqatigiilluni inissialiornissanut kommuni kiisalu Namminersorlutik Oqartussat tamarmik immikkut attartortitsinissaannik qinnuteqarfiusussaapput.

Inatsit toqqammaviusoq atuarusukkukku, taava Namminersornerullutik Oqartussat peqqussutaat nr. 2, 16. maj 2008-meersoq kingusinnerusukkut allannguutilik una toorukku atuarsinnaavat.

Peqatigiiffiit atorunnaarsinneqarnissaat
Piginneqatigiilluni inissiaatileqatigiiffik atorunnaarsinneqassappat, tamanna oqartussaasunit akuersissutigineqassaaq, pisortaniillu tapiissutigineqarsimasut akilerneqassallutik.