Najugaqarnermut uppernarsaat suugami?
Najugaqarnermut uppernarsaat tassaavoq allakkatigut atsiukkamik sumi najugaqarninnut nalunaarsuut.

Najugaqarnermut uppernarsaat sumut atussagami?
Sumi najugaqarnerit uppernarsassallugu pisariaqartitsiguit, taava inuit allattorsimaffiat saaffigalugu tamatuminnga qinnuigisinnaavat.

Pisianik eqqussineq
EU-p iluani pisiaqarsimalluni momsimut akiliutinik utertitsinissami najugaqarnermut uppernarsaat uppernarsaatitut atorneqarsinnaavoq, soorlu pisiat EU-p iluani pisarisimasat anninniartillugit akitsuusiisarfinni imaluunniit najukkami akileraaruserisoqarfimmi naqititsiniarnermi.

Taamaasilluni Danmark-imi EU-miluunnit pisiassanik akitsuuteqanngitsumik pisiniaraanni najugaqarnermut uppernarsaat passimut ilanngullugu atorneqarsinnaavoq.

Illuatungaatigulli nunami pisiffimmi pisiap momsitaa ilanngaatigitinnagu eqqukkaanni, taava sumiiffimmi najukkami akileraaruseriffimmut saaffiginnittoqassaaq, najugaqarnermut uppernarsaat pisinermilu uppernarsaat nassarlugit, taamaasillunilu pisiat allagartaat naqitsillugu, tamatumalu kingorna pisiniarfimmut pisiffigisimasannut nassiullugu.

Nunanut allanut angalaneq
Nunanut allanut angalassagaanni ilaatigut napparsimalernermi najugaqarnermut uppernarsaat atorneqartarpoq. Najugaqarnermut uppernarsaat nunanut allanut angalanermi tassanngaannartumik napparsimalernermi ikiorsinneqassatilluni uppernarsaatitut atorneqartarpoq, tassa nunani Kalaallit Nunaata isumaqatigiissuteqarfigisaani.

Kalaallit Nunaanni peqqinnissamut tunngasutigut quppersakkami Peqqikmi maleruagassanut tun-ngasut annertunerusumik atuarsinnaavatit, tassa maleruagassat suut nunami ornitami isumaqatigiissutaanersut takuniarlugit. Una tooruk nalunaarsuivik takuniarukku.

Nuunnermi ilinniariartornermilu
Najugaqarnermut uppernarsaat aamma Kalaallit Nunaata iluani avataanulluunniit nuunnermi atorsinnaavoq. Nuunninni poortuisut poortukkamik piginnittuanut uppernarsaatit najugaqarnermut uppernarsaatit atorfissaqartippaat, tassa pisattatit / pequtitit kalaallit nunaanni qallunaalluunniit nunaani umiarsualivimmiit tigunialerukkit.

Assersuutigalugu Danmarkimut ilinniagaqariartussaguit, taava najugaqarnermut uppernarsaat ilinniarlernissannik pisortanut ikiuisunut ilinniarfissaniluunniit uppernarsaatitut atussavat. Tamatumani efterskole assigisaaluunniit eqqarsaatigineqarsinnaavoq, tassa sumi najugaqarsimanermik uppernarsaammik atorfissaqartitsisussatut.

Sisimiuni ilinniagallit inissaannik atorfissaqartitsiguit, tamatumani aamma najugaqarnermut uppernarsaat atorneqartarpoq. Ilinniartunut inissiani najugaqassagaanni, sivikinnerpaamik ukiuni tallimani Sisimiuni najugaqarsimanissaq piumasaqaataavoq, tamatumanilu najugaqarnermut uppernarsaat atorfissaqassalluni.

Qanoq ililluni najugaqarnermut uppernarsaat pissarsiarineqarsinnaava?
Najugaqarnermut uppernarsaat kommunep kiffartuussiviani suliarineqartarpoq, imaluunniit nunaqarfimmi allaffeqarfimmi. Sianersinnaavutit namminerluunnit saaffiginnissinnaallutit. Saaffiginnikkuit taava uppernarsaat sumut atorniarnerit apeqqutigineqassaaq, taamaasilluni Kiffartuussivimmiit uppernarsaat eqqortoq tunniunneqarniassammat.