Aningaasarsiat iluarsiissutit

Nalinginnaasumik paasissutissiineq 

Kalaallit Nunaanni suliffeqarfiit pisortanit namminersortuniillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Tamatuma saniatigut pisortani atorfeqartunut atorfinitsinneqarnermi atugassarititaasut isumaqatigiissummi sulisut ataasiakkaat atorfinitsinneqarneranni malinneqartuni aamma maleruagassiorneqarput, ilaatigullu namminersortuni atuuttumik. Matuma kinguliani allassimasut pisortat suliassaqarfiannut taamaallaat tunngatinneqarput.

Aningaasarsiatit iluarsiissutigineqartarput. Aningaasarsiatit iluarsiissutigineqarpata aningaasarsiatit allanngussapput, naak atorfiit taannaaginnaraluartoq. Nalinginnaasumik imaattarpoq:
• Isumaqatigiissutip nutarternerani (isumaqatigiissut pillugu isumaqatiginninniartoqarnerani)
• Atorfeqarsimanerup sivisussusiata sivitsorneqarnera
• Pikkorissarnerit imaluunniit ilinniartitaanerit aalajangersimasut tapisiaqalernernik kinguneqartut naammassineqarnerini
• Isumaqatiginninniarnermi

Aningaasarsiavit tapisiavillu iluarsiissutigineqartarneri annertunerusumik paasisaqarfigerusukkukkit, sulisutut kattuffinnut saaffiginnissinnaavutit imaluunniit isumaqatigiissutit atuarsinnaavat.

Isumaqatigiissut ilinnut tunngasoq suliffinni pissarsiarisinnaavat sulisut sinniisuat attavigineratigut, sulisutut kattuffiit attavigineratigut imaluunniit Naalakkersuisut nittartagaanni pissarsiarisinnaallugu. (danskisut allassimasumut ingerlaqqippoq - danskisut allassimasuani isumaqatigiissutit amerlanerummata)

Isumaqatigiissutit pillugit isumaqatiginninniarnerit 

Isumaqatigiissutit pillugit isumaqatiginninniarnerit suliffittut suliassaqarfimmiit suliffittut suliassaqarfimmut assigiinngitsunik ingerlanneqartarput. Isumaqatiginninniarnerit nalinginnaasumik piffissami aalajangersimasumi atuuttussanngortinneqartarput (nalinginnaasumik ukiut 2 – 4-t). Tamanna ima paasisariaqarpoq isumaqatigiissutit piffissakkaartumik isumaqatiginninniutigineqaqqittassapput.

Aningaasarsiat iluarsiissutigineqarneri nalinginnaasumik 1. april imaluunniit 1. oktober aallarnerfigalugit atuutilertarput. Qaffaassutaasullu ilaanni kingusinnerusukkut atuutilertarlutik. Taamaattoqassappallu aningaasarsiatit kingumoortumik iluarsiissutigineqarlutik atuutilersinneqassapput.

Isumaqatiginninniarnerit naammassippata aningaasarsiatit namminerisamik iluarsiissutigineqassapput – amerlasuutigut tunngavisumik aningaasarsiatit qaffaavigineqassapput imaluunniit tapisiatit iluarsiivigineqarlutik.

Atorfeqarsimanerup sivisussusiata sivitsorneqarnera 

Atorfeqarsimanerup sivisussusiata sivitsorneqarneri apeqqutaavoq:
• Qanoq atorfeqarnersutit
• Isumaqatigiissut sorleq malillugu atorfeqarnerit
• Sivisussusileriigaq qanoq sivisutiginersoq

Inuussutissarsiutinik misilittagaqarnerulernerpit kingunerisaanik amerlasuutigut aningaasarsiatit ukiut tamaasa imaluunniit ukioq allortarlugu qaffanneqartassapput. Sivitsuineq ingerlanneqartuassaaq sivitsuinermi qaffasinnerpaap angunissaata tungaanut.

Atorfeqarsimanerup sivisussusia anguneqartoq atorfiup atorfimmut assingusumut nikinnerani malinnaatinneqassaaq.

Pikkorissareernermi ilinniagaqareernermilu aningaasarsianut tapisiat 

Aningaasarsiatit pisut ilaanni iluarsiivigineqarsinnaapput, piginnaasat malillugit tapisiaqalernissamut ilinniaqqissimallutit imaluunniit pikkorissarsimallutit angusaqarsimaguit.

Piginnaasat malillugit tapisiaqalernissamut suut periarfissaanersut suliassaqarfinnut isumaqatigiissummi amerlasuutigut takuneqarsinnaasarpoq.

Aningaasarsiat pillugit isumaqatiginninniarneq 

Pisortani sulisutut nalinginnaasumik aningaasarsiatit pillugit nammineq isumaqatiginninniarneq ingerlassinnaanngilat. Atorfiilli ilaat isumaqatigiissutillu ilaat naapertorlugit aningaasarsiatit tapisiatillu pillugit isumaqatiginninniutigineqarnissaannut periarfissiisarput.

Isumaqatigiissut naapertorlugu atorfeqaruit imaluunniit sulisuuguit aningaasarsiatit nammineq isumaqatiginninniutigisinnaallugit, nalinginnaasumik taamaaliorsinnaavutit:
• Sulilerninni
• Atorfiit immikkoortiterneqalerpat
• Atorfiit isumaqatiginninniutigineqaqqilerpat
Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl