Ajunngitsuliornermik imaluunniit tamat iluaqutissaannik siunertaqartumik tamanut ammasunik aaqqissuussaqarneq katersuiniartarnerlu

Nalinginnaasumik paasissutissiineq 

Peqatigiiffittut imaluunniit suliffeqarfittut assigisaattullu ajunngitsuliornermik imaluunniit tamat iluaqutissaannik siunertaqartumik tamanut ammasumik katersuiniarniaruit imaluunniit eqquiniaatitsillutit tuniniaaniaruit, najukkanni politeeqarfimmut nalunaaruteqassaatit imaluunniit politeeqarfimmit akuersissummik pissarseqqaassaatit.

Ajunngitsuliornermik siunertaq tassaasinnaavoq Kalaallit Nunaannit meeqqat inuusuttullu ilungersunartumik inissisimasut pillugit imaluunniit Neriuffiup iluaqutissaannik katersuiniarneq.

Tamat iluaqutissaannik siunertaqarneq tassaasinnaavoq najugarisami oqaluffiup nutaanik igalaartaartinnissaanut, tamat atortuusiviisa kusassarnissaanut, illoqarfimmi meeqqat atuartut paasisassarsiorlutik angalanissaannut assigisaannulluunniit tunngatillugu katersuiniarneq.

Tamanut ammasumik katersuiniarnerit periutsit marluupput, ukuuppullu:

Tamanut ammasumik katersuiniarneq
Tamanut ammasumik katersuiniarneq pineqartillugu, tunissutissaqartoq toqqaannartumik pissarninani tunniussaqassaaq.
Tamanut ammasumik katersuiniarneq nalunaarutigineqaannassaaq nalunaarullu tiguneqarsimanera pillugu politiinit uppernarsineqassalluni.

Tamat iluaqutissaannik eqquiniaatitsinikkut tuniniaaneq
Tamat iluaqutissaannik eqquiniaatitsinikkut tuniniaaneq pineqartillugu, peqataasussaq aaqqissuussamut aggersarneqartassaaq.
Tassaasinnaavoq raadiukkut bingortitsineq, qititsitsineq, takutitsineq imaluunniit aaqqissuussaq alla, taakkunanilu peqataasoq akissarsiassanik eqquisinnaalluni, imaluunniit sinneqartoorutit ajunngitsuliornermut tamalluunniit iluaqutissaannik siunertaqarpata, peqataasoq tunniussaqarnermigut pinnassinnaalluni.

Piumasaqaatit 

Peqatigiiffik assigisaaluunniit katersuiniarluni imaluunniit tamat iluaqutissaannik eqquiniaatitsiniaatitsilluni tuniniaaguni tamanut ammasumik aaqqissuussaqarniaruni, piumasaqaataavoq:
• peqatigiiffiussasoq, suliffeqarfiussasoq assigisaaluunniit (ikinnerpaamik pingasunik ilaasortaqartoq)
• katersuiniarneq/tamat iluaqutissaannik eqquiniaatitsineq tamanut ammasuussasoq
• ajunngitsuliornermik siunertaqassasoq imaluunniit tamat iluaqutissaannik siunertaqassasoq
• qinnuteqaat pisariaqartunik imaqartinneqassasoq

Piumasaqaatit malinneqarpata, eqquiniaatitsilluni tuniniaanissamut politiinit akuersissummik tunineqassaatit imaluunniit tamanut ammasumik aaqqissuussassap ingerlanneqarnissaanut eqqortumik nalunaartoqarsimanera pillugu politiinit uppernarsarneqassaaq.

Eqquiniaatitsillutit tuniniaanissaq ingerlakkusukku, taamatut ingerlataqarnissat pillugu qinnuteqaammik tunniussissaatit (ataani allaqqasut takukkit). Politiit akuerseqqaartinnagit aaqqissuussaq ingerlateqqusaanngilaq.

Malugiuk
Tamanut ammasumik eqquiniaatitsilluni tuniniaaneq pineqartillugu, immikkoortut sisamat qulaani taaneqartut saniatigut, aaqqissuussap kommunalbestyrelsimit akuersissutigineqarnissaa piumasaqaataavortaaq, taamaammat elektronikkikkut qinnuteqarnermi immersuiffissaq immersoqquneqassaaq tassanilu kommunimit akuersissutigineqarnissaa noqqaassutigineqassalluni.

Nalunaarut sumut ingerlatinneqassava imaluunniit qinnuteqaat sumut tunniutissava?
Peqatigiiffittut katersuiniarneq nalunaarutigissavat imaluunniit eqquiniaatitsilluni tuniniaanissaq najukkanni politeeqarfimmit akuerineqassaaq.

Immikkulli ittunik marlunnik peqarpoq:
1. Tamanut ammasumik aaqqissuussaqarnissamut qinnuteqaruit, ukiumi ataatsimi sumiiffimmi ataatsimi marloriarluni siunertamut tassunga aningaasanik katersuiniartoqassappat, immikkut ittumik akuersissummik Politimestereqarfimmut qinnuteqaatigissavat
2. Tamanut ammasumik aaqqissuussinissamut illoqarfinni arlariinni ingerlanneqartussamik qinnuteqaruit, Politimestereqarfimmut nalunaarutigissavat

Qinnuteqarneq 

Tamanut ammasumik katersuiniarnissaq pillugu nalunaaruteqarniarpit imaluunniit tamanut ammasumik eqquiniaatitsinikkut tuniniaaneq pillugu qinnuteqarniarpit, qinnuteqarnissamut immersuiffissaq ataani link atorlugu immersuisinnaavutit:

Qinnuteqarnissamik immersuiffissaq

Kalaallit Nunaanni politeeqarfiit mail-ii aamma najugaat uani takusinnaavatit

Qinnuteqarnissamut immersugassaq elektronikkikkut immersorsinnaavat. Qinnuteqarnissamut immersugassaq atornianngikkukku, qinnuteqaat paasissutissanik makkuninnga ilanngussisoqassaaq:
1. kikkut katersuiniartitsisuunersut
2. katersuiniarneq piffissami sumi ingerlanneqassanersoq
3. katersuiniarneq sumi ingerlanneqassanersoq
4. katersuiniarneq qanoq ingerlanneqassanersoq
5. aningaasat sumut siunertamut atorneqassanersut, aamma tamanut ammasumik katersuiniarnermi katersukkat naatsorsorneri kimit kukkunersiorneqassanersut allaqqassaaq

Qinnuteqarnissamut apeqqutissaqaruit imaluunniit tamanut ammasumik aaqqissuussineq pillugu nalinginnaasunik apeqqutissaqaruit, Politimestereqarfiup allattaaneranut attaveqarsinnaavutit mail-ikkut: GRL-Ledelsessekretariat@politi.dk imaluunniit oqarasuaatikkut: 70 14 48.

Najoqqutassat 

Tamanut ammasumik aaqqissuussineq pereerpat, nalunaarutigisat sumut nassiunneqarsimanersoq imaluunniit kimit akuerineqarsimanersoq apeqqutaalluni, najukkanni politeeqarfimmut imaluunniit Politimestereqarfimmi allattaanermut naatsorsuutit nassiutissavatit.

Naatsorsueriaaseq link-ikkut ataatigut takusinnaavat:

Naatsorsueriaaseq

Piffissaliussaq 

Tamanut eqquiniaatitsilluni tuniniaanermi akuersissummik pissarsereeruit, eqquiniaatitsinissaq qaammatinik pingasunik sioqqullugu eqquiniaatitsinissamut naatsorsuutit nassiunneqassapput.

Tamanut ammasumik katersuiniarnissaq eqqortumik nalunaarutigineqarsimanera uppernarsigukku, katersuiniarneq pereerpat katersuiniarneq pillugu naatsorsuutinik nassiussissaatit. Katersuiniarneq pereerpat naatsorsuutit kingusinnerpaamik nassiunneqassapput qaammatit arfinillit qaangiuppata.

Naatsorsuutit nassiunnissaanut piffissaliunneqartoq qaangiuppat imaluunniit nassiunneqanngippata, akiliisitaanermik kinguneqarsinnaavoq.

Naammagittaalliuuteqarneq 

Tamanut ammasumik katersuiniarnissamut nalunaarut imaluunniit eqquiniaatitsilluni tuniniaanissamut akuersissut itigartinneqarsimappat, Justitsministeeriaqarfimmut naammagittaalliuuteqarsinnaavutit.

Naammagittaalliuutit uunga nassiutissavat:

Politimestereqarfik
Att.: Allatseqarfik
Imaneq 22
Postboks 1006
3900 Nuuk

Mail: grl-ledelsessekretariat@politi.dk
Oqarasuaat: +299 70 14 48

taamaalilluni allatseqarfimmit naammagittaalliuutit Justitsministeeriaqarfimmut ingerlateqqinneqassaaq.

Naammagittaalliuutit nassiukkukku, eqqaamassavat itigartinneqarninnut akerliunerit tunngavilersornissaa.

Inatsit 

Illit kommunivit immikkut ittoq 

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Politimestereqarfik
Allatseqarfik
Imaneq 22
Postboks 1006
3900 Nuuk

Oqarasuaat: (+299) 70 14 48
E-mail: grl-ledelsessekretariat@politi.dk