Siumut aallarneq

Ikiaroornartumik atornerluisuunermit kiisalu nammineq naleqassuseqannginnermit qatserisartunngorneq inoorusussuseqalernerlu.
Hans Jakob Berthelsen-imut suliffimmik sungiusalerneq inuuneranut pingaarutilerujussuanngorsimavoq
6. oktober 2017

2013-imi Hans Jakob Berthelsen Piareersarfiusimasumi (maannakkut Majoriaq) ilinniartuugallarami inuunerissaarpallaarsimanngilaq.
Nammineq naleqanngitsutut kiisalu imminut tatiginninngitsutut misiginikuusimavoq, taamaalillunilu nikallungalerluni tunniutiinnarsimalluni. Tamatuma saniatigut ikiaroornartumik atornerluisuusimavoq.
Suliffimmik misiliisussanngorpoq. Hans Jakob-ip qatserisartuuneq imatut soqutigisarinngikkaluarlugu, qatserisartutut suliffimmik misiliinissaminik toqqaavoq.
Tamannalu inuuneranik allannguinermik kinguneqarluni.

Suliffimmik misileraaneq qaammammik ataatsimik sivisussuseqartussaavoq, Hans Jakob-illu qatserisartutut inuuneq nuannaralugu paasilerpaa. Minnerunngitsumik suleqatitaavi patsisaallutik.
- Suliffimmik misiliiffigisara assut nuannaraara. Qatserisartut qiimmassaallutillu assut tapersersuipput. Tikilluaqqusaasutut misigisimavunga, Hans Jakob oqaluttuarpoq.
Qaammat naammat ittorisaata aperivaa, qatserisartutut ilinniarusunnginnersoq.

- Takusinnaavarpummi nuannaarnerulerlunilu imminut tatiginerulersoq. Pikkorissuuvoq, qatserisartutsialanngornissaalu qularutissaanngilaq, Qeqqata Qatserisartut immikkoortortami aqutsisua Jakob Olsen oqaluttuarpoq, Hans Jakob-ip suliffimmik misiliinerminik naammasseqqammersoq, atuariartoqqilersorlu pillugu.
Neqeroorut Hans Jakob-ip nuannaarutigeqalugu tigulluarpaa.
Tunngaviusumik ilinniarneq aallartippaa, tamatumalu kingorna suliassanut ilinniartitaanermik naammassinnissinnaalerluni kiisalu biilinut annerusunut aquttuusinnaanermut uppernarsaammik pissarsissalluni.

Atornerluisuujunnaarneq
Tamatuma kingorna Hans Jakob 25-nik ukiulik inuttut sulinikkullu ingerlallualersimavoq. Qatserisartuuvoq napparsimavimmilu portøritut sulilluni, maannakkullu inuunermini ima inissisimalluartigaaq ilinnialerusulluni. Ukiup tulliani portøritut ilinniarnermut aallarteqqittussaasumut qinnuteqaammik nassiussereerpoq. Akissutisinissani utaqqiinnarpaa.
Nammineq naleqassuseq kiisalu imminut tatiginninneq annertuumik siuarujussuarsimavoq.

Pitsaanerpaarlu tassaavoq, ikiaroornartumik atornerluisuujunnaarsimanera.
- Nuannaarnerulerpunga, ammanerulerlunga inuuninnilu siumut ingerlarusussuseqalerlunga. Misigissutsillu tamakku suliffimmik misiliininnit pinngortinneqarput. Qatserisartutut suleqatikka qujaffigerusuppakka. Ineriartornissannut inuuninnillu ingerlariaqqinnissannut nukissannik tunisimavaannga.Taamatullu assigiinngitsutigut misigisaqarnissannik periarfissillunga, soorlu qatserisartutut. Maannakkut inuuninni inissisimalluarpunga, Hans Jakob nuannaarluni oqarpoq, suliffimmillu misiliisimanerminik assut qujamasulluni. Jakob Olsen-illu qutsappaattaaq.

- Tulluusimaarutigisorujussuuarput, pingaartumik ineriartorneranik isiginnittuusimalluni. Maannakkut inoorusulernerulersimavoq, ilinnialernissaminillu pilersaarusiulersimalluni. Tamanna annertuumik alloriarneruvoq, Jakob Olsen oqarpoq.

Neriuutigaa inuusuttut amerlanerusut qatserisartunngornissaminnik soqutiginnileriartussasut.
- Naassaanngitsumimmi maaniittussaanngilagut, taamaattumik amerlasuut soqutiginnilernissaat nuannissagaluarpoq, taamaalillutalu inuusuttut amerlasuut qatserisartutut ilinniartissinnaalissagaluaratsigit. Suliffimmik misiliisoqartarnerput qaqutigoortuuvoq, ukiumut ataatsimik marlunnilluunniit misiliisoqartarnissaq kissaatiginaraluarpoq, Jakob oqarpoq.
Hans Jakob aamma oqariartuutissaqarpoq.

- Neriuppunga amerlanerit periarfissanut tamakkununnga atuilerumaartut. Ingerlariaqqiffiusinnaapput inuunermillu allannguinissamut kajumissitsilerlutik. Imminut mattutiinnarnermit ingerlariaqqinnginnermit tamanna qaqugukkulluunniit innersuutigissavara. Uninngaannaraannimi ingerlariaqqittoqarsinnaanngilaq, naggasiivoq.