Nalunaarusiaq Qeqqatameersoq: Meeqqat Illersuisuata Qeqqata Kommunia nersualaarpaa meeqqat atugarliortut atugarisaannik pitsanngorsaaniarluni suliniuteqapallammat

Meeqqat Illersuisuata Aviâja Egede Lynge’p nuannaarutigaa Qeqqata kommuniani meeqqat atugarliortut atugaat pillugit MIO’p nalunaaruteqareernerata kingorna kommune pimoorussilluni meeqqat atugaannik pitsanngorsaaniarluni suliniuteqapallammat.
6. december 2017
Qeqqata Kommuniani meeqqat atugarliortut atugarisaat MIO’p nalunaarusiamini ukialeqqaarnerani saqqummersumi sammivai. Meeqqat atugarliortut atugarisaat imaannaanngitsut nalunaarusiami allaaserineqarput. Nalunaarusiami kommune aaqqiiniarluni qanoq iliuuseqarsinnaanersoq MIO’p aamma siunnersuuteqarfigaa.

Tamatuma kingunerisaanik kommune suleqatigiissitalianik sukkasuumik pilersitsisimavoq meeqqat atugarliortut pitsanngorsaaffigineqarnissaat anguniarlugu ataatsimoorussamik suliniuteqartussanik.

”Qeqqata Kommuniata suliaq annertooq pingaaruteqartorlu aallartissimavaa. Kommune pitsaasumik aallartippoq. Suliassarlu annertooq suliassaavoq, taamaattumik Qeqqata Kommuniani iliuuseqarniarlutik aallartitsisut annertuumik kaammattorneqarlutillu ikorfartorneqartariaqarput”, Meeqqat Illersuisuat oqarpoq.

Meeqqat Illersuisuata Qeqqata Kommunia nersualaarusuppaa, ingammik pisortaqarfiit akornganni suleqatigiinnerulernissamik kaammattuuteqarnini anguniarlugu suliniuteqartoqalermat. Meeraq atugarliortitaaleraangat kommunemi pisortaqarfiit pingaarutillit tassalu atuarfeqarfik, inunnik isumaginnitseqarfik, politiit allallu suliffeqarfiit suleqatigiilluarlutik paasisaqajaarlutillu qisuariajaartarnissaat pingaaruteqaqaaq.

”Kommunep ilumini maleruagassaminnik suliaqarnera aammalu sillimasussanik aaqqissuussinera takullugu nuanneqaaq, meeqqat sumiginnagaannginnissaat atornerlugaannginnissaallu taamaalilluni anguniarneqarpoq. Tassami angajoqqaat meeqqanillu isumaginnittussat ajoraluartumik meeqqamik isumaginnissinnaanatillu ikorfartuisinnaanngikkaangata, taava pisortaqarfiit sullissisullu pinngitsooratik meeqqamik ikiuisinnaasariaqarput, pitsaassusilimmik, aaqqissuussamik meerarlu qitiutillugu ingerlanneqartumik, taamaalilluni meeqqap illersorneqarnissaminut pisinnaatitaaffia qulakkeerneqarsinnaaniassammat”.

Qeqqata Kommuniani pisortaqarfiit akimorlugit suleqatigiinnissamik pitsanngorsaasoqarnerata saniatigut kommunep nunaqarfiit aamma ilanngummagit tamanna Meeqqat Illersuisuata nersualaarpaa, taamatuma saniatigut pimmatiginnittarneq akiorniarlugu suliniartussamik suleqatigiissitaliortoqarsimanerata saniatigut aamma meeqqat timikkut tarnikkullu persuttagaannginnissaat anguniarlugu suliniuteqartoqarnera pillugu Meeqqat Illersuisuat aamma nersualaarivoq. Meeqqat Illersuisuata nuannaarutigaattaaq inunnik isumaginninnermut siunnersortimik atuarfeqarfinni sulisussamik kommune atorfinitsitsiniarmat.

Meeqqat Illersuisuata ingammik nuannaarutigeqaa Qeqqata Kommunianik pitsaasumik suleqateqalernini, kommunemmi MIO suliamut malinnaaqqullugu qaaqqusimammagu