Inuusuttut ilinniarnissaat qulakkeerumallugu tatituunngortinneqassapput

Inuunermut piumassuseqalersitsinissamut atugarissaarnerullu nukittorsarneqarnissaannut kattuffiit kommunilu suleqatigiilerput. Inuusuttut arlaqarnerusut ilinnialernissaat qulakkeerumallugu, Maniitsumi nukiit maanna ataatsimoortinneqarput. Anguniakkap angunissaanut meeqqat inuusuttullu atugarissaarnerisa nukittorsarneqarnissaanut ilaatigut workshop-ertitsineq, inuusuttullu siunissami periarfissaannik kommunimi suliniutigineqarluni saqqummiisarnissaq aqqutissaapput. Suliniut Siunissaq, Peqatigiiffik Kalaallit Meerartai, suliniut Sapiik Qeqqata Kommuniatalu suleqatigiinnerisigut tamanna ingerlanneqassaaq.
1. februar 2018

Inuusuttut amerlanerusut ilinnialersinneqarnissaannut Maniitsumi nukiit tamarmik atorneqassapput. Taamaattumik Maniitsumi 9. klassini marluusuni atuartut periarfissaasa annertusarneqarnissaannut Suliniutip Siunissap kiisalu Peqatigiiffik Kalaallit Meerartaasa suliniutaata Sapiup akornanni suleqatigiilluarnissaannut, assigiimmillu avitassaannik Qeqqata Kommunia 213.000 koruuninik aningaasaleeqqammerpoq. Ilinniartitaanermut pisortap Anna Heilmann-ip, Atuarfik Kilaaseeqqamilu pisortap Elna Heilmann-ip illoqarfimmi ingerlatsiviit illoqarfimmiullu peqatigalugit, inuusuttut ineriartornissaminnut ilinnialernissaminnullu periarfissaasa ineriartortinneqarnissaannut, ukiorpaalunngortuni sulissuteqarnermikkut tunngavissilluarnikuuaat.

Maniitsumi Kangerlussuarmilu 9. klassimi atuartunut upernaaru workshop-ertitsisoqarnissaanut Suliniut Siunissaq, ukiumi missingersuusiorfiusumi aamma 330.000 koruuninik immikkoortitsinikuuvoq.
Suliniutip Siunissap inuusuttut atugarissaarnissaannik inuunermullu piumassuseqalersinneqarnissaannik suliniuteqarnerat ilutigalugu, inuusuttut siunissamut takorluukkaminnik oqaasertaliinissaannut tapertaasunik suliffeqarfinnut pulaartarnikkut, sammisassaqartitsisarnikkullu inuusuttut siunissami periarfissanik nittarsaassiffigisarlugit Peqatigiiffik Kalaallit Meerartaasa suliniut Sapiimmik suliniummik ingerlatsivoq.

Tamakku tamarmik illoqarfimmi sulisunit marluusunit ingerlanneqarput.
”Sapiik Maniitsumi nutaajuvoq, suliniulli taanna Kalaallit Nunaanni illoqarfinni allani ukiuni qulini ingerlanneqarnikuulluni. Tassanngaanniit illoqarfimmiunik suleqateqarnissami misilittagaqarluarpugut. Maniitsumi sulinissatsinnut qilanaarpugut, minnerunngitsumik tamatta qitiutitatsinnik kattuffiit oqartussallu suleqatigiittussaammata: kalaallit inuusuttut amerlanerusut aqqutissiuunneqarnissaat”, taama Peqatigiiffik Kalaallit Meerartaanni suliniummik aqutsisoq Nivé Heilmann oqarpoq.

Atuanngitsoortarnerpassuit inuttullu ajornartorsiutit
Suliniutip nutaap tunuliaqutaa ilungersunarpoq. Nalunaarusiap saqqummiuteqqammersup takutippaa, meeqqat atuarfiini angajullerni atuartut annertuumik atuanngitsuukulasartut. Atuarfimmi atuartunut ilinniartitsisunullu pitsaasumik toqqissisimanartumillu atuartitaanerup nukittorsarneqarnissaanut ingerlatsinikkut tamanna maannakkut allanngortinniarneqaleruttorpoq.
Siorna MIO-p nalunaarusiaani atuarneqarsinnaavoq, Qeqqata Kommuniani meeqqat inuusuttullu inuttut ajornartorsiuteqarlutik, angerlarsimaffimmilu persuttaaffiusumi toqqissisimananngitsumilu peroriartortut amerlavallaarujussuartut. Tamatumunnga suliniutinik ingerlatsinikkut, inuusuttut inuusuttoqatitik inersimasullu tatigisatik peqatigalugit toqqissisimasumik inuttullu peqatigiittarnissamut periarfissinniarneqarput.

Inuusuttut suleqatigalugit tapersersoqatigiinnikkut - aamma inuuneq ilungersunarsitillugu kisimiittutut, avataaniittutut ammullu isigineqartutut misigisimaffinni - toqqissisimasumik, tatigeqatigiinnertalimmik, pilersitsiviusumillu atuartitaanissap pilersinneqarnissaa sulissutigineqartarluni, Suliniummi Siunissami ingerlanneqartorpaaluit workshop-ertitsinerupput.

”Tapersersuisumik nukittuumillu inuttut attaveqarnitsigut, immitsinnullu tapersersornikkut, isumassornikkut, aaqqiissutissarsioqatigiinnikkullu inuunitsinni unamminarsinnaasut, aliasunnerit, anniaatit ersiornerillu qaangersinnaallugit paasissavarput. Inuusuttut naapertuilluarnissamik misigisarnerat, imminnut isumassortarnerat, tamallu inuunerissaarnissaannut tapertaalluartarnerat matumani tunngavigineqarpoq. Persuttaaneq atornerluinerlu inuusuttut naaggaarpaat, peqatigiilluarnissamillu pilersitsinissaq angerlugu. Maniitsumi 9. klassimi atuartut nukissaqarput, sanngisuujupput, takorluugaqarput, peqatigiillutillu atugarissaarusussuseqarlutik. Piumassuseqarput – pisinnaappullu”, taama suliniummi Siunissami ilisimatusarnermi akisussaasoq Peter Berliner, eqqumiitsuliortoq Tina Enghoff aamma atuakkiortoq Niviaq Korneliussen peqatigalugit suliniummut workshop-ertitsinissarpaalunnik pilersitsisimasoq oqarpoq.

Kalaallisut, ilaatigullu tuluttut ingerlanneqarluni workshop-ertitsineq Siunissaq ukuninnga imaqarpoq 1) nammineq misigissutsit, allallu misigissusii – isumassoqatigiinneq, imminullu isumassorneq, 2) atoqatigiinnikkut pisinnaatitaaffiit – persuttaaneq nakuusernerlu pinnagit ataqqinninneq nersualaarinerlu, 3) allanneq – oqaluttualiornikkut eqqumiitsuliornikkullu oqaasinnguisinnaaneq, illuatungerisallu oqaluttuaanik tusarnaarsinnaaneq, 4) inuunermi, illersorneqarsinnaanermik, isumannaatsuunissamik ilinniarnissamullu, kulturimut siunissamullu pisinnaatitaaffinnik takutitsineq – assit atorlugit, 5) ataqqinnissuseqarluni ilumoorsaartumillu oqaloqatigiinnikkut aaqqiagiinngissutsinik eqqissilluni pitsaasumillu aaqqiissuteqarsinnaaneq. Suliniutip ersarissuutinneqarnissaa pingaaruteqarpoq. Suliniutip ukiuni pingasuni ingerlasimanerani inuusuttut suliarisimasaat Katuami septembarimi takutinneqassapput. Tassani Maniitsumit assit / allaaserisat aamma ilaatinneqassapput.

Workshop-ertitsineq siulleq siunissamut isumallualersitsivoq
Maniitsumi suliniummik ataqatigiissaarisoq Anna Heilmann oqarpoq: ”Siunissap siullermeertumik worlshop-ertitsinerani inuusuttut piumassuseqarluarlutik saqqummerlutik persuttaasarnermut akerliullutik tamanut ammasumik innuttaasunik ataatsimiisitsinerat nuannaarutigingaarlugu takuarput. Inuusuttut ineriartornissaminnut, ataqqeqatigiinnissamullu pisinnaatitaaffimminnut tunngatillugu inuusuttutut imminnut tapersersoqatigiissinnaallutik, tusarneqarsinnaallutillu takutippaat”.
Siunissaq aamma Peqatigiiffik Kalaallit Meerartai kiisalu Maniitsumi atuarfik ingerlatsivillu inuusuttunik qanimut suleqateqarlutik, kikkut tamarmik ineriartornissamut ilinnialernissamullu periarfissaqarluarnissaat

sulissutigaat – inuuneq ilungersunarseqqagaangat persuttaaneqanngitsumik, nakuuserfiunngitsumik kiserliorfiunngitsumillu inuuneqarneq. Kikkut tamarmik nukii atorlugit toqqissisimanartumik pitsaasumillu ataatsimoornissaq, peqatigiillunilu ilungersunartut akiorneqarnissaat kiisalu tulluusimaarluni inuunermillu nuannarisaqarluni ineriartorsinnaanissap qulakkeerneqarnissaa kiffaanngissuseqarfiginissaalu anguniarneqarpoq.

Siunissap workshop-ertitsisarnissaa, suleqatigiinnikkut ilinniartitsinikkullu Kalaallit Nunaannut siaruarneqassaaq.

Suliniut Siunissaq Bikubenfonden-iminngaanniit annertuumik aningaasaliiffigineqarnermigut, suliniuteqarnermi ilisimasat Kalaallit Nunaanni siaruartitsinissaminut suli ukiut marluk periarfissaqarpoq. Taamatut suliniuteqarnermi Maniitsumi suleqateqarneq assersuutissaqqissuuvoq. Namminersortut, pisortat namminnerlu kajumissutsiminnik sulisut akornanni akimortumik suleqatigiinnerisigut isumaginninnikkut nutaaliornissaq pillugu (socialt entreprenørskab) Ilisimatusarfimmi aamma ilinniartitsinikkut tamanna tapertaqartinneqarpoq. Tamanna februarimi aallartinneqassaaq.

”Ukiut pingasut ingerlanerini Siunissap pingaartumik illoqarfiit marluk, Tasiilaq Nanortalillu immikkut samminikuuai. Suliniuteqarnermi workshop-ertitsisarnerit, iliuutsit, ilisimasat suleriaatsillu ukiuni tulliuttuni marluusuni Kalaallit Nunaanni illoqarfinnut/nunaqarfinnut, Kalaallit Nunaannilu ilinniartut akornanni siammarterneqarnissaat anguniagaavoq. Qeqqata Kommuniata annertuumik tapersersuineratigut piumassuseqarluarneratigullu, ilinniarfissuarmilu ingerlatsinitsigut anguniagarput angujartuaarparput. Ikorfartuisoqartitsineq pillugu Peqatigiiffik Kalaallit Meerartaanik suleqateqarnikkut, workshop-ertitsisarnikkut suliniutip nukittorsarneqarnissaa qulakkeerneqassaaq. Tamanna sumiiffinni allani aamma atuutsilersinneqarnissaa kissaatigeqaarput”, taama Siunissami suliniummik aqutsisoq Anette Molbech oqarpoq.

Ukunani annertunerusumik paasisaqarit www.siunissaq.gl aamma www.fgb.dk/sapiik

Apersuinissamut, annertunerusumillu paasisaqarnissamut:

Elna Heilmann, atuarfimmi pisortaq, Maniitsoq, elhe@qeqqata.gl + 299 81 75 22.
Nivé Heilmann, suliniummik aqutsisoq, Peqatigiiffik Kalaallit Meerartai, nnh@fgb.dk, + 299 534 370
Anette Molbech, Suliniummik aqutsisoq, Suliniut Siunissaq anette@plottet.dk / +45 23231787