Sisimiuni nuannaarneq

- Ilinniartut nutaat tikilluaqqunissaannut qilanaarpugut. Sisimiut Qeqqata Kommunialu kulturimik, timersornermik sunngiffimmillu eqeersimaartumik ingerlatsinissaminut, meeqqerivinnilu inissaateqarnissaminnut piareersimapput, taama Qeqqata Kommuniani borgmesteri Malik Berthelsen, Sisimiuni Issittumi aalisarnerup iluani ingeniørinngorniarfimmi nutaami 2019-imi ilinniartuuteqalernissaminnik DTU nalunaaruteqareersorlu, oqarpoq.
12. april 2018

Aalisarnerup iluani ingeniørinngorniarneq nutaaq borgmesterip tikilluaqquaa 

- Ilinniartut nutaat tikilluaqqunissaannut qilanaarpugut. Sisimiut Qeqqata Kommunialu kulturimik, timersornermik sunngiffimmillu eqeersimaartumik ingerlatsinissaminut, meeqqerivinnilu inissaateqarnissaminnut piareersimapput, taama Qeqqata Kommuniani borgmesteri Malik Berthelsen, Sisimiuni Issittumi aalisarnerup iluani ingeniørinngorniarfimmi nutaami 2019-imi ilinniartuuteqalernissaminnik DTU nalunaaruteqareersorlu, oqarpoq.

- Nutaarsiassatsialaavoq – Sisimiunuinnaanngitsoq, Kalaallit Nunaannulli aamma. Avammut nioqquteqartarnermi, inuutissarsiutinilu ineriartortitassani nunami pingaarnerit iluini ilisimasaqarluartunik qaffasissumik nammineq ilinniartitsisinnaanissarput pingaaruteqarpoq, Malik Berthelsen isumaqarpoq.

Tassunga atatillugu Ilinniarfiup nutaap Sisimiunut inissinneqarnera tulluarpoq. Aalisarnermut tunngatillugu illoqarfiup oqaluttuarisaanera ilinniartunut naleqqulluinnarpoq – atuagarsornermiillu suliassat suliarineqarnissaannut periarfissarpassuaqarluni.

Issittumik Teknologi-mi ilinniarfik, Kalaallit Nunaanni nunanilu allani ingerlanneqartartoq Sisimiuniippoq. Ilinniarfik taanna aalisarnerup iluani ingeniørinngorniarfimmut nutaamut aamma isumassarsiorfiuvoq. Ilinniartut Sisimiuni ukiup aappaa avillugu ilinniaqqaartassapput. Taassuma kingorna ukioq ataaseq Danmark-imi DTU-p Lyngby-mi, Ballerup-imi Hirtshals-imiluunniit campus-iani pikkorissartassapput. Ilinniarnerup ingerlanerani ukiup aappaa avillugu kingulleq suliffimmi misiliinermut, nammineq toqqakkani pikkorissarnissamut, inaarutaasumillu suliaqarnissamut atorneqassaaq. Piffissami tassani Kalaallit Nunaanniiginnartoqarsinnaavoq.

- Arktisk Teknologi-mi ilinniarfimmi ilinniartitsinermi iluserineqartoq ingerlalluarpoq, iluserlu taanna aallaavigalugu ilinniarfimmik nutaamik neqerooruteqarnissatsinnut piffissanngorpoq, maannali aalisarnerup iluani pisariaqartinneqartut aallaavigissavagut, taama DTU Byg-imi pisortaaneq, aammali Center for Arktisk Teknologi-mi (ARTEK) aamma DTU-p issittumi suliaannik ersarissaanerussalluni centerimi nutaami Arctic DTU-mit pisortaanerusoq Niels-Jørgen Aagaard nassuiaavoq.

DTU-p taamanilu Namminersornerullutik Oqartussat suleqatigiinnerisigut, Issittumi Teknologi-mi diplomingeniørinngorniarfik 2000-imi pilersinneqarpoq. Taamanerniilli ilinniarfik taanna Sisimiuni inissisimalluni inuiaqatigiinni kalaallini ilinniarfinngorpoq, taamanerniillu diplomingeniørit 100-t tungaannut ilinniarnerminnik naammassinninnikuullutik.

2016-imiit aamma civilingeniørinngorniat kandidatinngorniarnermi ilaa, DTU-p upernaakkut Sisimiuni Arktisk Semester-eqartitsineranut atatillugu Kalaallit Nunaanni ingerlassinnaanngornikuuaat.
Manna tikillugu Issittumi Teknologi-nngorniarfimmi diplomingeniørinngorsimasut taakku 100-t missaanniittunit 70 procentit missaaniittut Kalaallit Nunaanni suliffeqarput. Diplomingeniørit suliffissaaleqineq ajungajapput. Aalisarnerup iluani diplomingeniørinngortussat inuutissarsiorfinni taamatulli atorfissaqartinneqarluassasut naatsorsuutigineqarpoq.

Ilinniarfimmi nutaami immikkut sammineqartussat sisamaapput: uumassusilerineq/imaani uumassusilerineq, aalisarneq pillugu teknologi kiisalu aalisakkanik qalerualinnillu nakkutiginninneq pitsanngorsaanerlu. Ilinniarnermi aamma nutaaliorneq entreprenørskab-ilu immikkut sammineqassapput.