Tuluttut ilinniartitsisut nammineq videoliatik atorlugit imminut isumassarsiorfiginerat

Qeqqata Kommuniani ilinniartitsisumiit-ilinniartitsisumut-videoliat tuluttut aallarterlaanut atuartitsisunut nukittorsaataavoq
10. april 2018

Sapaatip akunnera 14-imi ilinniartitaanermut aqutsisoqarfik Sisimiuni videoworkshop-ertitsivoq. Workshop-ertitsinermi peqataasut katillugit aqqaneq-marluupput. Sisimiut aamma Maniitsup atuarfiini atuartunut nukarlernut, akullernullu tuluttut ilinniartitsisut assigiinngitsut kiisalu ilinniartitsisut siusinnerusukkut suleriaatsinik videoliornermik workshop-ertitsinermi peqataasimasut peqataapput.
Ullut pingasut ingerlanerini tuluttut atuartitsinermik aallarterlaanut assersuutit atorlugit ilinniartitsisut marlukkaarlutik videoliorlutik suleqatigiipput. Ilinniartitsisumiit-ilinniartitsisumut videoliat taakku nukalarlerni atuartunut tuluttut ilinniartitsissunut allanut isumassarsiorfiusinnaapput, tassani videoliaaqqatigut nammineq qanoq atuartitsisinnaanissaminnut isumassarsiorfigisinnaallugit.
Arfininngornermi apriilip 7-iani workshop-ernermi peqataasut videoliaminnik aqqaneq marluusunik takutitsipput. Videoliaaqqani takutinneqartuni 1-5 klassini aallarterlaatut tuluttut atuartitsinermi sammisaqartitsinerit assersuutit takutinneqarput. Videoliat assigiinngissuteqangaatsiarput, ilaat atuartunik nukarlernik tuluit oqaasiinik ilinniartitsinermi, erinarsuutit qitinnerillu qanoq atorneqarsinnaanerinik assersuutinik takutitsipput. Videoliat ilaanni atuartut nukarliit marlukkaarlutik namminneq imminnut tuluttut apersorlutik suleqatigiissinnaanerannik assersuusiorsimapput. Pingajuani atuartup ataatsip tuluttut atuarnerani, atuaqatigiit tamarmik suleqatigiillutik oqaatsit titartakkamut naleqquttut nassaariniartaraat takutinneqarpoq.
Workshop-ertitsinermi anguniarneqarsimavoq, nukarlerni tuluttut atuartitsinerup nuannersuunissaanut pinnguarnertaqarsinnaaneranullu, videoliat atorlugit peqataasunut sakkussanik tunniussinissaq. Ilinniartitsisunut tuluttut aallarterlaanut atuartitsinermi workshop-ertitsineq, ilinniartitaanermut aqutsisoqarfiup ingerlataasa ilagivaat. Aallarterlaanut atuartitsinermi attaveqaqatigiittarneq matumani sammineqarpoq, ilinniartitsisoq atuartullu tuluttut imminnut oqaluutiinnangajallutik, aammalu pinnguarnikkut, erinarsornikkut sungiusarnikkullu oqaatsinik ilinniarnermik ingerlatsisarnissaq.
Kalaallit Nunaanni kommunini Qeqqata Kommunia siullersaalluni 1. klassimiit tuluttut atuartitsisarneq ingerlanneqartalerpoq.
Maannakkut tuluttut aallarterlaanut atuartitsineq sammineqarnerulluni ingerlanneqarpoq. Tunngaviatigulli meeqqat atuarfianni atuartitsissutini tamani nikeriarfinnilu tamani, ilinniartitsisumiit ilinniartitsisumut videoliat atorneqarsinnaapput. Siunissamut isigaluni Ilinniartitaanermut aqutsisoqarfik susoqarnissaanik maannamut suli aalajanginngilaq, neriuutaavorli Kalaallit Nunaanni ilinniartitsisut tamarmik videoliaaqqat atorlugit misilittakkanik avitseqatigiittarnissaat.
2016-ip ukiaagaa suleriaatsinik videoliorneq aallarteqqaarneqarpoq. Qeqqata Kommunia aamma ilinniartitaanermut aqutsisoqarfik marloriarlutik 2016-imi septembarimi aamma 2017-imi marsimi workshop-ertitsipput, tassani meeqqat atuarfianni nikerarfinni pingasuusuni ilinniartitsisut tamarmik, atuartitsinerminni iPad-i qanoq atortarnerlugu videoliaaraliorsinnaanerminnik ilinniartinneqarput.
Workshop-ertitsineq Nicolai Seest-imit suliffeqarfimmit & Learning-meersumit aqunneqarpoq, taanna aamma siusinnerusukkut ilinniartitaanermut aqutsisoqarfimmiit Brita Toft Hyldgaard suleqatigalugu workshop-ertitsinermik ingerlatsisuuvoq.

Videoliornermut sakkussanut ilitsersuut uani takuneqarsinnaavoq: https://youtu.be/OEp422Pey2k

Iliniartitsisumiit-ilinniartitsisumut-video assersuut aana: https://youtu.be/7E-wOXLuq5I