Nuannaarutiginnillunilu pakatsineq.

Nuannaarutigeqaara Inuit Ataqatigiit Kangerlussuup mittarfissuartut ataannarnissaa piumasarimmassuk.
Tassami mittarfissuit pilersinniarneqarput takornariaqarnerup annertusarnissaa kissaatigineqarmat. Taamaattumik imminut assortuunneruvoq takornariaqarnikkut mittarfik ingerlalluartoq sulilu annertusarneqarnissaminut periarfissagissaartoq atorumaneqanngippat.
13. september 2018

Taamatuttaaq iluarisimaarparput mittarfissuarnut pilersaarutinut Kangerlussuup ilanngunneqarnissaa IA-mit siunnersuutigineqarmat, naak angallanermut Naalakkersuisup oqariartuutigigaluaraa Kangerlussuaq aatsaat aaliangiivigineqarumaartoq Nuuk Ilulissallu paasinarsippata suneqassanersut.

Angallannermut Naalakkersuisup taamatut oqariartuuteqarnera soorunami pakatsissutigivara, aammalu Qeqqani inuussutissarsiornikkut ineriartoqataarusunnerput allanit soqutaannginnerusutut naliliinertut paasillugu.

Tassami augustimi Simon Simonsenilu ataatsimiinnitsinni, Kangerlussuup siunissaa pillugu suleqatigiissitamik pilersitsinissatsinnik isumaqatigiissuterput sumut atussavarput, suleqatigiissitap suliaa Naalakkersuisut atorfissaqartinngippassuk?

Kangerlussuaq amerlasuunit asuli akunnittarfiinnartut isigineqaraluartoq, tassaavoq misigisassarsiorlutik takornarianit soqutigineqarluartoq aammalu timmisartorsuup tamatigut missinnaaneratigut, nunatsinnut umiarsuarnik takornariartaatinut pingaarutilimmik inissisimasoq. Sulilu isumalluarfigineruvarput Aasivissuit-Nipisat, UNESCO-ip allattorsimaffiannut ilanngunneqarnerani suli annertunerusumik orniagarneqarnerulernissaa.

Taamaattumik IA nersualaarusuppara Kangerlussuup nunatta pisariaqartikkaa takusinnaammassuk, upperalugulu ineriartorteqqinneqarnissaa periarfissagissaartoq.

Malik Berthelsen
Borgmesteri
Qeqqata Kommunia