Ilaqutariit kajumissaatitut akissarsitinneqartut

Ilaqutariit Maniitsormiut anaanartik utoqqalilluni napparsimasoq paarissallugu akisussaaffimmik tigusisimammata, qanittumi kajumissaatitut akissarsitinneqarput
5. november 2018

Johanne Skifte-p anaanaa, Bolethe Berthelsen, ukioq manna juunimi nappaat Parkinson nappaatigilerpaa. Kinguneri arnamut 83-inik ukiulimmut sakkortusimaqaat, ilaqutaasunummi aamma.  Bolethe-p iisartakkat sakkortuut aallartippai, arriikkaluamik avaqqunneqarsinnaanngitsumilli eqqarsaatit nakkangarujussuarnermut assingusinnaasut takkukkiartorsimapput.

-Anaanaga inuttut nakkarpoq. Nappaatini peqqutigalugu nukimmigut naggussamigullu anniarujussuartarluni.  Tamatuma saniatigut quumi aqqutaatigut aseruuttoorujussuartarpoq ajorsisaataasunik, Johanne Skifte oqaluttuarpoq.

Ilaqutariit arlaleriarlutik nakorsiuttarpaat. Naggataatigut Bolethe ajungaarami unitsinneqartariaqarsimavoq. Qiaannaavilerluni anniangaarami. Ilaquttaminullu napparsimavimmiit qimaqqunani.  Johanne-mut ilaqutaasunullu tamanna aqqusaassallugu atornarsimaqaaq.

-Tassani ilaqutariiusugut tamatta isumaqatigiippugut sapinngisarput tamaat atorlugu tapersersortariaqarlugu. Qujanartumik ataqatigiilluartuugatta. Anaanaga kisimiittuuvoq ilaannikkullu kiserliorsinnaasarluni, taamaammat aperaara uagutsinnut nuukkusunnersoq, Johanne oqaluttuarpoq, taassumammi aamma anaanani paasitittuartarsimavaa ilaquttaminit ikiorneqartuartassasoq tapersersorneqartuassasorlu.

Akisussaaffimmik nammineq tigusineq

Anaanaasoq qujavoq taamaalivorlu. Bolethe piffissap ilaani panimmini najugaqarpoq, ullullu tamaasa ingerlanerini pitsaaneruleriartorluni.

-Qujanartumik qatanngutinniit ilaqutatsinniillu allaniit ikiorneqarluarpunga qaqugukkuugaluarnersoq alakkartaramikku. Nammineq sukkassutsini atorlugu pitsanngoriartornera ingerlatipparput.  Arlaannut aalajangersimasunut kajumissaartanngilarput, massakkulli inissisimanera ataqqillugu, ajunngitsumillu ingerlaleqqinnissaminut piffissaq atugassani nammineq atussammagu.  Naapinneqartutut paasineqartutullu misigisimanini aamma iluaqutigigunaramiuk, Johanne oqaluttuarpoq.

Bolethe assorsuaq pitsaanerulerpoq eqqiaallunilu uffartaleqqilluni allaat, naggataatigullu nammineq iniminut angerlaqqikkusulerluni. Ullumikkut ajunnginneruleqqinnikuuvoq suliarisarnikuusanilu suliarisaleqqinnikuullugit.

-Uagut ilaqutariiusugut isumaqarnikuuvugut ikiortissamik nilliaannarnata utaqqiinnarnataluunniit nammineq iliuuserisinnaasat suunersut eqqarsaatigissallugit pingaaruteqartoq. Namminerlu iliuuseqarluni. Uagutsinnut pingaarnerpaanikuuvoq anaanatta nuannaarnissaa misigisimassasorlu anaanarput pillugu maaniittugut, naluarpummi utoqqartatta qaqugu qimassaneraatigut.  Utoqqartatsinnilu kiserngorunnikuulluni, Johanne oqarpoq.

Bolethe-p Johanne-kkunnut nuukkallarnissaanut tunngatillugu kommunip paasinnilluni pinikuunera aamma ilaqutariinnut oqilisaataasimaqaaq. (Bolethe utoqqarnut najugaqarfimmi najugaqarpoq).

Ilaqutariit namminneq iliuuseqarnissaat pingaaruteqarpoq

Maniitsumi angerlarsimaffimmi ikiortit maluginiarsimavaattaaq Bolethe panikkunimi najugaqareernermi kingorna qanoq ilorfaallassimatiginersoq, nalinginnaasumillu ilaquttaminiit tapersersorneqartarnera. Taamaammat angerlarsimaffimmi ikiortit ilaqutariit kajumissaatitut akissarsitinneqarnissaannut innersuussimavaat, namminneerlutik kingusinnerusukkut Johanne-mut tupaallassimaqisumut tunniukkiartukkaminnik.

- Tamanna naatsorsuutiginngilluinnaraluarparput. Anaanatta paarinissaa taamaattussaannartut isigaarput, taamatulli nersualaarneqarneq assorsuaq nuannerpoq, Johanne oqarpoq.

Akissarsititsissutigineqartut tassaapput koori nerisassanik imalik diplom-ilu, angerlarsimaffimmilu ikiortit ningiuata suleqatini peqatigalugit qullersaasullu ilaqutariinnik akissarsisitsinissaq isumassarsiarisimavaat.

-Ulluinnarnimi utoqqaat sullitaraagut, ilaqutaasut ulluinnaanni peqataaleraangata nuannaarnerulerlutillu toqqissisimanerulertartut ilisimavarput.  Utoqqarpassuaqarpoq kiserliortunik, ilaquttaminnulli immaqa inuunerannut akornuseerusunnatik oqarusunngitsut, Maniitsumi angerlarsimaffimmi ikiortit ningiuat Amalie Rosing oqarpoq.

- Tamanna ilutigalugu ilaqutariit/inuit piffissaqarunik nukissaqarunillu utoqqartaminnik isumaginninnerulernissaannik, pulaakulanerulernissaannik assigisaannillu kajumissaarusuppavut. Utoqqaat nuannarisartorujussuuaat, Amalie unnersiorpoq.

Bolethe angerlaqqereermat ilaqutaasut kommunimut saaffiginninnikuupput apeqqutigalugulu angerlarsimaffimmi ikiortiniit pulaarneqakulanerulersinnaanersoq, qujanartumillu taamaaliorsinnaasimapput.

Angerlarsimaffimmi ikiortit ilaqutariinnik akissarsititsisarnissaq ukiut tamaasa ingerlanneqartalernissaa sulissutigaat.