Aasivissuit - Nipisat UNESCO-mut suliniummut aqutsisunngortoq

Qeqqata Kommuniani UNESCO-mut suliniummik aqutsisutut, 2019-imi februaarip aallaqqaataani Paninnguaq Fleischer-Lyberth atorfinippoq.
7. februar 2019

Paninnguaq Tilioq-mi atorfeqareerluni atorfinippoq - siornatigullu ilaatigut Aasivissuit - Nipisat nunarsuarmioqatigiinnut kingornussassanngortinneqarnissaa pillugu qinnuteqaasiornissami suleqatigiissitami suleqataalluni, qinnuteqarnissallu suliarineqarnerani innuttaasunik ataatsimiisitseqataasarluni Qeqqata Kommuniani Atuilluartuunissaq pillugu siunnersortitut atorfeqarnikuuvoq, taamaattumillu Aasivissuit - Nipisat, tassungalu suliniut ilisimasaqarfilluarlugu.

Inuit-piniariartarfiat-kulturikkut nuna Aasivissuit–Nipisat, 2018-p aasaanerani UNESCO-p nunarsuarmioqatigiinnut kingornussassanngortitaasa allattorsimaffiannut ilanngunneqartoq Paninnguup ineriartortissavaa, nunarsuarmioqatigiinnullu kingornussassanngortitamik ingerlatsinermi siuttuullunilu, Park ranger-itut atorfinittussaq suleqatigalugu kulturikkut nunap Nunarsuarmioqatigiinnut kingornussassanngortitat allattorsimaffiannut ilanngutsinneqarnerani pingaartitat illersorneqarnissaat aqussallugu.

Ilutigalugu Paninnguup Sisimiuni Katersugaasivik aamma Arctic Circle Business (ACB) suleqatigalugit, Inuit-piniariartarfiat-kulturikkut nuna Aasivissuit–Nipisat pillugu paasissutissiisarnissami ingerlatitseqqiisarnissamilu siuttuussaaq, ilutigalugulu Nunarsuarmioqatigiinnut kingornussassanngortinneqartoq pillugu tusagassiorfinnut pisortatigoortumik attaveqaataassalluni.

Paninnguup siullertut Kangerlussuarmi Sarfannguanilu, Nunarsuarmioqatigiinnut kingornussassanngortinneqartup killeqarfiata iluani innuttaasuusut, Sisimiunilu innuttaasut, atuarfiillu akuutissavai, soorluttaaq aqutsisoqatigiinnut, kiisalu Inuit-piniariartarfiat-kulturikkut nunamut tunngatillugu pisortatigoortumik tikeraartoqartarnerni ataqatigiissaarisuussasoq.

Sisimiut Kangerlussuullu akornanni Aasivissuit – Nipisat 4.000 kvadratkilometerit missarluinnaanik angitigaluni, ukiut 4.500-t matuma siorna inuit Kalaallit Nunaannut nunasisimallutik siulitsinnit, ullutsinniillu eqqaassutissarpassuaqarlunilu illukorpaaloqarpoq.

Kingornussassanngortinneqarneratigut ACB, Visit Greenland, Sisimiuni Katersugaasivik, Nunatta Katersugaasivia kiisalu Kalaallit Nunaanni UNESCO-p nunarsuarmioqatigiinnut kingornussassanngortissimasai suleqatigalugit misigisassaqartitsinissaat, ingerlatitseqqiisarnissamilu pilersaarusiaq suliarineqassapput. Taamaalilluni nunap immikkoortortaanut takornarissanik soqutiginnilersitsinissami tikinneqarsinnaassusaa paasissutissiisarnissarlu pingaaruteqarput, Paninnguarlu suleqatigalugu suliassat suliarineqarnissaannut qilanaarluta.

Qeqqata Kommuniata Paninnguaq Fleischer-Lyberth tikilluaqquaa, sulilluarnissaanillu kissaallugu.

 

Paasissutissat sukumiinerusut

Laust Løgstrup
Kommunimi pisortaanerup tullia, Aasivissuit - Nipisat-llu pillugit aqutsisoqatigiinni siulittaasoq
laul@qeqqata.gl

Imaluunniit,

Paninnguaq Fleischer-Lyberth
UNESCO Site manager
panf@qeqqata.gl