Qeqqata Kommuniani aaqqissuussaanikkut allannguutissat annikitsuinnaapput. Naak arlalissuartigut naleqqussaanerit allanngortitsinerillu pisimagaluartut, ullumikkut Maniitsup Kommuneani imaluunniit Sisimiut Kommuneani allannguutit innuttaasunit annertunerusumik malugineqassanngillat. Pingaarnerusussarli aana, kommuni januaarip 1-aniit 2009-mi Maniitsumi Sisimiunilu taakkulu nunaqarfiini tamani Qeqqata Kommunianik taaguuteqalissammat. Nunaqarfiit, januaarip 1-aniit 2009-mi arfinilinngortussapput, tassalu Kangaamiut, Sarfannguit, Napasoq, Itilleq, Atammik aammalu Kangerlussuaq.

Allannguutimmi qanoq malugissavavut, qularnanngitsumik innuttaasorpaaluit taama apererusussapput. Innuttaasut kommunimut saaffiginnikkunik, periusitoqqat atorlugit kommunimut saaffiginninnerat ingerlasassaaq. Kommunimut sianeraanni, taava Qeqqata Kommunianut tikilluaqqusisoqassaaq. Tamannalu Maniitsumut, Sisimiunut nunaqarfinnilu allaffiinut arlaannulluunniit sianeraanni pisassaaq.

Taamaammat innuttaasut annertunerusumik allannguummik malugisaqassanngillat, tassami januaarip 1-aniit 2009-mi kiffartuussinerit pisarnertut ingerlanneqassammata.

Allaffeqarfimmi aaqqissuussineq
Qullersaqarfik – Aaqqissuussinermi Qitiusutut inissisimassaaq kommunimi pisortaaneq pisortallu marluk, tassa Aningaasaqarnikkut, Teknikkimut Avatangiisinullu Pisortaq –aningaasaqarnermut kiisalu teknikkimut avatangiisinullu tunngasutigut akisussaasoq – kiisalu Ilaqutariinnut Ilinniartitaanermullu Pisortaq – ilaqutariinnut ilinniartitaanermullu tunngasutigut akisussaasoq. Pisortat taakku pingasuusut Qeqqata Kommuniani nutaamik immikkoortortamik pilersitsissapput, tassalu qullersaqarfik. Kommunemi pisortaaneq ullumikkut isumagisassarisani isumagissavai, tassalu: Sulisoqarnermi allaffeqarfik, allatseqarfik, nutserisoqarfik, inuutissarsiutitigut siunnersuisoqatigiit, nunaqarfinni allaffeqarfiit kiisalu Maniitsumi Sisimiunilu pisortaanerup sulisui. Qullersaqarfik Sisimiuni inissinneqassaaq.

Immikkoortortani pisortat
Ullumikkut ingerlatsivinni pisortaasut kommunimi nutaami immikkoortortani pisortaalissapput, tassa immikkoortortanut pisortaassagamik siusinnerusukkut ingerlatsivinni pisortaagaluarlutik. Immikkoortortani pisortat suliassaat inissisimaffissaallu massakkutuulli issapput:
·    Aningaasaqarnermut tunngasut (AT)
·    Teknikkimut avatangiisinullu tunngasut (TAT)
·    Ilinniartitaanermut tunngasut (IT)
·    Ilaqutariinnut tunngasut (ILT)

Taamaammat innuttaasut januarip 1-aniit 2009-mi kommunimut ullumikkut pisarnertuut saaffiginnittassapput. Maniitsumi, Sisimiuni nunaqarfinnilu kommunimut saaffiginninnermi periarfissat taakkuujuassapput:
·    Maniitsumi Sisimiunilu saaffiginnittarfiit
·    Nunaqarfinni allaffeqarfiit
·    Teknikkimut Tunngasut (massakkumut Teknikkimut Avatangiisinullu ingerlatsivik)
·    Ilaqutariinnut Tunngasut (massakkumut Isumaginninnermut Ilaqutariinnullu ingerlatsivik)
·    Ilinniartitaanermut Tunngasut (massakkumut Meeqqanut Kulturimullu ingerlatsivik)

Oqarasuaatit normui, fax-normui, mail-adresse aamma quppersakkat adresse ukuussapput:
Oqarasuaat. (+299) 70 21 00
Fax. (+299) 70 21 77
Mail: Adresset tamarmik ima allanngortinneqassapput ****@maniitsoq.gl imlt. ****@sisimiut.gl uunga:
****@qeqqata.gl
Quppersakkat adr.: www.qeqqata.gl

Meeqqerivinni, atuarfinni paaqqinnittarfinni kommunillu immikkoortuini allani ulluinnarni ingerlanerit ullumikkutuulli ingerlaannassapput.

Politikkikkut aaqqissuussineq
Politikkikkut aaqqissuussinerit allannguuteqarput, tassa imaaleramik:
·    Kommunalbestyrelsi
·    Aningaasaqarnermut ataatsimiititaliaq
·    Ataatsimiititaliat – arfineq-marluk

Kommunimi pisortaanerup pisortallu marluk kommunalbestyrelsi, aningaasaqarnermut ataatsimiititaliaq ataatsimiititaliallu arfineq-marluusut kiffartuutarilissavaat.

Sipaarutissat
Kommunerujussuanngornermi iluaqutissaq tassaavoq, kommunip annertunerulerneratigut ingerlatsinikkut iluaqutissartaasut assigiinngitsut, tamakkulu ilagalugu allaffissornikkut piffissami aggersumi atorfiit 16-it sipaarutigineqarsinnaanissaat, tassalu sulisut tamakkerlugit 10 procentiisa nalingat. Tamanna tassanngaannaq pisussaanngilaq, tassa soraartoqartarneri aqqutigalugit pisussaagami. Tamakku saniatigut taama annertusinissap arlalissuartigut iluaquteqarnissaa naatsorsuutigineqarpoq.