Asimioqarfimmit nunaqarfimmut
Sarfannguit, januaarip aallaqqaatani 2009-mi 107-nik innuttaasulik, Sisimiunit 40 kilometer-init kangisitsigisumiilluni nunamut qanilluni qeqertamiippoq. Nunaqarfik 1843-mi saarullinniarfittut pilersinneqarpoq, 1850-imilu nakkutilliisumut sulisunullu illoqarluni, orsiveqarlunilu asimioqarfinngorpoq.

Qanga nunaqarfiit nunarsuarmioqatigiinnut avinngarusimagallarmata asimioqarfinnik taasarsimavaat, ullutsinnili Kalaallit Nunaanni nunaqarfiit allat assigalugit Sarfannguit nunarsuarmioqatigiinnut akulikitsumik immakkut attaveqaatikkut attaveqartarluni ingerlalluarpoq.

Nunaqarfimmi illut qalipaatigissaaqisut alinaaqalutik qaqqajummami siammarsimapput, nunamiillu Sarfannguit qeqertaannut ikaarniartilluni ikerasak amitsoq aqqusaagassaavoq.

Ikerasak amingaarami nalinginnaasaumik nunamiit nunaqarfimmiunut nillialluni tusaaneqarsinnaasarpoq, tassuugulu qeqertamukaatsinnissarnut aatissaatit.
 
Imaq isertitaqaateqarfittut
Nunaqarfimmi aalisakkerivimmi suliareqqaarneqartarlutik pingaarnertut aalisarneq inuutissarsiutigineqarpoq. Aalisakkerivimmi saarulliit, qeeqqat, nipisaat suaat suluppaakkallu tunisassiarineqartarput, tassanngaanniillu suliffeqarfimmit Arctic Green Food-imit avammut nioqqutigineqartarlutik.

Nalinginnaasumik nunaqarfimmiut aalisakkanik puisinillu kiisalu tuttunik umimmannillu imminnut pilersortuupput.

Arctic Circle Trail Village
Ulluinnarni pisiassanik nioqquteqartarluni KNI - Pilersuisoq nunaqarfimmi pisinniarfiuteqarpoq. Kangerlussuarmiit Sisimiunut pisunnermut The Arctic Circle Trail-imut peqataasut pisunnerminni apuunnissaminnut tassani nerisassarsiniarnissaminnut periarfissaqartarput, nalinginnaasumillu pisuffik kujapparnerullugu pisuttunut Sarfannguit uniffigissallugu soqutigineqarluartarpoq.

Oqarasuaatinut angallattakkanut oqarasuaatinullu napparussuit nunaqarfimmi napparneqarnikuupput, tamatumalu saniatigut internetertoqarsinnaasarluni.