Ukiut 250-it sinnilaarlugit. Taama sivisutigisumik illoqarfik Sisimiut Nasaasaap ataaniissimavoq. 
 
Niuertoqarfik ineriartortoq
Ullumikkut Kalaallit Nunaanni illoqarfiit annersaata tulleraa, 1756-imili Amerloq-mi innuttaasut amerlasimanngillat, tassaasimallutillu europamiut arfanniartartut ajoqersuiartortitallu kiisalu inuit nunasisimasut kinguaavi piniarnermik aalisarnermillu inuutissarsiuteqartut.
 
Siullertut sanaartorfiusimasoq tassaavoq maannakkut Sisimiunit 30 kilometerit missaannik avannarpasitsigisumiittoq Sydbay, arfanniat nunaqarfigisimasaat. Nunaqarfilli nunamut piukkunnarnerusumut nuunneqarpoq, oqaluffimmik pilersitsisoqarpoq, illoqarfik tunngavilerneqarpoq, kingornalu Sisimiut ineriartorluni 6000-t angulaarlugit innuttaasoqalerluni.

Kalaallit Nunaata kitaani qitiusoq
Sisimiut Kalaallit Nunaanni illoqarfiit annersaata tulleriinnarnagu, inuutissarsiutitigut ilinniarfinnut ineriartortitsinernullu aamma qitiuvoq. Ingerlalluartumik umiarsualiveqarluni, annertuumik aalisarfiulluni amerliartortunillu takornariaqarluni, Sisimiut illoqarfiuvoq innuttaasut eqeersimaaneratigut nunarsuarmioqatigiillu sunniuteqaqataanerisigut pissutsinut malinnaasoq.

Aalisarneq illoqarfimmi pingaarnertut inuutissarsiutigineqarpoq, aalisariutillu annerit arlallit kiisalu kilisaatit annerit minnerillu illoqafimmi umiarsualiveqarlutik. Pingaartumik raajat, assagiarsuit saarulliillu aalisarneqartarput, taamatuttaarli aaffanniarnerit puisinniarnerillu saniatigut eqaluit qalerallillu aamma aalisarneqartarlutik.

Ingerlalluarneq siunissamullu qulakkeerinninneq
Kalaallit Nunaanni aalisakkeriviit annersaat nunarsuamilu aalisakkerivinnit nutaaliaanerpaasoq aamma Sisimiut umiarsualivianiippoq. Kalaallit Nunaanni suliffeqarfiit annertuut allaffissornikkut pisortaqarfii arlallit aamma ungasinginngisaanniipput.

Illoqaffimmiut ineriartortitsiuarnissamik soqutiginninnerat ersarippoq: Aalisakkeriviup eqqaaniippoq nutaaliorfik aallarnisaavillu, tassani Kalaallit Nunaannut iluaqutaasinnaasunik isumassarsianik suliffeqarfinnillu ineriartortitsinissami namminersortumik ingerlatsiniarlutik aallarnisaasut, ilisimatusartut inuutissarsiutitigullu ingerlataqartut qanimut suleqatigineqarnissaat anguniarneqarluni.
 
Tamanut periarfissalik
Pisiniarnernik kulturikkullu misigisassarsiornissaq soqutigigaanni Sisimiut assigiinngitsorpassuarnik neqeroorutissaqarpoq. Illoqarfimmi assigiinngitsunik atisaarniarfeqarlunilu ulluinnarni atortussanik nioqquteqartartunik pisiniarfeqarpoq, arlalinnik unnuiffiusinnaasoqarpoq, kusanarluinnartumik katersugaasiveqarpoq, peqatigiiffiit ingerlalluartut arlaqarput kiisalu aasaanerani ukiuuneranilu pinngortitami misigisaqarluarfiusinnaasumik qaqqaqarlunilu kangerloqarpoq.
 
Tamatuma saniatigut imaatigut silaannakkullu angallannermi Sisimiut ukioq kaajallallugu angallaffiuvoq, ukiullu qanoq ilinera apeqqutaagani misigisassarsiorfissat sammisassallu tamanit tikinneqariaannaallutik.