Qeqqata Kommuniani Kommuni Kujallermilu atuartut ilinniartitsisullu tamarmik iPads-eqalissapput. iPads-it taakku 3000-t Qarasaasiaqarnermut tunngasutigut meeqqat pisuttalerneriniit ilisimasaat qaffassassavaat, atortuutillu taakku immikkorluinnaq periarfissiissapput, tassa ungasiaaniit meeqqanik inuusuttunillu Kalaallit Nunaanni ilinniartitsinikkut. ANINGAASAATEQARFIK VILLUM FOND-ip 17 mio. koruuninik tunissuteqarneratigut tamakku pisiarineqarsinnaalerput. Ingerlatsinikkut aningaasartuutitassai kommunit isumagissavaat, tamatumanilu ukiuni tulliuttuni arfineq-marlunni 23 mio. koruunit atorneqartussaassallutik. 

Tusagassiutitigut nalunaarut tamakkerlugu atuaruk

Marlunngornermi maajip 21-ni Sisimiuni Ilaqutariinnermut kiffartuussivik Innuttaasut Illorisimasaanut, Mannarsip Aqq. 14-imut ininut nutaanut nuuppoq.

Sapaatip akunnerata 21-p ingerlanerani Ilaqutariinnermut kiffartuussivik mailikkut imaluunniit oqarasuaataatigut attavigineqarsinnaanngikkallarpoq.

Innuttaasut Ilaqutariinnermut kiffartuussivimmik attaveqarnissaminnik pisariaqartitsisut, oqarasuaammut 58 51 77-imut sianersinnaapput.
 

Kangerlussuarmi Hunger Ford plads-imi najugaqarfittaat aqquserngi qanoq taaguuserneqassappat?
Nunaqarfiup immikkoortortaata tamassuma inunnut oqaluttuarisaanermulluunniit attuumassuteqartumik taaguusersorneqarsimaneranut ataqatigiissumik aqquserngit taaguuserneqassapput.

Siunnersuutit kingusinnerpaamik 2013-imi maajip 31-ani tunniunneqarsimassapput.

Piffissaliunneqartup kingorna, aqquserngit qanoq taaguuserneqassanersut nunaqarfimmi aqutsisut aalajangiissapput. Siunnersuutigineqarsimasut akornannit toqqaasoqassappat, siunnersuuteqarsimalluni toqqagaasoq Sivdlek-kkut aamma kommunip nittartagaatigut saqqummiunneqassaaq.

Siunnersuutit e-mailimut uunga nassiuguk: fbpe@qeqqata.gl imaluunniit allakkatigut uunga: Kiffartuussivik, Postboks 89, 3910 Kangerlussuaq. 

Quppernermi matumani kommunalbestyrelsip tunuaqqammersup kingullermeerluni marlunngornermi apriilip 30-iani ataatsimiinneranit imaqarniliat atuarsinnaavatit.
Aamma Qeqqata Kommuniani kommunalbestyrelsinngortup inissititerluni ataatsimiinneranit imaqarniliat atuarsinnaavatit.
Ataatimiinnerit ataanni annertunerusumik atuarit
 

Annertusumi utoqqarnut inissiat 16-it naammassineqarput. Inissiat tamarmik, Maniitsumi utoqqarnit soqutigineqarluaramik attartortussaqalereerput.
Utoqqarnut inissiat Annertusup aqquserngata Tunoqqusaallu akornaniipput. Inissianiit pisiniarfik utoqqaallu illuat Neriusaaq pisuinnaq orninneqarsinnaapput. Inissiat tamarmik saqqamikkut anerasaartarfeqarput, saqqasigut ataatsimoorussamik pisuinnarnut aqqusineqarlutik anerasaartarfeqarlutilluunniit, taamatullu aamma ataatsimoorussamik nunaminertaqarlutik.
- Inissiat tamarmik immikkut 60m2-iupput, isaariaqarlutik, gaangeqarlutik, uffarfeqarlutik, sinittafeqarlutik iggaveqarlutillu. Inissiat innarluutilinnut naleqqussagaapput, tamarmik kaamisartakkanik assakaasulinnik iserfigineqarsinnaallutik, matserfiillu tamarmik silittuullutik alloriaqaratik, Teknikkimut Avatangiisinullu imm. illuutinik nakkutilliisoq Jón Rasmussen oqarpoq:
- Anartarfiit innarluutilinnut naleqqussagaapput, igaffinni neriviusat portussusiat qummut ammullu naleqqussarneqarsinnaalluni, ilitsivissiat nerriviusani ajattartakkaniillutik, taakkulu sumulluunniit inissinneqarsinnaapput, aamma nerriviit ataannut.
Inissiat Naalakkersuisut aningaasaleeqataaffigisaannik Qeqqata Kommuniata sanaartortitarivai. Sanaartukkat ataatsimut aningaasartuutitaat suli naatsorsullugit naammassineqangilat, 21,4 mio. koruuninulli naliliussaallutik. Naalakkersuisut 8.963.000 koruuninik aningaasaleeqataassuteqarput.
- Utoqqarnut inissiat sanaartorneqarnerat naammassisoq kommunalbestyrelsip tunuaqqammersup aalajangiiffiginikuummagit nuannaarutigivara, borgmesteri Hermann Berthelsen oqarpoq.
Inissiat INI-mi nakkutigineqassapput.

Paasissutissat annertunerusut pillugit, illuutinik nakkutilliisoq Jón Rasmussen oqasaruaatikkut 817842 imaluunniit mailikkut jonr@qeqqata.gl attaveqarfigineqarsinnaavoq.
 

Ullumikkut akuleriisitsilluni meeraateqarfik nutaaq Uiaq Eqqaavimmut Aqq. 15-imi ammarpoq. Meeraateqarfik 1300m²-iuvoq, katillugillu meeqqanut 64-nut inissaqarluni, meraaqqerivittaani meeqqanut 24-nut meeqqerivittaanilu meeqqanut 40-nut. Meraaqqerivittaaniittussat ininut marlunnut 12-nik meerartalerlugit avitaassapput, meeqqerivittaalu ininut marlunnut 20-inik meerartalinnut avitaassallutik.

Meerartai meeraaqqerivimmit matusamiit Mikisoq aamma meeqqerivimmit matusamiit Âjo-meersuupput, tassa meeqqerivittaamut nutaamut nuunnerisigut matuneqarlutik.
Pisortaqarpoq, pisortamut tullersorteqarluni, immikkoortortami pisortaqarluni, isumaginninnermik suliallit sisamat, ikiortit sisamat eqqiaasorlu ataaseq.

Borgmesterip Hermann Berthelsen-ip meeraateqarfik nutaaq tikilluaqquaa.
- Meeqqerivik sivisuumik utaqqisimavarput, ammarneralu nuannaarutigilluinnarparput. Neriutigivaralu meeqqat inersimasullumi atugassarisatik nutaat nuannarilerumaaraat.

Paasissutissat nutaat
Meeraateqarfimmiut nutaamut atatillugu annertunerusumik paasisaqarusukkuit perorsaanikkut siunnersorti Pia Lennert, oqarasuaat 86 74 02-kkut imlt. Rosa Heilmann, oqarasuaat 86 74 03-kkut attaviginissaannut tikilluaqqusaavutit.

Ineqarnermut, Pinngortitamut Avatangiisinullu Naalakkersuisup Miiti Lynge-p Qeqqata Kommunianilu borgmesterip Hermann Berthelsen-ip tallimanngornermi maajip 3-ani ataatsimeeqatigiinneranni atuilluartuunissaq avatangiisinillu pitsanngorsaanissaq pingaartinneqarput.

Miiti Lynge Hermann Berthelsen-illu avatangiisit pillugit qanoq iliuuseqarnissaq pisariaqartoq isumaqatiissutigivaat, pingaartumillu eqqagassalerineq imikoornerlu eqqarsaatigalugit:

- Avatangiisitta pitsanngorsartuarnissaat kikkuugaluaruttaluunniit akisussaaqataaffigigatsigu isumaqatigiissutigisinnaavarput. Tamatumani Naalakkersuisut, Kommunit, suliffeqarfiit innuttaasullu ta-matta pineqarpugut. Namminersortummi qanoq iliuuseqarnissat pisortat utaqqiinnassanngilaat.

Qeqqata Komuniata 2020-imi atuilluartuuffiulersimanissamitut siunniussimasaa Miiti Lynge-p soqutiginartilluinnarpaa:

- Atuilluartuunissaq pillugu Naalakkersuisut Kommunilu assigiimmik anguniagaqarput. Taamaattumik kommunip atuilluartuuffiunissaminik anguniagaanik Naalakkersuisut tapersersuinissaat pissusissami-suuinnassaaq. Inatsit pitsanngorsartariaqarnersoq arlariilluta oqaloqatigiissutigineratigut misissussavarput, taamaliornikkut atuilluarnissaq avatangiisinillu pitsanngorsaanissatigut kommunip innuttaasalu siunertaat piviusunngortinneqarsinnaaqqullugit, assersuutigalugu saviminikutigut kuuffissuaqarnikkullu akitsuusiisinnaanerit eqqarsaatigalugit.

Hermann Berthelsen-ip Naalakkersuisut Qeqqata Kommuniatalu akornanni atuilluartuunissakkut toqqammaviligaasumik suleqatigiinnerulernissaat qilanaarivaa:

- Issittoqarfik tamaat isigalugu Qeqqata Kommuniata siuttuunissaani soqutigisarivaa, tamannali taamaallaat Namminersorlutik Oqartussat tapersersuinerisigut anguneqarsinnaavoq, taamaattumik Naalakkersuisut tapersiinerat nuannaarutigeqaara. Eqqagassat imikkornerullu suliassartaasa saniatigut, avatangiisit eqqarsaatigalugit inigisani silaannaq, taamatullu aamma nukissiutit ataavartut, minnerunngitsumillu nunatsinni attaveqaatit eqqarsaatigivagut.

Miiti Lynge-p Hermann Berthelsen-illu aamma Sisimiuni ikuallaavik pulaarpaat, imeqarnermut atatil-lugu killeqarfiliussatigut unaminartut alakkarterlugit. Nunani issittumiittuni misilittakkat Kalaallit Nunaanni atorneqartariaqartut Miiti Lynge-p Hermann Berthelsen-illu iusmaqatigiissutigivaat, taamaalilluni minguitsumik imissaqartuarnissaq, imeqarfiusullu qanittuini avatangiisinik mingutsitsinnginnissarput qulakkeerniarlugit.

Naalakkersuisut siulittaasuata Aleqa Hammond-ip, Ineqarnermut, Pinngortitamut Avatangiisinullu Naalakkersuisup Miiti Lynge-p Qeqqata Kommunianilu borgmesterip Hermann Berthelsen-ip sisamanngornermi maajip 2-ani ataatsimeeqatigiinnerminni, naalakkersuisunngortut nutaat Qeqqata Kommuniatalu siunissami suleqatigiinnissaat oqallisigivaat.

Ataatsimiinnermi assigiinngitsut oqallisigineqarput – Qeqqata Kommuniani pisut, taamatullu aamma Naalakkersuisut kommunillu akornanni oqallittarnerit nalinginnaasut tikinneqarlutik.

Aleqa Hammond-i Hermann Berthelsen-ilu ataatsimeereernerup kinguneranik isumalluaateqarput.

Ataatsimoorlutik oqaaseqaatiminni siunissami suleqatigiissutissat upperalugit oqaatigivaat:

-Qanittumik oqaloqatigiittarnertigut suleqatigiissutiginerisigullu siunissatsinni unamminartussat qaangerniartassavavut.

Aleqa Hammond-ip itisilerlugit:

-Kommuninik pitsaasumik oqaloqatiginnissinnaanerput pingaaruteqarpoq. Taamaaliornikkummi aamma innuttaasunut qaninnerulersinnaavugut, isumaallu tusaaniarnerullugit. Taamaammat Qeqqata Kommunianik suleqatiginninnissarput ullumikkut aallartillugu oqaloqatigiinnerput nuannaarutigivara, Aleqa Hammond oqarpoq.

Ataatsimiinnermi Kangerlussuarmi ikaartarfiup unamminartortai oqallisigisat ilagivaat.
Aammattaaq sinerissami nalinginnaasumik ineqarniarnermut tunngasut oqallisigineqarput, pingaartumillu Qeqqata Kommuniani ajornartorsiutitai eqqartorneqarlutik. Aleqa Hammond-ip
Kalaallit Nunaani tamarmi inissialiortiternerup isiginiarneqarnissaa ataatsimiinnermi kissaatigalugu oqaatigivaa. Miiti Lynge-lu itisilerilluni oqarluni:

-Sinerissami sanaartornerup ingerlaqqinnissaa uagutsinnut pingaaruteqarpoq, aammattaarli akissarsiakinnerusut eqqarsaatigalugit akilerneqarsinnaasunik sanaartussaavut.

Ataatsimiinnermi Hermann Berthelsen-ip Sisimiut Umiarsualiviat pingaarnersiuilluni oqaluttuarivaa, taanna juunip naaneranut takornariaqarnerup aallartinneranut piareersimasussaavoq. Qeqqata Kommunia umiarsualivimmik allileriniarluni aallartimmalli unamminartorpaalussuit Qeqqata Kommunaita naammattoortarpai.

Aleqa Hammond aamma Hermann Berthelsen isumaqatigiipput, unamminartut tulleriiaarinerillu umiarsualiviup nutaap atulerneratigut pilersussat ammasumik isummersorfiusariaqartut, tassa umiarsualiviit pillugit inatsisissap nutaap oqallisiginissaani.

Tamakku saniatigut Hermann Berthelsen-ip Aleqa Hammond nersualaarpaa, tassa Qeqqata Kommunia IBA-mik isumaqatigiissusiornissamut peqataasussanngormat, aammalu borgmesterip
Naalakkersuisut siunissami Maniitsumi alumiiniumik suliffissuaqalernissami pitsaasumik suleqatiginniissamut ammanerat iluarisimaarpaa.

-Siusinnerusukkulli Naalakkersuisut kommunillu akornanni ammanerusumik pissuseqarnissaq ujartortaraluarpara. Massakkullu ataatsimeereernitta kingorna ersarissumik paasivara, siunissami pitsaasumik oqallinnissaq nukittorsarneqartoq.
 

Illoqarfitoqaq, Sisimiut pillugu kommunimi pilersaarummut tapiliussaq nr. 2-tut siunnersuut Qeqqata Kommuniata saqqummiuppaa.

Kommunip pilersaarusiorneqarneranut tapilussassatut nr. 2-tut siunnersuut, 2013-imi majip 3-aniit juunip 28-iata tungaanut tamanut tusarniutigineqarpoq.
 

Annertunerusumik paasisaqarusukkaanni pilersaarutit tusarniakkat ataani takuneqarsinnaavoq

Suliffeqarfiutit qanoq iliornikkut atuilluarfinngorsinnaava, taamalu illit amma siunissami peqataallutit?

Taamatut qulequtsiilluni Qeqqani Inuutissarsiornermut Siunnersuisoqatigiit Sisimiuni inuutissarsiutaatillit aggersarpai, Qeqqata Kommuniata 2020-imi atuilluartuunissamik pilersaarutaanut atatillugu Inuutissarsiornermut Siunnersuisoqatigiit atuilluartuunissami pilersaarutaannik saqqumiussinissaminnut.

Aaqqissuussineq arfininngornermi maajip 4-ni, marluniit tallimat qeqqata tungaanut Hotel Sisimiuni ingerlanneqassaaq.

Ataatsimiititsinermi Inuutissarsiornermut Siunnersuisoqatigiit sliniutitik sisamaasut saqqummiutissavaat:
• Suliffeqarfiit atuilluartututu ineriartornerat
• Atuilluarneq tunngavigalugu takornariartitsineq
• Atuilluarneq tunngavigalugu aalisarneq/piniarneq
• Atuilluarneq tunngavigalugu ilinniartitaaneq

Suliffeqarfiit pilersaarutinut assigiinngitsunut isummaminnik tunniussisinnaassapput, peqatigitillugulu aamma suliffeqarfeqarfinnik atuilluarfiusunik, CSR-imut tunngasutigut suliffeissaqarfiillu pillugit ilisimaarisaat annertunerulersinnaalluni.

Qanoq ingerlasoqarnissaa uani atuarsinnaavat.

Paasissutissat annertunerusut
Vinni Pietras-Jensen, tlf. nr. +299 58 67 80 attaveqarfigiuk.