”Kommunini najugaqartuusugut suliassanut piukkunnaaqigatta,” borgmesterit Jess Svane, Hermann Berthelsen aamma Simon Simonsen taama Naalakkersuisuusut apeqquteqarfigivaat.
Taama apeqquteqarnissaq pisariaqalersimavoq, tassa Naalakkersuisup Jens B. Frederiksen-ip, Angallannermut kommissionimi ilaasortat pingasut Nuummeersut pingasullu Danmark-imeersut ”sulianut ilisimasaqarnertik toqqammavigalugu toqqarneqarsimasut” tusagassiutitigut paasissutissiissutitut nalunaarutigimmagu.
”2007-imi Angallanermut kommissionip ilaasortai siunnersortaalu isumaqaraluarput, Nuup illoqarfianiit Akianut immap naqqata ataatigut sullorsualiorneq 850-1.100 mio. koruuninik akeqarsinnaasoq, tamannalu sulianut tunngasutigut ilisimasaqartuunerunerluni” borgmesteri Hermann Berthelsen taama aperivoq. ”Ukiummi tulliani ilisimatusarnermi umiarsuaq atugaasoq nalaatsornikkut aqqusaarpoq, taamaalillunilu sullorsualiassaraluaq qatangiinnarunarluni.”
”Kaammattuisussaminnimmi ujartuinerminni suliffeqarfiit Nuummersuinnaat aggersarsimavaat, tamannalu Angallannermut kommissionimi sulianut tunngasutigut ilisimasaqartuunerunerluni”, borgmesteri Jess Svane taama aperivoq. ”Sulianut piukkunnasuseqarnerunerluni, assersuutigalugu takornariaqarnikkut sulissiveeqqat aggersassallugit, nunami maani takornariaqarnikkut sullissiviit annersaat Ilulissaneersoq Kangerlussuarmeersorlu aggersarneqaratik”
”Siunissami anguniagassatigut suliaminnut atatillugu aatsitassarsiornermik Kommuneqarfik Sermersuumiinnaq suliaqarsinnaasussat aggersarunikkit, taava Angallannermut kommissioni sulianut tunngasutigut ilisimasaqartuunerlutik”, Simon Simonsen taama aperivoq. ”Aammami Aatsitassarsiornermik pisortaqarfik, Narsami Qaqortumi kommuninilu avannaaniittuni marluusuni aatsitassarsiorfeqarnissamik pilersaaruteqarunaraluarmat”
”Angallannermut kommissioni sulianut tunngasutigut ilisimasaqartuunerlutik, anguniagaat pillugit tusarniaanerini akissuteqaataasimasutigut tamatigut inuutissarsiutitigut ineriartortitsinissap aningaasaqarnikkullu imminut napatilernissap amigaataaneri uparuartorneqartillugit”, borgmesterit pingasuullutik aperipput. ”Kommunit pineqartut – uagut borgmesteriuffigisavut – allaffissornerup siunissami toqqammaviunissaa tutsuiginngilarput, inuutissarsiutitigulli ineriartortitsinissaq. Tamanna aamma neriuutigigaluarparput, Naalakkersuisut sulianut ilisimaarinnilluartut isumagigaat, taama naggasiipput borgmesterit pingasuullutik.