airplanebooksbriefcase business cogs cross election entertainment fish house law lockmedicalpeopleselfservices socialtax

Nunaminertat qinnutigineqarsinnaasut

Sisimiuni immikkoortumi 800-A20.2-mi sanaartorfissatatorneqanngitsut Qeqqata Kommuniata matumuuna nalunaarutigai. 

Illoqarfimmi immikkoortumi pilersaarut 39 Emiliap Aqqusernata Sethip Aqqusernatalu akornani ineqarfissatut aalajangersakkat sanaartorfissanut atuupput.

Sanaartorfissat atorneqanngitsut pingasut 1.30, 1.31 aamma 1.33 ilaqutariinnut ataatsinut illut qalia atorneqarluni annerpaamik ataatsimik quleriilinnut, annerpaamillu 8 meterinik portutigisunut illunut ataasiakkaanut siammasissunik pukkitsunillu sanaartorfissatut immikkoortitaapput.
Sanaartorfissat annerpaamik 225 m² -risut annertutigisinnaapput.
Sanaartorfissamut ataatsimut sanaartorfigissaanermut siumoortumik akiligassaq 232.257,00 koruuniuvoq.

Kommunip pilersaarusiorfigineqarneranut tapiliussaq 39-mi ”kommunip pilersaarusiorfigineqarneranut tapiliussamut nunap assinga”-ni ilanngussami 2-imi nunaminertat sumiinneri takuneqarsinnaapput. Immikkoortitami A30-mi sanaartorfissat allat nalunaarummut matumunnga ilaanngillat.

Qinnuteqarnissamut atatillugu nunap assingi ilassutit tunniunneqassapput.
Kommunip pilersaarusiorfigineqarneranut tapiliussaq, nunap assingi ilanngunneqartut il.il. www.qeqqata.gl-imi qinnuteqaat www.nunagis.gl -ikkut imaluunniit Sisimiuni Teknikkimut avatangiisinullu Immikkoortortamut saaffiginnissuteqarnikkut immersorneqarsinnaavoq.

Sanaartorfissat nalunaarutigineqartut majip 14-ani 2021-mi tunniunneqarsinnaanissaat naatsorsuutigineqarpoq.

Nunaminertamik inniminniinermik qinnuteqaammut ilanngunneqassapput:
• Sanaartornerup qaqugukkut aallartinneqarnissaanik, qaqugulu naammassineqarnissaanik naatsorsuuteqarnermik piffissaliussaq ilanngunneqassaaq.
• Sanaartorfigissaanermut akiliutissartaata akilerneqarsinnaanissaanut sanaartorniakkamullu atatillugu nunaminertap atorneqarnissaanut qinnuteqartoq uppernarsaasinnaassaaq.

Qinnuteqaatit siuliani paasissutissanik ilaqartinneqartut kisimik suliarineqassapput. Qinnuteqaatip paasissutissanik naammattunik eqqortunillu imaqartinneqarnissaa, qinnuteqartup nammineerluni akisussaaffigaa.
Paasissutissatut piumasarineqartunut, uppernarsaatissanut qinnuteqarnissamillu paatsuungasoqarlunilu nalornissuteqartoqassappat, imaluunniit paasissutissanik annertunerusumik pisariaqartitsisoqassappat, qinnuteqarfissap qaangiutinnginnerani piffissaagallartillugu Sisimiuni Teknikkimut Avatangiisinullu Immikkoortortamut saaffiginnittoqarsinnaavoq.

Nunaminertamik atugassinneqarnissamik qinnuteqaat uunga nassiunneqassaaq: Qeqqata Kommunia, Teknikkimut avatangiisinullu Immikkoortortaq, Postboks 1014, 3911 Sisimiut. Sanaartorfissatut kissaatigineqartut tulleriiaarlugit qinnuteqaammut ilanngunneqarsinnaapput. Qinnuteqaatit kingusinnerpaamik ataasinngornermi Aprilip 29-ani 2021-mi nal. 15.00 tunniunneqarsimasut, piffissaagallartillugu tunniunneqarsimasutut isigineqassapput.

Piffissaagallartillugu qinnuteqaatit tunniunneqartut ataatsikkut tunniunneqarsimasutut isigineqassapput. Sanaartorfissanut ataasiakkaanut sanaartortussatut piukkunnartut arlaqassappata, makitsinikkut agguaassisoqassaaq.
Qinnuteqaateqarfissaq qaangiunniariartoq agguaassinissaq, makitsinikkullu agguaassisinnaaneq piaartumik ingerlanneqassapput, tamatumalu kingorna nunaminertamik inniminniisimasup annerpaamik qaammatit pingasut qaangiutsinnagit nunaminertamik atugassinneqarnissaminik qinnuteqassalluni. Qeqqata Kommunia nunaminertamik atugassiinerani, sanaartorfigissaanermut akiliutissaq kingusinnerpaamik ulloq taanna akilerneqareersimassaaq, nunaminertamillu atugassiinerup tunniunneqarnissaani sanartorfigissaanermut akiliutissap akilerneqarsimaneranik uppernarsaammik kommuni piumasaqaqqaarsinnaatitaavoq.

Kommunip pilersaarusiorfigineqarneranut tapiliussaq nr. 27 Illoqarfimmi immikkoortumut pilersaarusiornissamut killiliussat aamma Nunaminertanik aqutsinissamut maleruagassat kiisalu Illoqarfimmi immikkoortumut pilersaarut 39-mi Sisimiuni Emiliap Aqqusernata Sethip Aqqusernatalu akornanni naapertorlugit nunaminertamik inniminniinissamut nunaminertamillu atugassinneqarnissamut ingerlariaasissaq naapertorneqassapput.



Qeqqata Kommunia

Teknik og miljø

+299 70 21 00

qeqqata@qeqqata.gl