Meeqqanik pinerliisimannginnermut uppernarsaat

Meeqqanik pinerliisimannginnermut uppernarsaat 

Kalaallit Nunaanni imaluunniit Danmark-imi meeqqanut 15-it inorlugit ukiulinnut kinguaassiutitigut atornerluisimanermut eqqartuunneqarsimagaanni, meeqqanik pinerliisimannginnermut uppernarsaammut tamanna ilanngunneqartarpoq.

Kinguaassiutitigut atornerluisimanermut eqqartuussut, meeqqanik pinerliisimannginnermut uppernarsaammi ukiuni 20-ni allaqqasarpoq, pingaartumik atornerluinerit immikkut ittumik sakkortussusillit meeqqanik atornerluisimannginnermut uppernarsaammi ukiuni 80-ini allaqqasarput.

Meeqqat pisortat inaataaniikkaangata, assersuutigalugu meeqqerivimmi, atuarfimmi aamma timersoqatigiiffimmi kinguaassiutitigut atornerlunneqarsinnaanermut illersorniarlugit meeqqanik pinerliisimannginnermut uppernarsaat suliarineqartarpoq. Taamaammat inummik meeqqanik 15-it inorlugit ukioqartunik sullissisussamik atorfinitsitsineq sioqqullugu sulisitsisoq meeqqanik pinerliisimannginnermut uppernarsaammik pissarsiniartuussaavoq. Assersuutigalugu tassaasinnaapput:
  • Ilinniartitsisut
  • Perorsaasut
  • Perorsaasunut ikiortit
  • Ulluunerani angerlarsimaffimmi paarsisartut
  • Angajoqqaarsiat
  • Inunnik isumaginnittut
  • Pedel-it
  • Nakorsat
  • Napparsimasunik paarsisut
  • Igaffimmi aamma nerisarfinni sulisut
  • Nalunnguarnermik ilinniartitsisut

Meeqqanik pinerliisimannginnermut uppernarsaat nammineerlutit pissarsiarisinnaanngilat. Paarlattuanik illit sulisitsisorilerumaagassat meeqqanik pinerliisimannginnermut uppernarsaammik politiinut pissarsiniarsinnaasoq akuerisussaavat. Meeqqanik pinerliisimannginnermut uppernasaatinnik sulisitsorisassat pissarsiniarsinnaasoq akuerinngikkukku, suliffissaq pissarsiarisinnaanngilat.

Akuersissutinnik tunniussininniit sulisitsisuit meeqqanik pinerliisimannginnermut uppernarsaatinnik tigusinissaata tungaanut nalinginnaasumik sapaatit akunneri marlunniit pingasut tikillugit ingerlasinnaasarput.

Meeqqanik pinerliisimannginnermut uppernarsaat pigisat, meeqqanik 15-it inorlugit ukiulinnik sullissisinnaanermut atorfininnissannut naammaginartuusariaqarpoq.


Malugiuk
Sulisitsisoq nipangiusimannittussaatitaavoq. Tamatuma kingunerisaanik, meeqqanik pinerliisimannginnermut uppernarsaatip pigisavit imarisaa sulisitsisuit allanut oqaluttuareqqusaanngilaa. Taamatuttaaq meeqqanik pinerliisimannginnermut uppernarsaat aserorterneqartarpoq, sulisitsisup atorfimmi sulilissanersutit aalajangiunniariarpagu.

Sulisitsisumut immersugassaq

Allaaserisat attuumassutillit