Pisortatigoortumik pineqaatissinneqarsimanermut uppernarsaat

Pisortatigoortumik pineqaatissinneqarsimanermut uppernarsaat 

Illit inatsisitigut unioqqutitsisimasinnaanitit pillugit paasissutissat pinerluuteqarsimasunut nalunaarsuisarfiup paarisarpai. Inatsimmik unioqqutitsinermut pineqaatissiissummik eqqartuunneqarsimaguit, tamanna illit pisortatigoortumik pineqaatissinneqarsimanermut uppernarsaatinnut allanneqassaaq. Pisortatigoortumik pineqaatissinneqarsimanermut uppernarsaat taamaalilluni uppernarsaataavoq, inatsisinik illit pineqaatissiissutigisannut, unioqqutitsinermut eqqartuussutaasoq pillugu paasissutissanik imaqartoq.

Pineqaatissiissut sunaagaluarluunniit eqqartuunneqaatigisimagaluarukkuluunniit, pisortatigoortumik pineqaatissinneqarsimanermut uppernarsaat paasissutissanik ukiut qulit kingumoortunik imaqartarpoq.

Atorfiit ilaat qinnuteqarfigigukkit – nalinginnaasumik meeqqanik inuusuttunillu suliffigisinnaasavit – pisortatigoortumik pineqaatissinneqarsimanermut uppernarsaat pigisat, sulisitsisorilerumaakkavit takujumasinnaavaa.

Pisortatigoortumik pineqaatissinneqarsimanermut uppernarsaammik pissarsiniartussaq tassaavoq sulisitsisoq. Taamaattoq sulisitsisut pisinnaassappat, illit tamatumunnga akuersisussaavutit.


Pineqaatissinneqarsimanermut uppernarsaat naammaginartoq
Illit pineqaatissinneqarsimaninnut uppernarsaatit akornuteqanngivissasoq sulisitsisup piumasarisinnaanngilaa. Taamaattoq atorfinitsinneqassaguit pineqaatissinneqarsimanermut uppernarsaat naammaginartuussasoq sulisitsisup piumasarisinnaavaa.

Pineqaatissinneqarsimanermut uppernarsaat naammaginartuunersoq sulisitsisup nalilersortussaavaa. Pineqaatissinneqarsimanermut uppernarsaat naammaginartoq eqqartuussutit pillugit paasissutissanik imaqarsinnaalluarpoq, sulisitsisoq naliliippat, atorfimmut pineqartumut taakku sunniuteqarnavianngitsut.

Sulisitsisup assersuutigalugu atorfinitsinnissat itigartissinnaavaa, imaattoqarpat:
  • Biilimik aquttussatut atorfininnissat qinnuteqaatigisimagukku
  • Aamma ukiup ataatsip matuma siornatigut imigassartorsimallutit biilimik ingerlatitsisimanermut eqqartuunneqarsimaguit

Paarlattuanik eqqartuussut soqutiginaateqarpallaarnavianngilaq, assersuutigalugu illit:
  • Eqqiaanermi ikiortitut atorfimmut qinnuteqarsimaguit
  • Aamma ukiut tallimat matuma siornatigut nakuusernermut eqqartuunneqarsimaguit imaluunniit imigassartorsimallutit biilinik ingerlatitsisimasutut eqqartuunneqarsimaguit

Malugiuk
Namminerisamik pineqaatissinneqarsimanermut uppernarsaammik aamma nassaassaqarpoq. Illit namminerisannik pineqaatissinneqarsimanermut uppernarsaat pigisat sulisitsisup takussallugu piumasarisinnaavaa, assersuutigalugu atorfik qinnuteqaatigigukku pisortatigoortumik pineqaatissinneqarsimanermut uppernarsaammik naammaginartumik piumasaqaateqarfiunngitsoq. Illit namminerisamik pineqaatissinneqarsimanermut uppernarsaat pigisat politiinut aasinnaavat.

Namminerisamik pineqaatissinneqarsimanermut uppernarsaat allaaserisani attuumassutilinni atuarsinnaavat.

Allaaserisat attuumassutillit