Sulinngiffeqarneq – Nalinginnaasumik paasissutissiineq

Sulinngiffeqarneq – Nalinginnaasumik paasissutissiineq 


Kalaallit Nunaanni suliffissaqartitsineq pisortanit aamma namminersortunit ingerlatsivigineqarpoq. Namminersortut aamma pisortat ingerlassaanni sulinermi atugassarititaasut inatsisit aqqutigalugit maleruagassiorneqarnikuupput. Pisortani atorfilinnut atorfeqarnermi atugassarititaasut, inunnut ataasiakkaanut atuuttut aamma matumani isumaqatigiissutit malillugit maleruagassiorneqarnikuupput. Kinguliini allassimasut pisortani atorfilinnut taamaallaat atuupput.

Ukiuni sulinngiffeqarfiusussani tamani pisortani atorfillit tamarmik sapaatit akunnerini tallimani sulinngiffeqarnissamut pisinnaatitaapput. Ukioq sulinngiffeqarfiusoq februar-ip aallaqqaataanni aallartittarpoq januar-illu 31-ianni naasarluni.

Ukiup sulinngiffeqarfiusussap aallartinnissaa sioqqullugu, sulisitsisut peqatigalugu sulinngiffeqarnissat pilersaarusiussavat. Sapaatit akunnerini pingasuni tulleriiginnarni sulinngiffeqarnissannut pisinnaatitaavutit. Sulisitsisunnullu isumaqatigiissuteqarnerup kingorna sapaatit akunnerinik tallimanik sivisussuseqartumik sulinngiffeqarsinnaavutit.


Sulinngiffeqarnissamik katersat
Ukiup katersiffiup ingerlanerani – tassa ukiup sulinngiffeqarfiusussap siornatigut ukiumi ullorsiuteqarfiusumi – sulinngiffeqarnissamut aningaasanik katersissaatit sulinngiffeqaleruit tunniunneqartussanik imaluunniit sulinngiffeqarnerup nalaani akissarsiaqarnissamut pisinnaatitaassaatit.
  • Qaammammusisaruit sulinngiffeqarnivit nalaani akissarsiaqassaatit
  • Akunnermusiaqaruit sulinngiffeqarninni sulinngiffeqarnermut aningaasassatit pissavatit


Aallaavittut isigalugu ukiumi sulinngiffeqarfiusussami tullermi sulinngiffeqarnissamut katersatit atorsinnaalissavatit. Tassa imaappoq, assersuutigalugu ukiumi katersiffiusumi 2010-mi januar-ip aallaqqaataaniit december-ip 31-iat ilanngullugu sulinngiffeqarnissamut katersat, ukiumi sulinngiffeqarfiusumi 2011-imi februar-ip aallaqqaataaniit 2012-imi januar-ip 31-iat ilanngullugu sulinngiffiussapput.


Aningaasarsiaqarluni sulinngiffeqarneq
Qaammammusiaqaruit, ukiumi katersiffiusumi qaammatit atorfeqartinnerit tamaasa 2,08-nik ullunik akissarsiaqarlutit sulinngiffeqarnissamut pisinnaatitaanissannut katersissaatit. Assersuutigalugu ukiumi katersiffiusumi qaammatini qulini atorfeqarsimaguit, ulluni 20,8-ni akissarsiaqarlutit sulinngiffeqarnissamut pisinnaatitaavutit.

Ulluni 25-ni akissarsiaqarlutit sulinngiffeqarnissamut annerpaamik katersinissamut pisinnaatitaavutit, taakkulu sapaatit akunnerini tallimani sulinngiffeqarnerup naligai.

Akissarsiavit sulinngiffeqarninni pissarsiavit saniatigut, immikkut sulinngiffeqarnermi ajunngitsorsiassanik aamma katersisarputit. Immikkut sulinngiffeqarnermi ajunngitsorsiat ukiumi katersiffiusumi akissarsiavit 1,5%-erivaat. Immikkut sulinngiffeqarnermi ajunngitsorsiat, ukiup sulinngiffeqarfiusussap aallartinnerani akissarsiannut ilanngullugit tunniunneqartarput.

Ukioq sulinngiffeqarfiusussaq sioqqullugu, ukioq ullorsiuteqarfiusoq tamakkerlugu atorfeqareeruit aatsaat sulinngiffeqarnerup nalaani akissarsiaqarnissannut pisinnaatitaalissaatit.


Sulinngiffeqarnermi aningaasarsiat
Akunnermusiaqaruit, sapaatip akunneranut akunnerni qanoq amerlatigisuni sulisarsimanerit aallaavigalugu, sulinngiffeqarnissannut aningaarsarsiassatit naatsorsorneqartussaapput.

  • Ukioq katersiffiusoq tamakkerlugu sapaatip akunneranut akunnerni 40-ni sulisaruit, taamaalillutit akunnerit sulinngiffeqarfissat 200-it pisinnaanissaannut katersisimassaatit, sapaatit akunnerini tallimani sulinngiffeqarnerup nalingi
  • Sapaatip akunneranut akunnerit 40-it inorlugit sulisaruit, akunnerit sulinngiffissatit naleqquttumik apparneqassapput. Tamatuma kingunerisaanik assersuutigalugu ukiup katersiffiup ingerlanerani sapaatip akunneranut akunnerni 32-ni sulisaruit, taava akunnerit sulinngiffeqarfissat 160-it katersorsimassavatit sulinngiffeqarnermi aningaasarsianik ilaqartut


Malugiuk
Sapaatit akunnerini tallimani sulinngiffeqarnissamut pisinnaatitaavutit – aamma sapaatit akunneri tallimat sulinngiffeqarfissat katersorsimanngikkaluarukkilluunniit sulinngiffeqarnermi aningaasarsianik imaluunniit akissarsianik ilaqartut. Kisianni sulinngiffeqarnermi aningaasarsiat imaluunniit akissarsiat katersornikuusatit taamaallaat pissarsiarisinnaavatit. Sulinngiffeqarnivit sinnera illit nammineq akilissavat.

Isumaqatigiissutit ilaasa ullunik sulinngiffissanik 2-5 tikillugit sivisussusilinnik pisinnaatitaanissannut periarfissaqartippaatsit.

Sulinngiffeqarnivit nalaani suliartoqqusisinnaanermut sulisitsisut pisinnaatitaavoq. Sulinngiffeqarnivit nalaani suliartoqquneqaruit, taarsiissutitut sulinngiffeqarnissamut pisinnaatitaavutit.

Pisortani sulillutit misiliisuuguit, aamma sapaatit akunnerini tallimani sulinngiffeqarnissamut pisinnaatitaavutit. Sulillutit misiliisutut ukioq atorfinitsinneqarfiusoq siullermiilli akissarsiaqarlutit sulinngiffeqarsinnaanermut pisinnaatitaavutit.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl