Sulinngiffeqarneq – Sulinngiffeqarnermi ajunngitsorsiassanik tunniussineq

Sulinngiffeqarneq – Sulinngiffeqarnermi ajunngitsorsiassanik tunniussineq 

Ukiut sulinngiffeqarfiusut tamakkerlugit pisortani sulisut tamakkerlutik sapaatit akunnerini tallimani sulinngiffeqarnissamut pisinnaatitaapput. Ukioq sulinngiffeqarfiusoq februar-ip aallaqqaataani aallartittarpoq januar-illu 31-ianni naasarluni.

Ukiup katersiffiup ingerlanerani – tassa ukiup sulinngiffeqarfiusup aallartinnissaa sioqqullugu ukiumi ullorsiuteqarfiusumi – sulinngiffeqarnermi aningaasarsianik katersissaatit, taakku sulinngiffeqaleruit tunniunneqassapput imaluunniit sulinngiffeqarnerup nalaani akissarsiaqarnissamut pisinnaatitaassaatit.

Tunngaviusumik isigalugu, ukiumi sulinngiffeqarfiusussami tulliuttumi sulinngiffeqarfigisassatut katersatit atortussaavatit. Tassa imaappoq, assersuutigalugu ukiumi katersiffiusumi 2010-mi januar-ip aallaqqaataaniit december-ip 31-iat ilanngullugu sulinngiffeqarnissamut katersat, ukiumi sulinngiffeqarfiusumi 2011-imi februar-ip aallaqqaataaniit 2012-imi januar-ip 31-iat ilanngullugu sulinngiffiussapput.


Sulinngiffeqarnerup nalaani akissarsiat
Qaammammusiaqaruit sulinngiffeqarnivit ingerlanerani akissarsissaatit. Ukioq katersiffiusoq tamakkerlugu atorfeqarsimaguit, taamatuttaaq immikkut ittumik sulinngiffeqarnermi ajunngitsorsiassanik pisinnaatitaavutit. Immikkut ittumik ajunngitsorsiat illit akissarsiavit sulinngiffeqarnissannut tunngaviusut 1,5 %-eraat aammalu ukiup sulinngiffeqarfiusup aallartinnerani februar-ip aallaqqaataani isumamineersumik tunniunneqartussaallutik.

Sulinngiffeqarnerup nalaani akissarsisaruit, illit sulisitsisunnut isumaqatigiissutigiinnassavat, piffissap qanoq ilinerani sulinngiffeqarniarnerlutit. Taava sulisitsisuit, illit sulinngiffeqarnivit ingerlanerani akissarsiassavit tunniunneqarnissaat isumagissavaa.

Akissarsiaqarlutit sulinngiffeqarnissat kissaatiginngikkukku, taarsiullugu sulinngiffeqarnermi aningaasarsiat pisinnaavatit. Taamaaliornikkulli immikkut ittumik sulinngiffeqarnermi ajunngitsorsiassat pisinnaanerat annaassavat. Sulinngiffeqarnerup nalaani akissarsiaqarnissamut taarsiullugu sulinngiffeqarnermi aningaasarsiat piumagukkit, ukiumi katersiffiusumi kingusinnerpaamik oktober-ip aallaqqaataani sulisitsisunnut tamanna isumaqatigiissuteqarfigissavat.


Sulinngiffeqarnermi aningaasarsiat
Akunnermusiaqaruit sulinngiffeqarnivit nalaani sulinngiffeqarnermi aningaasarsiat pissarsiarissavatit. Sulinngiffeqarnissat sioqqullugu akissarsiannut ilanngullugit sulinngiffeqarnermi aningaasarsiassatit tunniunneqassapput. Akunnerit sulinngiffeqarfigisavit amerlaqataat taamaallaat sulinngiffeqarnermi aningaasarsianik pissarsissutigissavatit. Tamatuma kingunerisaanik, illit sulinngiffeqarnermi aningaasarsiat pissarsiassatit naafferartumik arlaleriartumik tunniunneqartassapput, sulinngiffeqarnissamik katersatit ataatsikkoortumik sulinngiffeqarfiginngikkukkit.


Sulinngiffeqanngikkaluarluni tunniussineq
Ukiup sulinngiffeqarfiusup aallartinnerani februar-ip aallaqqaataani, sulinngiffeqarnermi ajunngitsorsiassatit tunniutsissinnaavatit, ukiumi sulinngiffeqarfiusumi sulinngiffeqanngikkaluaruilluunniit, imaattoqarsimappat

  • sulinngiffeqarnermi ajunngitsorsiassat illit katersatit 2.000 kr.-inik ikinneruppata
  • imaluunniit utoqqalinermi soraarnerussutisiaqalersimaguit aamma suliunnaarsimaguit


Nunatsinniit nunamut allamut nuukkuit aamma sulinngiffeqarnermi ajunngitsorsiassat tunniutsissinnaavatit. Taamaattoqassappat sulinngiffeqarnermi ajunngitsorsiassat ilinnut tunniunneqassapput, inuit allattorsimaffianni najukkavit allanngortinnerata kinguninngua.


Suliffeqarfigisat allanngortissagukku
Ukiumi siuliani sulinngiffeqarnermi aningaasarsiat imaluunniit akissarsiat katersornikuusatit ukiumi sulinngiffeqarfiusumi ilinnut tunniunneqassapput. Tamatuma kingunerisaanik, illit sulinngiffeqarnissamik katersereerlutit suliffeqarfigisannit nuussimasinnaavutit taamaalillutillu sulinngiffeqarnissannut illit sulisitsisorisimasanniit sulinngiffeqarnermi aningaasarsiat tunniunneqartuussaapput.

Assersuutigalugu 2010 tamakkerlugu tamakkiisumik sulisimaguit, 2011-imi sulinngiffeqarnermi aningaasarsianik imaluunniit akissarsianik ilaqartumik sapaatit akunnerini tallimani sulinngiffeqarnissamut pisinnaatitaavutit. 2011-imi august-ip aallaqqaataani suliffimmi allami sulilersimaguit siusinnerusukkullu sulisitsisunniit sapaatit akunnerini pingasuni sulinngiffeqareersimallutit, 2011-imi suli sapaatit akunnerini marlunni sulinngiffeqarnissamut pisinnaatitaavutit, siusinnerusukkut sulisitsisunnit akilerneqartussamik.

Siusinnerusukkut sulisitsisunniit sulinngiffeqarnermi aningaasarsiat pissatit tunniutsikkusukkukkit, sulisitsisut nutaaq sulinngiffeqarnermut uppernarsaammik sanassaaq. Sulinngiffeqarnermut uppernarsaatip uppernarsassavaa sulinngiffeqartutit.

Sulinngiffeqarnermut uppernarsaat siusinnerusukkut sulisitsisunnut takutilluguluunniit nassiutissavat, taassuma sulinngiffeqarnermi aningaasarsiat tunniussinnaaniassammagit.


Malugiuk
Suliffeqanngitsunut ilinniartunullu maleruagassat immikkut ittut atuupput.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl