Aningaasarsiat tapisiallu – Qaangiuttoorneq

Aningaasarsiat tapisiallu – Qaangiuttoorneq 

Pisortani atorfeqaruit piffissaq suliffigisassat nalinginnaasoq sapaatip akunneranut akunnernik 40-inik sivisussuseqassaaq. Akunnerit 40-it taakku ima agguataarneqarput ulluni suliffiusuni tamani piffissap 7.00 aamma 17.00-ip akornanni akunnerit 8-it sulisassallutit. Tamanna taagorneqarpoq piffissaq nalinginnaasumik suliffiusussaq.

Sulineruneq tassaavoq piffissap nalinginnaasumik suliffigisassavit saniatigut akunnerit. Assersuutigalugu nal. 17-ip tungaanut akunnerit 8 sulisimaguit nal. 18-illi tungaanut sulillutit, sulinerullutit akunneqassaatit.

Qaangiuttoorneq tassaavoq ”piumaffigineqarluni” sulineruneq. Tassa imaappoq qaangiuttoornissat illit pisortavillu akornassinni ersarissumik isumaqatigiissutigisimassavarsi. Nalinginnaasumik qaangiuttoornertut isigineqarput:

  • Ullup ataatsip ingerlanerani akunnerit 8-it saniatigut sulineq
  • Sapaatip akunneranut akunnerit 40-it saniatigut sulineq
  • Nalinginnaasumik suliffiup avataatigut sulineq (piffissat nikinnerat, assersuutigalugu nal. 17.00-ip kingorna imaluunniit sapaatip akunnerata naanerani, tamatumanili maleruaqqusat immikkut ittut atuussinnaapput)


Isumaqatigiissutit atorfiillu ilai qaangiuttoornermut immikkut aningaasarsiaqarsinnaaninnut pisinnaatippaatsit. Tassa imaappoq qanoq sivisutigisumik qaangiuttoornerit apeqqutaatinnagu aningaasarsiaqartinneqarlutit. Assersuutigalugu akunneq ataaseq qaangiuttooruit akunnermik ataatsimik affarmillu aningaasarsiaqartinneqartutit.

Nalinginnaasumilli qaangiuttoornerit sulinnginnermut atortartussaavatit. Tassa imaappoq piffissami allami suliffigisassaraluanni sulinngiffeqarlutit. Tamanna periarfissaqanngippat qaangiuttoornitit aningaasarsissutigisinnaavatit.


Immikkut pissutsit
Kikkut tamarmik qaangiuttoornermut immikkut aningaasarsisinnaanngillat, tamatumunnga pissutaasinnaavoq qaangiuttoorneq atorfeqarnermi atugassarititaasunut ilaanera. Assersuutigalugu makkuusinnaapput

  • Aqutsisutut atorfeqaruit (piffissaq suliffiusussaq sivisunerpaaffeqarnani)
  • Imaluunniit suliartoqquneqaratarsinnaanermut tapeqaruit, tamatumani suliartoqquneqaratarsinnaanermut pisussaaffiit naammassigukku aningaasarsiaqassutigissanagu


Malugiuk
Qaangiuttoornermut aningaasarsiaqarsinnaatitaanersutit atorfiit suliassaqarfinnullu isumaqatigiissut apeqqutaapput.


Piffissami nikerartumi sulineq
Aammattaaq suliffeqarfinni amerlasuuni piffissami nikerartumi sulisoqartarpoq. Tamanna isumaqarpoq isumaqatigiissutigalugu killilimmik kingusinnerusukkut suliartorsinnaasutit imaluunniit siusinnerusukkut soraarsinnaasutit, piffissaq nalinginnaasumik suliffiusussaq malitsillugu. Piffissami nikerartumi sulisarluni aaqqissuussineq malillugu atorfeqaruit qaangiuttoortarnermut maleruaqqusat qanoq paasinissaat immikkut eqqumaffiginiassavat. (Pinerit tamaasa isumaqatigiissutigineqartassaaq).

Qaangiuttoortarneq piffissamilu nikerartumi sulineq pillugit annertunerusumik paasisaqarusukkuit aqutsisunnut sinniisussinnulluunniit attaveqassaatit.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl