Qaangiuttoorneq

Nalinginnaasumik paasissutissiineq 

Kalaallit Nunaanni suliffeqarfiit pisortanit namminersortuniillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Tamatuma saniatigut pisortani atorfeqartunut atorfinitsinneqarnermi atugassarititaasut isumaqatigiissummi sulisut ataasiakkaat atorfinitsinneqarneranni malinneqartuni aamma maleruagassiorneqarput, ilaatigullu namminersortuni atuuttumik. Matuma kinguliani allassimasut pisortat suliassaqarfiannut taamaallaat tunngatinneqarput.

Pisortani sulisuuguit piffissaq suliffigisassat nalinginnaasoq sapaatip akunneranut akunnernik 40-nik sivisussuseqassaaq. Akunnerit 40-t taakku ima agguataarneqarput ulluni suliffiusuni tamani piffissap 7.00 aamma 17.00 akornanni akunnerit 8-t sulisassallutit. Tamanna piffissaq nalinginnaasumik suliffiusussamik taagorneqartarpoq.

Nalinginnaasumik suliffigisassavit saniatigut akunnerni sulineq tassaavoq sulineruneq. Assersuutigalugu nal. 17-ip tungaanut akunnerit 8-t sulisimaguit nal. 18-illi tungaanut sulillutit, sulinerullutit akunneqassaatit.

Qaangiuttoorneq tassaavoq “piumaffigineqarluni” sulineruneq. Qaangiuttoornerit aningaasarsissutigisinnaatitaanerit atorfiit suliassaqarfimmilu isumaqatigiissut apeqqutaapput.

Qaangiuttoortarneq piffissamilu nikerartumi sulineq pillugit annertunerusumik paasisaqarusukkuit aqutsisunnut sinniisussinnulluunniit attaveqassaatit.

Qaangiuttoortarneq 

Qaangiuttoornissat illit pisortavillu akornassinni ersarissumik isumaqatigiissutigissavarsi. Nalinginnaasumik qaangiuttoornertut isigineqarput:
• Ullup ataatsip ingerlanerani akunnerit 8-t saniatigut sulineq
• Sapaatip akunneranut akunnerit 40-t saniatigut sulineq
• Nalinginnaasumik suliffiup avataatigut sulineq (piffissat nikinnerat, assersuutigalugu nal. 17.00-ip kingorna imaluunniit sapaatip akunnerata naanerani, tamatumanili maleruaqqusat immikkut ittut atuussinnaapput)

Isumaqatigiissutit atorfiillu ilai qaangiuttoornermut immikkut aningaasarsiaqarsinnaaninnut pisinnaatippaatsit. Tassa imaappoq qanoq sivisutigisumik qaangiuttoornerit apeqqutaatinnagu aningaasarsiaqartinneqarlutit. Assersuutigalugu akunneq ataaseq qaangiuttooruit akunnermik ataatsimik affarmillu aningaasarsiaqartinneqartutit.

Nalinginnaasumilli qaangiuttoornerit sulinnginnermut atortartussaavatit. Tassa imaappoq piffissami allami suliffigisassaraluanni sulinngiffeqarlutit. Tamanna periarfissaanngippat qaangiuttoornitit aningaasarsissutigisinnaavatit.

Immikkut pissutsit 

Kikkut tamarmik qaangiuttoornermut immikkut aningaasarsisinnaanngillat, tamatumunnga pissutaasinnaavoq qaangiuttoorneq atorfeqarnermi atugassarititaasunut ilaanera. Assersuutigalugu makkuusinnaapput:
• Aqutsisutut atorfeqaruit (piffissaq suliffiusussaq sivisunerpaaffeqarnani)
• Suliartoqquneqaratarsinnaanermut tapeqaruit, tamatumani suliartoqquneqaratarsinnaanermut pisussaaffiit naammassigukku aningaasarsiaqassutigissanagu

Piffissami nikerartumi sulineq 

Aammattaaq suliffeqarfinni amerlasuuni nikerartumi sulisoqartarpoq. Tamanna isumaqarpoq isumaqatigiissutigalugu killilimmik kingusinnerusukkut suliartorsinnaasutit imaluunniit siusinnerusukkut soraarsinnaasutit, piffissaq nalinginnaasumik suliffiusussaq malitsillugu. Piffissami nikerartumi sulisarluni aaqqissuussineq malillugu atorfeqaruit qaangiuttoortarnermut maleruaqqusat qanoq paasinissaat immikkut eqqumaffiginiassavat. (Pinerit tamaasa isumaqatigiissutigineqartassaaq).
Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl