Soraarnerussutisiat – Nalinginnaasumik paasissutissiineq

Soraarnerussutisiat – Nalinginnaasumik paasissutissiineq 

Kalaallit Nunaanni suliffissaqartitsineq pisortanit aamma namminersortunit ingerlatsivigineqarpoq. Namminersortut aamma pisortat ingerlassaanni sulinermi atugassarititaasut, susassaqartunut amerlasuunut tunngatillugu inatsisit aqqutigalugit maleruagassiorneqarnikuuvoq. Pisortani atorfilinnut atorfeqarnermi atugassarititaasut, inunnut ataasiakkaanut atuuttut aamma matumani isumaqatigiissutit malillugit maleruagassiorneqarnikuupput. Kinguliini allassimasut pisortani atorfilinnut taamaallaat atuupput.

Innuttaasut tamarmik utoqqalinermi, 65-inik ukioqaleraangamik, utoqqalinersiuteqalernissamut pisinnaatitaapput.

Pisortani atorfeqaruit, nammineerlutit sulisitsisullu akissarsinerit tamaasa illit soraarnerussutisiassannut ikisisarpusi. Tamatuma kingunerisaanik, soraarnerussutisiaqaleruit, nalinginnaasumik utoqqalinersiutit aamma illit soraarnerussutisiaqarfittut katersiffinniit aningaasanik pisartagaqalissaatit, illit atorfeqarnivit ingerlanerani illit aamma sulisitsisuit ikisarsimasasi tunngavigalugit.


Soraarnerussutisiaqarnermut aaqqissuussinerit
Pisortat ingerlassaanni pingaarnertut soraarnerussutisiaqarnermik aaqqissuussinerit pingasut pigineqarput:
  • Tjenestemand-it soraarnerussutisiaat
  • Qaammammusiallit soraarnerussutisiaat
  • SIK-imi ilaasortat – akunnermusiallit aamma qaammammusiallit soraarnerussutisiaat

Soraarnerussutisiaqarnermut aaqqissuussineq sorleq ilinnut atuunnersoq, isumaqatigiissut sorleq atorlugu atorfeqarfeqarsimaninnit aallaaveqassaaq.


Soraarnerussutisianut tapiissutigisartakkat
Illit soraarnerussutisiaqarfittut katersiffinnut qaammatit tamaasa sulisitsisut ikisisassaaq, illit tjenestemand-iunngikkuit. Matuma saniatigut illit nammineerlutit nalinginnaasumik soraarnerussutisianut tapiissutinik aamma akiliisassaatit. Nalinginnaasumik sulisitsisuit soraarnerussutisianut tapiissutit tamakkiisut 2/3-riaataannik akiliisarpoq illit nammineq 1/3-riaammik akiliisutit.

Tapiissutit angissusiat illit akissarsiannit naatsorsorneqartarpoq. Tamatuma kingunerisaanik, akissarsiatit amerlaneruleraluttuinnartillugit, soraarnerussutisiassatit amerliartuinnartarput.

Illit soraarnerussutisianut tapiissutitit eqqortuunersut misissorsinnaavatit, akissarsialerivik aamma sulisoqarnermut allaffimmut imaluunniit illit peqatigiiffinnut saaffiginnillutit.


Soraarnerussutisiaqarfiit
Nalinginnaasumik illit isumaqatigiissutitut atukkavit aalajangertarpaa, soraarnerussutisiaateqarfik sorleq ilaasortaaffigissanerit. Isumaqatigiissutilli ataasiakkaat soraarnerussutisiaateqarfiup ilinnit nammineq toqqarneqarnissaa periarfissiissutigisarpaat. Soraarninngoruit tamatuma malitsigisaanik soraarnerussutisiassannik ikioraaffigisavit illit soraarnerussutisiassatit tunniuttassavai.


Malugiuk
Suliffinnit soraarsitaassaguit, sulinermit soraarnermut patsisaasoq apeqqutaalluni illit soraarnerussutisiassavit amerlassusissaannut sunniuteqarsinnaavoq. Assersuutigalugu illit peqqissutsit patsisigalugu sulinerit isumagisinnaajunnaarlugu, illit napparsimanerit patsisigalugu illit inuussutissarsiorsinnaanivit qanoq appartiginera aallaavigalugu soraarnerussutisiassatit naatsorsorneqarsinnaapput.

Pissutsit taama ittut, suliassaqarfimmut tunngatillugu sulisartut kattuffiata ilaasortaaffivit soraarnerussutisiaateqarfimmut isumaqatigiissutaani atuarneqarsinnaapput.

Katissimasamut aamma meeqqanut maleruagassat immikkut ittut, soraarnerussutisianik pisinnaatitaasup toqukkut qimagunnerani imaluunniit innarluuteqalernerani, taamatuttaaq soraarnerussutisiassanik katersat atorunnaarnerannut, suli soraarnerussutisiaqalernikuunak soraarnerussutisiamut aaqqissuussinermut akiliisarnerit unitsikkukku, maleruagassat atuuttunngortarput.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl