Nuunnermi tapiissutisiat – Pequtit assartorneqarneri

Nuunnermi tapiissutisiat – Pequtit assartorneqarneri 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit aqqutigalugit maleruagassiorneqarsimapput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarsimapput. Kinguliini allassimasut pisortani atorfilinnuinnaq atuupput.

Suliffimmik nutaamik peqalernermut, suliffik nutaaq najugaqarfigisanniit allami inissisimappat, atatillugu nuunnermi aningaasartuutinik amerlasuunik nassataqarsinnaavoq. Pisortani aalajangersimasumik atorfinitsinneqaruit, taamaammat nuunnermi tapiissuteqarfigineqarnissamut pisinnaatitaasinnaavutit. Nuunnermi tapiissutisiat ilagisinnaavaat sulisitsisuit pequtit assartorneqarneri akileraat.

Pequtivit assartorneqarnerannut pisinnaatitaanersutit atorfissarsiuussinermi atuarneqarsinnaassaaq.

Pequtivit assartorneqarnerisa akilerneqarnissaannut pisinnaatitaaguit, sulisitsisuit akilissavai makku

  • Pequtivit poortorneqarnerat
  • Aamma illit najugaqarfittaannut nassiussineq


Pequtivit assartorneqarnerisa akilersinnissaat pisinnaaniarukku, sulisitsisuit suliffeqarfimmut nutserisartumut akuerisaasumut nuunnermi innersuussutinut akiligassaq nassiutissavaa. Matuma kingorna suliffeqarfiup nutserisarfiup attavigissavaatit, isumaqatigiissaasilu pequtitit qaqugu poortorneqassanersut.

Najugaqarfittaannut tikikkugit, suliffeqarfimmut nutserisartumut isumaqatigiissuteqassaatit, pequtitit sumut qaqugulu aggiunneqassanersut.


Annerpaaffissatut killiliussaq
Pequtivit qanoq amerlatigisut sulisitsisunnit akilerneqarsinnaanerannut killiliussamik peqarpoq. Ilaquttatit qanoq amerlatiginersut matumani apeqqutaavoq:

  • Kisermaat pequtit 15 m3 tikillugu assartorneqarnerat akilersissinnaavaat
  • Aappariit pequtit 30 m3 tikillugu assartorneqarnerat akilersissinnaavaat
  • Meeraq ataatsimik ilanerit tamaasa pequtit 5 m3 tikillugu initutigisut ilassutaasarput


Assersuutigalugu katissimaguit marlunnillu meeraqarlusi, sulisitsisuit akiligassaanik pequtit 40 m3 tikillugu assartortissinnaavatit.
Paarlattuanik kisimiittuuguit ataatsimik meeraqarlutit 20 m3 tikillugu assartortissinnaavatit.

Pequtit amerlanerusut assartorneqarnissaat atorfissaqartikkukku, initussuseq kubikmeter annertunerusoq nammineq akilissavat.


Sillimmasiineq
Pequtivit amigaateqarsinnaanerannut imaluunniit ajoqusersinnaanerannut matussutissamik, sulisitsisut nutaaq illit pequtinnut sillimmasiissaaq. Illit kisermaajunersutit imaluunniit ilaqutaqarnersutit, sillimmasiinermi aningaasat angissusissaannut aallaaviussaaq:

  • Kisermaanut annerpaamik sillimmasiisoqarsinnaavoq 182.500 kr. tikillugu
  • Ilaqutariinnut annerpaamik sillimmasiisoqarsinnaavoq 364.800 kr. tikillugu


Pequtit toqqorsivimmiisinnerat
Pisut ilaanni pequtitit toqqorsivimmiisissallugit pisariaqarsinnaavoq. Tamanna assersuutigalugu pisariaqalersinnaavoq:

  • Umiarsuaq pequtinnik usisoq, illit inissiartaassannut suli nuunngitsutit tikissimappat
  • Inissaaleqineq pissutigalugu piffissap ilaani utaqqiisaasumik inissiami pequtsersukkami najugaqaruit


Pequtitit toqqorsivimmiissappata, toqqorsivimmiisitsineq sulisitsisunnit nutaamit akilerneqassasoq qinnuteqaatigisinnaavat.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl