Illuatungeriinnik tusarniaasarneq – Aalajangiisarnernut assersuutit

Illuatungeriinnik tusarniaasarneq – Aalajangiisarnernut assersuutit 

Kalaallit Nunaanni suliffeqarfeqarfiit pisortanit namminersortunillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Taakkua saniatigut pisortat suliffeqarfiini sulisut atorfinitsitaanerannut atugassarititaasut, isumaqatigiissutit sulisunut ataasiakkaanut atuuttut malillugit aaqqitaapput. Ataani pineqartut pisortat suliffeqarfiini sulisunuinnaq atuupput.


Illuatungeriinnik tusarniaaneq
Ilaannikkooriarluni suliffinni suliffivilluunniit avataani pisoqartarpoq atorfeqarninnut kingunerlutsitsisinnaasunik. Assersuutigalugu illit sulisitsisunnut nalunaaqqaarnak suliartunngitsuukulasinnaavutit, imaluunniit assersuutigalugu imigassamut tunngatillugu suliffinni maleruaqqusanik unioqqutitsisinnaavutit. Taamatut pisoqartillugu susoqarsimanersoq aamma sooq taama pisoqarsimanersoq pillugit isummavit tusarnissaa sulitsisuit tusassallugu pisariaqartissinnaavaa. Tamanna illuatungeriinnik tusarniaanermik taaneqartarpoq.

Illuatungeriinnik tusarniaasarnermi siunertaavoq, suliamut tunngassutilinnik tamanik qulaajaasarnissaq, taamaalilluni sulisitsisoq naliliinissamut tunngavissaqalissaaq tusarniaanerlu aallaavigalugu aalajangiisinnaanngorluni.

Illuatungeriinnik tusarniaasoqartillugu oqaloqatiginninnissamut aggersarneqassaatit, aggersaanerup oqaluuserisassartaani takuneqarsinnaassaaq illuatungeriinnik tusarniaanermi suna siunertarineqarnersoq.

Ataatsimiinnermi illersuisussannik ilaqarsinnaatitaavutit, taamaaliornissallu siunnersuutigineqarpoq. Sulisup illersuisua sulisut sinniisorisinnaavaat, kisianni tunngaviusumik kinaluunniit ataatsimiinnermi illersuisuusinnaavoq.

Tamatuma kingorna piffissaqartinneqassaatit suliamut tunngatillugu nassuiaassuteqarnissannut. Tamanna oqaasiinnartigut allakkatigullu sulisitsisunnut tunniussinnaavat.


Aalajangiineq
Piffissatut killiliussaq nallerpat, paasissutissat saqqummiunneqartut aallaavigalugit sulisitsisut naliliissaaq. Piffissatut killiliussaq malinngikkukku, suliamut tunngatillugu oqaaseqaatigisatit sulisitsisup naliliinermini ilanngutissallugit pisussaaffiginngilaa.

Sulisitsisut suliamut tunngatillugu aalajangeereerpat, aalajangiussaa allaganngorlugu pissarsiarissavat.


Aalajangiinerit
Sulisitsisut illuatungeriinnik tusarniaaneq aallaavigalugu assigiinngitsunik aalajangiussaqarsinnaavoq, assersuutigalugit:

  • Mianersoqqussummik tunineqassasutit
  • Soraarsitaassasutit
  • Ingerlaannartumik soraarsitaassasutit
  • Suliamut tunngatillugu iliuuseqaqqittoqassanngitsoq


Mianersoqqussummik tunniussineq
Mianersoqqussummik tunineqaruit, suliaq unitsinneqassaaq. Pisorli mianersoqqussaaffigisat uteqqikkukku atorfeqarninnut kingunerlutsitsisinnaavoq.


Soraarsitsineq
Soraarsitaaguit, isumaqatigiissutini soraarsitsinissamut kalerriiffissatut aalajangersagaq naapertorlugu soraarsinneqassaatit. Soraarsitsinissamut kalerriiffissap sivisussusaanut apeqqutaavoq

  • qanoq sivisutigisumik atorfik suliffigisimanerit
  • aamma isumaqatigiissutit ilinnut tunngasut


Soraarsitsinissamut kalerriiffissap sivisussusaa nalinginnaasumik qaammatit pingasut arfinillillu akornanniittarpoq.


Ingerlaannartumik soraarsitsineq
Ingerlaannartumik soraarsitaaguit, atorfeqarnerit ingerlaannartumik atorunnaarsinneqassaaq.


Malugiuk
Sulisitsisut ilinnut tusarniaaqqaarnani illit atorfeqarninnut kingunerlutsitsisinnaasumik aalajangiussaqarsinnaanngilaq.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl