Illuatungeriinnik tusarniaasarneq – Nalinginnaasumik paasissutissiineq

Illuatungeriinnik tusarniaasarneq – Nalinginnaasumik paasissutissiineq 

Kalaallit Nunaanni suliffeqarfeqarfiit pisortanit namminersortunillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Taakkua saniatigut pisortat suliffeqarfiini sulisut atorfinitsitaanerannut atugassarititaasut, isumaqatigiissutit sulisunut ataasiakkaanut atuuttut malillugit aaqqitaapput. Ataani pineqartut pisortat suliffeqarfiini sulisunuinnaq atuupput.


Illuatungeriinnik tusarniaaneq
Ilaannikkooriarluni suliffinni suliffivilluunniit avataani pisoqartarpoq atorfeqarninnut kingunerlutsitsisinnaasunik. Assersuutigalugu

  • sulisitsisunnut nalunaaqqaarnak suliartunngitsuukulasaruit
  • sivisuumik napparsimaguit imaluunniit napparsimakulaaruit
  • imaluunniit suleqatit isumaqatigilersinnaanngikkukku


Taamatut pisoqartillugu susoqarsimanersoq aamma sooq taama pisoqarsimanersoq pillugit isummavit tusarnissaa sulitsisuit tusassallugu pisariaqartissinnaavaa. Tamanna illuatungeriinnik tusarniaanermik taaneqartarpoq.

Illuatungeriinnik tusarniaaneq tassaavoq, suliamut tunngassutilinnik tamanik tusarniaaneq. Illuatungeriinnik tusarniaasarnermi siunertaavoq, suliamut tunngassutilinnik tamanik qulaajaasarnissaq, taamaalilluni sulisitsisoq naliliinissamut tunngavissaqalissaaq tusarniaanerlu aallaavigalugu aalajangiisinnaanngorluni.


Illuatungeriinnik tusarniaanerup allanneqarnissaa
Suliamut tunngatillugu tusarniaaffigineqassaguit ataatsimiigiaqquneqassaatit. Ataatsimiinnermi illersuisussannik ilaqarsinnaatitaavutit. Assersuutigalugu tassaasinnaavoq

  • sulisutut sinniisut
  • imaluunniit inuk alla illit nammineq toqqakkat


Ataatsimiinnermi illuatungeriit tusarniaaffigineqarnerinut tunngatillugu allagaq pissarsiarissavat. Suliap sumut tunngassuteqarneranut aamma sooq tusarniaasoqarnersoq pillugit taanna nassuiaataavoq.

Aggersarneqaruit pisussaavutit takkunnissamut ataatsimiinnermilu oqalliseqataanissamut. Innersuussutigineqarpoq, ataatsimiinnermi illersuisussamik ilaqarnissaq.
Tamatuma kingorna piffissaqartinneqassaatit suliamut tunngatillugu nassuiaassuteqarnissannut. Tamanna oqaasiinnartigut allakkatigullu sulisitsisunnut tunniussinnaavat.


Aalajangiineq
Piffissatut killiliussaq nallerpat, paasissutissat saqqummiunneqartut aallaavigalugit sulisitsisut naliliissaaq. Piffissatut killiliussaq malinngikkukku, suliamut tunngatillugu oqaaseqaatigisatit sulisitsisup naliliinermini ilanngutissallugit pisussaaffiginngilaa.

Sulisitsisut suliamut tunngatillugu aalajangeereerpat, aalajangiussaa allaganngorlugu pissarsiarissavat.


Naammagittaalliuuteqarneq
Sulisitsisuit aalajangiineranut isumaqataanngikkuit, kattuffiit attavigisinnaavat. Kattuffivit taperserunitit, suliaq sulisitsisut peqatigalugu qaqileqqissavaat.


Malugiuk
Sulisitsisut ilinnut tusarniaaqqaarnani illit atorfeqarninnut kingunerlutsitsisinnaasumik aalajangiussaqarsinnaanngilaq.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl