Suliffeqarfimmik naliliineq (APV)

Nalinginnaasumik paasissutissiineq 

Suliffimmi avatangiisit pillugit inatsit naapertorlugu suliassat tamarmik isumannaallisaaneq peqqissuserlu eqqarsaatigalugit isumannaatsumik pilersaarusiorneqassapput, aaqqissuunneqassapput isumagineqarlutillu. Tassa suliffeqarfiit tamarmik sulisullit suliffeqarfimminnik naliliissapput (APV).

Suliffeqarfimmik naliliisarnermi siunertarineqarpoq qulakkiissallugu:
  • Suliffeqarfimmi isumannaallisaaneq peqqissuserlu pillugit suliaqarnermi suliffimmi avatangiisitigut ajornartorsiutaanerpaasut tamarmik ilanngunneqartarnissaat
  • Ajornartorsiutit aaqqinneqarnissaat pillugit suliffeqarfiup ataqatigiissakkamik ingerlaavartumillu suliaqarnissaa

Suliffeqarfiit tamarmik sulisullit suliffeqarfimminnik naliliisassapput, qanorluunniit suliffeqarfik atuarfiugaluarpat, utoqqaat illuaagaluarpat, meeqqeriviugaluarpat imaluunniit aalisakkeriviugaluarpat.

Piumasaqaatit nakkutilliinerlu 

Suliffeqarfimmik naliliineq suliffeqarfiup atortarpaa suliffeqarfimmi isumannaallisaanermik peqqissusermillu nalilersuinermut aamma nalilersueqqinnermut. Tassa suliffeqarfimmik naliliineq Sullivinnik Nakkutilliisoqarfimmut nassiunneqassanngilaq imaluunniit Sullivinnik Nakkutilliisoqarfimmit akuersissutigineqassanngilaq. Ukununngali atorneqarsinnaanngortinneqarsimassaaq:
  • Sullivinnik Nakkutilliisoqarfik
  • Suliffeqarfiit aqutsisui
  • Suliffeqarfinni sulisut allat

Sullivinnik Nakkutilliisoqarfimmit suliffeqarfiit ataasiakkaat nakkutigineqartarput, nakkutigineqartarnerinilu ilaatigut makku qulakkeerneqartartussaapput:
  • Allaganngorlugu suliffeqarfimmik naliliisimanersut
  • Naliliineq pissarsiassaanersoq
  • Sulisut suliffeqarfimmik naliliinissamut pilersaarusioqataasimanersut aamma nalileeqataasimanersut

Suliffeqarfimmik nalilersuineq aqutsisut sulisullu suleqatigiillutik suliarissavaat. Suliffeqarfimmi isumannaallisaanermut tunngatillugu piumasaqaatitaqarsimappat, suliap ingerlanneqarnerani ilaatinneqassaaq sulisunullu atuutsinneqassalluni.

Suliffeqarfimmik naliliineq sivikinnerpaamik ukiut pingasukkaarlugit nalilersoqqinneqartassaaq. Taassuma saniatigut suliffimmi isumannaallisaanermut peqqissusermullu pingaarutilinnik allanngortoqartillugu nalilersoqqinneqartassaaq. Soorlu assersuutigalugu:
  • Sulineq allanngortinneqarpat
  • Suleriaaseq allanngortinneqarpat
  • Sulinermi iliuuserineqartartut allanngortinneqarpata

Suliffeqarfimmik naliliinerup imai 

Suliffeqarfimmik naliliinermi suliffinni ataasiakkaani sulinermi avatangiisit erseqqissarneqassapput. Suliffimmi pissutsit tamarmik nalilersorneqartassapput. Imaanngilarli suliffinni tamani sunnguit tamaasa ilanngussorneqartassasut.

Suliffeqarfimmik naliliinermi timikkut tarnikkullu atugassarititaasut pineqartut:
  • Suliffimmi timikkut atugassarititaasunik naliliinermi, suliffimmi avatangiisit pillugit inatsimmi suliffimmi isumannaallisaanikkut peqqissutsitigullu pissutsit pillugit piumasaqaatigineqartunik suliffik malinninnersoq nalilersorniarlugu, suliffimmi sulitilluni timikkut atugassarititaasut pisortap misissortassavai
  • Suliffeqarfimmi tarnikkut atugassarititaasunik naliliinermi suliffimmi tarnikkut atugassarititaasut nassuiarneqassapput

Assigiinngitsutigut suliffimmi tarnikkut atugassarititaasut nalilersorneqarsinnaapput, suliffimmi aqutsisup minnerpaamik qulakkeertariaqarpaa, naliliinerup uku immikkoortut sisamat imarissagai:
  • Suliffimmi sulitilluni tarnikkut atugassarititaasut suussusersinissaat erseqqissarneqarnissaallu
  • Suliffimmi avatangiisitigut ajornartorsiutit nassuiarneqarnissaat nalilersorneqarnissaallu
  • Suliffimmi avatangiisitigut ajornartorsiutit aaqqinneqarnissaannut iliuusissatut pilersaarutinik pingaarnersiuinissaq inissiinissarlu
  • Iliuusissatut pilersaarutip malitseqartinnissaanut malittarisassaqarnissaq
Sulisilluni Ajoqusernerit pillugit Sullissivik
Aqqusinersuaq 8, 9. sal
Postboks 156
3900 Nuuk

Oqarasuaat: 34 27 90 7 56 56 00
Fax: 34 27 99
E-mail: cfa@ask.dk

Ammasarfii:
Ulluinnarni 10.00 - 12.00