Sulisilluni ajoqusersinnaanermut isumannaarineq

Nalinginnaasumik paasissutissiineq 

Sulisitsisut tamarmik sulisumik sulisillutik ajoqusersinnaanerannut sillimmasiisussaatitaapput. Sulisilluni ajoqusernermi pisut marluk assigiinngitsut matussuserneqarsinnaapput:
  • Sulisilluni ajoqusernerit
  • Inuussutissarsiornermi nappaatigilikkat

Sulisilluni ajoqusernermi sulisitsisuit sillimmasiisarfiata taarsigassaqartinneqassaguit taarsigassaqartissavaatit, aningaasartuutaasullu akilissallugit ilaatigut suliap Ajoqusernerit pillugit Sullissivikkut suliarineqarneratigut. Inuussutissarsiorluni nappaateqalerneq pineqartillugu, Suliffissarsiuussisarfiup Inuussutissarsiornermi napparsimalersimasunut sillimmasiisarfianit taarsiivigineqarnissaq akilissavaa.

Sulisilluni Ajoqusernerit pillugit Sullissiviup nittartagaa alakkaruk www.cfa.gl.

Ajoqusernerit suussusaat 

Sulisilluni ajoqusernerit
Ajoquserneq timikkut ajoqusernerulluniluunniit tarnikkut ajoquserneruvoq, tassanngaannartumik imaluunniit ullut tallimat ingerlaneranni pisup imaluunniit sunniiffigineqarnerup kinguneranit pinngortoq, assersuutigalugu maskiinap atornerani inussavit ilaat ataaseq ilanngartissimagukku.

Inuussutissarsiornermi nappaatigilikkat
Inuussutissarsiornermi nappaatigiligaq sulinermik imaluunniit sulinermi pissutsinit aallaaveqartumik nappaataavoq. Nappaat piffissami sivikinnerusumi sivisunerusumiluunniit sunniivigineqarnermit pilersinnaavoq, assersuutigalugu avatangiisini nipiliortuni ukiut arlallit ingerlaneranni sulisimanerup kingorna tusillassimasinnaavutit.

Taarsiivigitinneq 

Taarsiivigitinniaruit imaluunniit allatigut tapiiffigineqarniaruit, ajoqusernerit sulisilluni ajoqusernertut akuerineqaqqaartussaavoq. Ajoquserneq imaluunniit inuussutissarsiornermi nappaatigiligaq sulisilluni ajoqusernertut akuerineqassanersoq Sulisilluni Ajoquserneq pillugu Sullissiviup aalajangertarpaa. Taamatuttaaq sulisillutit ajoquserninnut atatillugu taartisiassavit annertussusaat Sulisilluni Ajoquserneq pillugu Sullissiviup aalajangertarpaa.

Assersuutigalugu taartisiat tassaasinnaapput:
  • Inuunerup sinnera tamaat ajoquteqalernermi ajunngitsorsiat
  • Inuussutissarsiorsinnaanermik annaasaqarnermut taarsiissutit
  • Ullormusiat
  • Katsorsartinnermut aamma atortunut ikiuutaasunut allanullu aningaasartuutinut matussutit
  • Pilersuisumik annaasaqarnermi (toqusoqarneratigut) ikaarsaarnermi ikiorsiissutit/taartisiat

Ajoqusernermik nalunaaruteqarneq 

Suliffinni ajoqusersimaguit imaluunniit suliffiit pissutigalugu napparsimalersimaguit, ajoqusernerit imaluunniit napparsimalersimanerit Sulisilluni Ajoquserneq pillugu Sullissivimmut nalunaarutigineqassaaq. Tamannalu pissaaq, ajoqusernerpit kingorna ukioq ataaseq qaangiutsinnagu imaluunniit suliffiit pissutigalugu napparsimalersimanerit paasigukku. Immikkut ittumik pisoqartillugu, kingusinnerpaamik ukiup ataatsip atuunnerata immikkut akuersissutigineqarnissaa periarfissaavoq.

Sulisitsisuit sulinermi ajutoornerit sapinngisamik sukkanerpaamik nalunaarutiginissaanut pisussaaffeqarpoq.

Aammattaaq nakorsaq kigutillu nakorsaa inuussutissarsiornermi napparsimalersimanerit sapinngisamik sukkanerpaamik nalunaarutiginissaannut pisussaaffeqarput.

Illit nammineerlutit sulisilluni ajoqusernermik nalunaaruteqarnissannut pisinnaatitaaffeqarputit. Sulisitsisuit, nakorsap imaluunniit kigutit nakorsaata sulisilluni ajoquserneq nalunaarutiginngippagu, illit nammineerlutit nalunaarutigisinnaavat. Sulisilluni ajoquserneq nittartakkatigut nalunaarutigisinnaavat ugguuna www.anmeld.gl.

Ajoqusernerup nalunaarutigineqarnerata kingorna 

Sulisilluni Ajoquserneq pillugu Sullissivimmit illit nalunaarutit tiguneqareerpat, suliaq sulisilluni ajoqusernerunersoq imaluunniit inuussutissarsiornermi napparsimassutaalersimanerunersoq naliliivigissavaat. Tamatuma kingorna paasissutissat pisariaqartut Sulisilluni Ajoquserneq pillugu Sullissivimmit pissarsiariniarneqassapput.

Nalinginnaasumik qanoq pisoqarsimanersoq paasiniarlugu, ajoqusernermut suna pissutaanersoq paasiniarlugu, ilinnit, sulisitsisunnit nakorsamillu paasissutissanik pissarsiniartoqartarpoq. Pisumut imaluunniit sunniutaannut tunngatillugu nalornisimagunik, suliami takunnissimasut allalluunniit tusarniassavaat.

Naammagittaalliuteqarnissamut periarfissat 

Suliamut ilinnut tunngasumut tunngatillugu Sulisilluni Ajoquserneq pillugu Sullissivimmit aalajangiunneqartut pillugit naammagittaalliorsinnaavutit. Aallaqqaammut naammagittaalliutit Sulisilluni Ajoquserneq pillugu Sullissivimmut nassiutissavat tassanngaanniillu Danmarkimi Naammagittaalliuteqartarfimmut toqqaannartumik nassiunneqassaaq.
Sulisilluni Ajoqusernerit pillugit Sullissivik
Aqqusinersuaq 8, 9. sal
Postboks 156
3900 Nuuk

Oqarasuaat: 34 27 90 7 56 56 00
Fax: 34 27 99
E-mail: cfa@ask.dk

Ammasarfii:
Ulluinnarni 10.00 - 12.00