Inissiami najukkanni iluarsaassineq, pitsanngorsaaneq alliliinerlu – Qinnuteqarneq

Inissiami najukkanni iluarsaassineq, pitsanngorsaaneq alliliinerlu – Qinnuteqarneq 

Inissiami najukkanni iluarsaassineq, pitsanngorsaaneq alliliinerlu akisusinnaavoq. Taamaattumik inissiami najukkanni iluarsaassinissamut, pitsanngorsaanissamut alliliinissamulluunniit taarsigassarsinissamut Naalakkersuisunut qinnuteqarsinnaavutit. Sanaartornermut aningaasartuutit tamarmiusut 40 %-ii tikillugit Naalakkersuisunit taarsigassarsitinneqarsinnaavutit. Sinneruttut 60 %-it aningaasalersornissaat illit nammineerlutit isumagissavat.


Qinnuteqarneq
Inissiami najukkanni iluarsaassinissamut, pitsanngorsaanissamut alliliinissamulluunniit qinnuteqassaguit qinnuteqaasiussaatit. Qinnuteqaatip imarissavai:

  • Iluarsaassinissaq, pitsanngorsaanissaq alliliinissarluunniit pillugu kissaatinut nassuiaat
  • Inissiaq najukkat pillugu nassuiaat, tassunga ilanngullugit pisoqaassusaa, angissusaa pitsaassusaalu
  • Iluarsaassinissamut, pitsanngorsaanissamut alliliinissamulluunniit aningaasartuutissat katinnerinut missingersuut
  • Suliassaq nunaminertamik atugassinneqarnissamik pisariaqartitsiviuppat, kommunalbestyrelse-miit nunaminertamut inniminniissut nunaminertamillu atugassinneqarneq
  • Nammineerlutit aningaasalersuutissanik pissarsisinnaaninnut uppernarsaat
  • Cpr. normut aamma najukkannut uppernarsaat


Qinnuteqaat uunga nassiutissavat:

Aningaasaqarnermut Sulisoqarnermullu Aqutsisoqarfik (ASA)
Postboks 1039
3900 Nuuk

Aamma qinnuteqaat e-mail-ikkut nassiussinnaavat, uunga: asa@nanoq.gl.


Neriorsuut aamma aningaasanik tunniussineq
Taarsigassarsiassat aallaqqaammut neriorsuutitut tunniunneqassapput. Aatsaat iluarsaassineq, pitsanngorsaaneq alliliinerluunniit naammassippat taarsigassarsiassat tunniunneqassapput, ukulu takutissinnaassavatit:

  • sanaartornermut naatsorsuutit uppernarsarneqarsimasut
  • qularnaveeqqusiussaqarluni taarsigassarsinermi allagartap nalunaarsorsimasup naqissuserneqarsimasullu naqeqqaarnera uparuaanertaqanngitsoq
  • sillimmasiissut
  • qularnaveeqqusiiffigisap nalunaarutaata nalunaarsorsimasup naqeqqaarnera


Alliliinissamut taarsigassarsinissamut neriorsuummik pissarsisimaguit, aatsaat atuilernissamut akuersissummik takutitsiguit taarsigassarsiassat akilerneqarsinnaalissapput.

Taarsigassarsiassat siusinnerpaamik ukiumi taarsigassarsinissamut aningaasaliissutissat Inatsisartut aningaasanut inatsisaannut ilanngunneqarfianni akilerneqarsinnaapput.


Taarsigassarsiat utertillugit akilersornerat
Taarsigassarsiat erngerlutit utertillugit akilernissaannut pisussaaffeqarputit:

  • Inissiaq isumannaatsumik aserfallatsaalisimanngikkukku, taamaalillunilu Naalakkersuisut qularnaveeqqusiinerat ajornerulersinneqarpat
  • Inissiaq ikuallattoornissamut anorersuarmillu ajoquserneqarnissaanut qularnaveeqqusersimanngikkukku
  • Namminersorluni inissiaatinik attartortittakkanik attartortitsinermi aningaasartuutit tunngavigalugit attartornermut akiliuteqartitsisarnermut maleruagassat uniorlugit inissiaq attartortikkukku
  • Inissiami ininik inuussutissarsiorfiusunik pilersitsiguit imaluunniit inissiamiit inuussutissarsiummik ingerlatsiguit. Taamaattorli inuussutissarsiutit iluanaarnannginnerusut inissiamit ingerlanneqarsinnaapput
  • Inissiamiit allamut nuukkuit


Taamatuttaaq inissiamik piginnittut nikippata taarsigassarsiat erngerlutit utertillugit akilissavatit, piginnittut nikinnerat illit aapparisavillu akornanni pisimanngippat.


Malugiuk
Inissiamut najukkannut ataasiinnarmik, aammalu annerpaamik 283.500 koruuninik taarsigassarsisinnaagavit.

Naalakkersuisuni aningaasaliissutini aningaasat naammanngippata, taarsigassarsitinneqarnissat qulakkeerneqarsinnaanngilaq.

Allaaserisat attuumassutillit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl