Illuliassanik sanaqataafiusunik qinnuteqarneq 2018

Illuliassanik sanaqataaffiusunik agguaasarneq 2017-imiit kommunit INI-miit tiguaat. 2018-imi sanaqataaffigalugu illuliorusukkaanni Qeqqata Kommunianut illuliassamik qinnuteqartoqarsinnaavoq, Teknikkimut Avatangiisinullu immikkoortortaqarfimmut, kingusinnerpaamik 15. februar 2018.
7. december 2017

Peqateqarluni nammineq illulianik sanaartorneq – Illorput 2100 

 

Peqateqarluni nammineq illuliassat katiteriaannaat nunaqarfinnut isorliunerusunullu neqeroorutigineqarsinnaallutillu sanaartorneqarsinnaapput, ima paasillugu, peqateqarluni nammineq illulianik sanaartorsinnaaneq aaqqiissut atorlugu illoqarfinni Qaqortumi, Nuummi Sisimiuni Ilulissanilu illunik katiteriaannarnik sanaartortoqarsinnaanngilaq, illoqarfinni taakkunani illuliornissamut realkredit-imut attartornissamut periarfissaqarmat.

Peqateqarluni nammineq illuliassat katiteriaannaat Illorput 2100-upput, angissutsillu marluk tullinnguuttut toqqarneqarsinnaallutik; 91 m2 aamma 112 m2. Illorput 2100-mut nassuiaat ilanngunneqartoq takuuk.
Maluginiarneqassaaq, angissutsinut marlunnut akit aalajangersimasuummata, taamaattorli ukioq kaajallallugu imermut kiisalu kuuffissuaqarnissamut tunngasumik toqqaasoqarsinnaalluni.

Piumasaqaatit
Sanaartoqatigiinnut aaqqissut aqqutigalugu illuliornissamut qinnuteqarnermi, piumasaqaatit tullinnguuttut naammassineqassapput:

• Peqateqarluni nammineq illuliassamik katiteriaannarmik sanaartornissamut qinnuteqartoq, sanasutut ilinniarsimasunik ikiorneqarnissamut isumaqatigiissuteqarsimassaaq.
• Qinnuteqartoq ukiuni kingullerni tallimani inuussutissarsiuuteqarsimassaaq, namminerlu sanaartorsinnaassalluni.
• Illup sanaartorneqarnerani qinnuteqartoq ilinniarsimasumik ikiorteqassaaq.
• Qinnuteqartoq Kalaallit Nunaanni najugalittut inuit nalunaarsorsimaffianni nalunaarsorsimassaaq.
• Qinnuteqartoq Boligstøtte aqqutigalugu imaluunniit pisortanit tapiiffigineqarsimasumik illuuteqariissanngilaq.
• Sanaartornissamik akuersissummik tunineqareernermit, ukiut marluk kingorna illu naammassineqareersimassaaq/atulereerneqareersimassaaq.

Minnerpaatut annerpaatullu isertitassat
Illoqutigiinnut minnerpaatut isertaasut 0-180.000 koruuninik annertussuseqarput. Illoqutigiit isertitaat taakku akornanniippata, taava sanaartornermut aningaasartuutit tamakkiisut 5 procentii nammineq aningaasaliissutigineqassapput.

Annerpaatut isertitat killiffiat 450.000 koruuniuvoq. Ukiumut 450.000 koruunit sinnerlugit isertitaqarnermi, erniaqanngitsunik akilersugassaanngitsunillu peqateqarluni nammineq illulianik sanaartornermut taarsigassarsititsisoqarsinnaanngilaq.

Ilitsersuut tamakkiisumik uani atuarsinnaavat

Takussutissiaq uani atuarsinnaavat