Inissialiornermut tapiissuteqartarneq (Boligstøttehuse) aqqutigalugu illuutit – Utertillugu tunniussineq

Inissialiornermut tapiissuteqartarneq (Boligstøttehuse) aqqutigalugu illuutit – Utertillugu tunniussineq 

 

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq Namminersorlutik Oqartussanit illumik sananissamut aningaasanik taarsigassarsisimassaaq. Taamaammat taarsigassarsiarisat nalikillilerneqarnissaat imaluunniit taarsigassarsiarisat tamakkiisumik akilersimanissaat tikillugu, Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuummik piginnittutut INI attaveqarfigisartussaavat.


Inissialiornermut tapiissuteqartarneq aqqutigalugu illuummik piginnittuuguit, najugaqarfiginissaalu kissaatigiunnaarlugu, taava illu Namminersorlutik Oqartussanut utertillugu tunniussinnaavat.



Piumasaqaatit

Inissialiornermut tapiissuteqartarneq aqqutigalugu illuutillit tamangajalluinnarmik illuutitik Namminersorlutik Oqartussanut utertissinnaavaat. Kapitel 6-imik taaneqartartumik illumik pigisaqaruit, taamaattumillu qaammatikkaartumik akiliuteqartarnerninnut tapiissutinik pisarnak, illugisat Namminersorlutik Oqartussanut utertillugu tunniussinnaanngilat. Paarlattuanik utertillugu tunniunnagu, illumik taamatullu illumut atatillugu akiitsunnik tiguserusuttumik nassaartariaqarputit, nangitsisussamik.



Qinnuteqarneq

Inissialiornermut tapiissuteqartarneq aqqutigalugu illuutit Namminersorlutik Oqartussanut utertillugu tunniunnissaa soqutigigukku, qinnuteqarnermi immersugassaq immersussavat. Quppernermi uani immersugassat ataanni immersugassaq nassaarisinnaavat. Qinnuteqaatit najukkanni INI-p allaffeqarfianut nassiussinnaavat tunniulluguluunniit. Taamatuttaaq qinnuteqaatip suliarinissaanut ikiortikkumallutit allaffeqarfimmut saaffiginnissinnaavutit.


Qinnuteqaatit INI-p isummerfigereerpagu, tunniutissavatit:

  • Illumik piginnittutut utertitsinermut uppernarsaat. Piginnittutut utertitsinermut uppernarsaat atsiussagakku eqqaamassavat aamma piginnittut tamarmik piginnittutut uppernarsaammut atsiussammata
  • Illumut matuersaatit


Matuma kingorna INI-p piginnittutut utertitsinermut uppernarsaat atsiugaq piviusoq Eqqartuussiviup illunik pigisanik nalunaarsuisarfianut nalunaarsugassanngorlugu nassiutissavaa. Piginnittutut utertitsinermut uppernarsaat nutaaq nassiunneqarpat Namminersorlutik Oqartussat piginnittuulersimallutik, illumik illit piginnittuujunnaarsimassaatit.  



Illumit nuunneq

Illumit nuunnginninni, isumagissavatit:

  • Pigisat illumiit anninnissaat
  • Illup eqqiarnissaa aammalu eqqagassaqarsimappat iginnissaat
  • Illu ajoqusernissamut isumannaarneqarsimassaaq
  • Illup innaallagiaqarnera, imeqarnera aamma kiassarnermut uuttuutaasa atorunnaarnerat Nukissiorfinnut nalunaarutigalugu
  • Sillimmasiisarfimmi sillimmasiisimanivit atorunnaarsinnissaa



Illumut matuersaatit INI-p tigugunigit, illup allanik ajoqusersinnaanera sillimaffiginiarlugu  assersuutigalugu makku isumannaassavai:

  • Kiassaateqarfiup aamma imiisiviup imaarnerat
  • Igalaat assiaqusersornerat
  • Namminersorlutik Oqartussat sinnerlugit innaallagissamut, imermut  aamma kiassarnermut uuttuutit atuisutut nalunaarutiginerat



Taarsigassarsiat nalunaarusiornerat

Illit illuutit Namminersorlutik Oqartussanut tunniutereerukku, INI-p taarsigassarsiat naatsorsuusiornerat suliarissavaa, paasiniarlugu illumut atatillugu aningaasanik pissaqarnersutit.


Siullermik illu nalilersuiffigineqassaaq. Tassa imaappoq, illu qanoq naleqarnersoq aalajangersarneqassaaq. Taava taarsigassarsiat sinneruttut akiitsuusinnaasullu kinguaattoorutit nalinganiit qanoq naleqarneranik aalajangersakkamit ilanngaatigineqassapput. Taarsigassarsiat naatsorsuusiornerat INI-p suliarereeruniuk, nalilersuinerup nuutinnera ilanngullugu ilinnut nassiutissavaa:

  • Illu paarilluarsimagukku akiliutissatillu piffissaq eqqorlugu akilertarsimallugit, aningaasanik utertoorutissaqassajunnarsivutit. Taamaattoqassappat illit aningaaserivimmi konto-nnut taakku ikineqassapput
  • Paarlattuanik illu paarilluarsimanngikkukku kinguaattoorutinillu akiligassaqarlutit, akiligassamik annertuumik pissarseratarsinnaavutit


Annertunerusumik akiligassanissimaguit, akiitsut isumakkeerneqarnissaannut qinnuteqarnissannut periarfissaqarputit. Taarsigassarsiat naatsorsuusiornerat tigugukku, kingusinnerpaamik qaammat ataaseq qaangiuttoq akiitsuit isumakkeerneqarnissaat qinnuteqaatigisinnaavat. Tamanna nallertinnagu taama iliunngikkuit, akiitsut INI-p akiliisitsiniartartumut nalunaarutigissavaa, akiitsut pinngitsaaliissummik akilersinniarumallugit.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl