Inissialiornermut tapiissuteqartarneq (Boligstøttehuse) aqqutigalugu illuutillit pisussaaffii – Nalinginnaasumik paasissutissiineq

Inissialiornermut tapiissuteqartarneq (Boligstøttehuse) aqqutigalugu illuutillit pisussaaffii – Nalinginnaasumik paasissutissiineq 

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq illumik piginnittoq Namminersorlutik Oqartussanit illumik sananissamut aningaasanik taarsigassarsisimassaaq. Taamaammat taarsigassarsiarisat nalikillilerneqarnissaat imaluunniit taarsigassarsiarisat tamakkiisumik akilersimanissaat tikillugu, Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq.  Tamatuma kingunerisaanik inissialiornermut tapiissuteqartarneq aqqutigalugu illuummik piginnittutut INI attaveqarfigisartussaavat.


Taarsigassarsiat tamakkerlugit utertillugit akilernissaasa tungaannut, Namminersorlutik Oqartussanut arlalinnik pisussaaffeqartoqartarpoq:

  • Illu pigisatut nalilittut qularnaveeqqutigisinnaanngilat
  • Illu isatersinnaanngilat
  • Illu imaluunniit illup ilaa INI-mit akuersissummik pissarsisimanngikkuit attartortissinnaanngilat. Tamatuma saniatigut attartortitsineq taamaallaat pisinnaavoq piumasaqaatit INI-mit akuerineqartut aallaavigalugit
  • Illu imaluunniit illup ilaa allanngortissinnaanngilat INI-mit akuerineqarsimanngikkuit. Tamatuma saniatigut allannguinerit taamaallaat pisinnaapput piumasaqaatit INI-mit akuerisat aallaavigalugit
  • Illu pisisumut Namminersorlutik Oqartussat akuerisimasaannut taamaallaat tunniussinnaavat. Tunniussinermi piumasaqaatit taamatuttaaq Namminersorlutik Oqartussanit akuerineqarsimassapput
  • Illup Namminersorlutik Oqartussanut utertinnissaanut pisinnaatitaavutit


Taarsigassarsineq eqquutsinneqanngitsutut isigineqassaaq imaattoqarpat:

  • Taarsigassarsiat erniaat akilersuinerillu piffissaq eqqorlugu akilertanngikkukkit
  • Illu illersorneqarsinnaasumik aserfallatsaalinngikkukku
  • Illu ikuallattoornissamut aamma anorersuup ajoqusiinissaanut sillimmasersimanngikkukku
  • Illu isaterukku
  • Illup ilaani init inuussutissarsiornermut atugassatut ilusilersorukkit imaluunniit illumit inuussutissarsiornermik ingerlatsiguit, tamatumani INI akuersiteqqaarnagu
  • Namminersorlutik Oqartussat akuersissuteqarnerat avaqqullugu illumit nuukkuit imaluunniit illu attartortikkukku
  • Illumik pigisaqarnerit qularnaveeqqutigalugu taarsigassarsiguit
  • Namminersorlutik Oqartussat illuit misissornissaannut itigartikkukkit
  • Namminersorlutik Oqartussanit pitsanngorsaanissamut taarsigassarsisimallutit alliliineq imaluunniit pitsanngorsaaneq ingerlatinngikkukku
  • Sanaartornerup ingerlanneqarnissaa naammassinissaalu pisariaqanngitsumik kinguarsarukku
  • Illu aalajangersimasumik najugaqarfittut atunngikkukku

Taarsigassarsiavit akilersornerat eqquutsinngikkukku, akiitsut sinneri tamakkiisut aamma kinguaattoorutit ataatsikkut akilernissaat peratarsinnaavoq. Kingullertut illumit anisitaanissat peratarsinnaavoq.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl