Inissialiornermut tapiissuteqartarneq (Boligstøttehuse) aqqutigalugu illuutit pitsanngorsaaviginissaannut taarsigassarsiat – Qinnuteqarneq

Inissialiornermut tapiissuteqartarneq (Boligstøttehuse) aqqutigalugu illuutit pitsanngorsaaviginissaannut taarsigassarsiat – Qinnuteqarneq 

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq illup sananissaanut inissialiornermut tapiissuteqartarnermik aaqqissuussineq malillugu Nunatta karsianiit aningaasanik taarsigassarsisimavoq. Taamaammat taarsigassarsiat tamakkerlugit utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik, inissialiornermut tapiissuteqartarneq aqqutigalugu illuutilittut INI saaffigisartussaavat.

Inissialiornermut tapiissuteqartarneq aqqutigalugu imaluunniit nammineerlutit illuliornermi illuutit alliniarukku pitsanngorsarumalluguluunniit, aningaasartuutit matussusernissaannut taarsigassarsisinneqarnissaq qinnuteqaatigisinnaavat. Assersuutigalugu makkununnga qinnutigineqarsinnaapput:

  • Kiassaateqarfik
  • Ukioq naallugu imermut pilersuinermut attavilersinneq
  • Kuuffissuarmut attavilersinneq
  • Uffarfilersinneq
  • Oqorsaaneq

Nalinginnaasumik aserfallatsaaliinermik suliaqarnermut aamma atortorissaarutinut inuulluataarutinik taaneqarsinnaasunut aamma nalinginnaasumik aserfallatsaaliinermut pissarsinissamut taarsigassarsisinnaanngilatit, assersuutigalugu makkununnga:

  • Qalipaanermut
  • Natermik taarsiinermut
  • Illup iluaniittunik matunik taarsiinernut
  • Atortunut innaallagissamoortunut, assersuutigalugu uffarfinnut qalaliasunut (SPA-nut) assigisaannullu
  • Aneerasaartarfimmik sananermut


Piumasaqaatit

Illuit allilernissaanut pitsanngorsarnissaanullu taamaallaat taarsigassarsisinnaavutit, siunertamut aningaasanut inatsimmi illikartitsisoqarsimappat.

Pitsanngorsaanermut taarsigassarsisinnaajumagaanni:

  • Inoqutigiit isertitaat ukiumut 180.000 kr.-t sinnersimassavaat. Siunissami qaninnermi isertitariumaakkassi 180.000 kr.-t sinnissagaat qularnaateqanngippat aamma taarsigassarsisinnaavusi. Taassuma saniatigut isertitasi ima annertutigissapput, taarsigassarsiat akilersorsinnaasariaqarlugit
  • Inissialiornermut tapiissuteqartarneq aqqutigalugu taarsigassarsiannut akilersuutinnut kinguaattooruteqassanngilatit
  • Ineqanermut atatillugu aningaasartuutinut allanut, soorlu innaallagissamut, imermut, kiassarnermut aamma eqqagassalerinermut akiligassaqassanngilatit
  • Illu anorersuarneranut aamma ikuallattoornermut sillimmaserneqarsimassaaq

Taarsigassarsiat 25.000 kr.-nit ikinnerussanngillat.

Qaqortumi, Nuummi, Sisimiuni Ilulissaniluunniit najugaqaruit taarsigassarsisinnaanngilatit. Taamaallaat taarsigassarsinissaq pisariaqavippat, assersuutigalugu inissialiornermut tapiissuteqartarneq aqqutigalugu taarsigassarsiannut qularnaveeqqusiinissaq eqqarsaatigalugu, taarsigassarsisinneqarnissat qinnuteqaatigisinnaavat.


Qinnuteqaat

Inissialiornermut tapiissuteqartarneq aqqutigalugu illuutivit imaluunniit nammineq illuliavit allilernissaanut pitsanngorsarnissaanulluunniit taarsigassarsisinneqarnissat soqutigigukku, qinnuteqarnermi immersugassaq immersussavat. Taanna quppernermi uani immersugassat akornanni nassaarisinnaavat. Immersugassami allassimasarpoq, qinnuteqaammut uppernarsaatit suut ilanngutissaneritit makku saniatigut:

  • Isertitat pillugit paasissutissat
  • Suliarinnittussamit sanasumit neqeroorutit illit akuerisimasatit

Qinnuteqaat ilanngussanik tamanik ilaqartoq najukkanni INI-p allaffeqarfianut tunniussinnaavat nassiulluguluunniit. Qinnuteqaatip suliarinissaanut ikiortikkumallutit INI-p allaffeqarfia aamma saaffigisinnaavat.


Akuersissut

Qinnuteqaatit akuerineqarpat INI-miit nalunaarfigineqassaatit. Illit suliarinnittussallu akunnissinni suliassap suliarinissaanut isumaqatigiissutissarsi INI-p suliarissavaa, marluullusilu atsiussavarsi INI-mullu utertillugu nassiullugu.

Illit nammineq akisussaaffigaatit:

  • Sulinermik nakkutilliinissaq. Illit sinnerlutit sulinermik nakkutilliisussaq inuk alla aamma toqqarsinnaavat. Nakkutilliinermut tassunga atatillugu aningaasartuutit, aningaasanit qinnuteqaatigineqartunut ilanngunneqarsinnaapput
  • Kommunimut sanaartornissamut akuersissummik aamma nunaminertamik atugassinneqarnissamik qinnuteqarneq
  • Sulineq naammassippat INI-mut nalunaaruteqarneq

Sanasup suliarinnittussap suliaq naammassiguniuk akiligassamik sanassaaq, taannalu akuerigukku atsiorlugulu INI-mut nassiutissavat. Matuma kingorna illit sinnerlutit akiligassaq INI-p akilissavaa taamatullu sananermi pitsanngorsaanermilu aningaasartuutit taarsigassarsiatut taarsigassarsiannut pioreersunut ilanngutissalugit.

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl