Inissialiornermut tapiissuteqartarneq (Boligstøttehuse) aqqutigalugu illuutinut taarsigassarsinermi atugassarititaasut – Peqataajunnaarneq aamma peqataalerneq

Inissialiornermut tapiissuteqartarneq (Boligstøttehuse) aqqutigalugu illuutinut taarsigassarsinermi atugassarititaasut – Peqataajunnaarneq aamma peqataalerneq 

Inissialiornermut tapiissuteqartarneq aqqutigalugu illuut tassaavoq, illu inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq, illumik piginnittoq illup sananissaanut inissialiornermut tapiissuteqartarnermik aaqqissuussineq malillugu Nunatta karsianiit aningaasanik taarsigassarsisimavoq. Taamaammat taarsigassarsiat tamakkerlugit utertillugit akilernissaasa tungaannut Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuutilittut INI saaffigisartussaavat.


Taarsigassarsinermi atugassarititaasunut peqataajunnaarneq
Inissialiornermut tapiissuteqartarneq aqqutigalugu illuummik tigusinermi, taarsigassarsinermut uppernarsaat aamma illumik piginnittuunermut uppernarsaat atsiorneqartarput, illumik piginnittutut uppernarsarniarlugu. Tassa imaappoq illit nuliallu/uillu imaluunniit inooqatigisallu, illussinnut taarsigassarsinermi uppernarsaat aamma taarsigassarsianut qularnaveeqqut atsiorsimagussiuk, illu tamassi piginnittuuffigaarsi.

Inuunissi ingerlanerani piffissap ilaani inooqatigiikkunnaarniarlusi aalajangissagussi, arlarsi ataaseq taarsigassarsinermi atugassarititaasunut peqataajunnaarsinnaavoq taamaalillunilu illumik piginneqataajunnaarluni. Matuma kingorna aapparisimasaq kisimi illumik piginnittutut inissisimalissaaq aammalu taarsigassarsianut, akiitsunut pisussaaffinnullu allanut pituttussalluni. Taamaattorli eqqumaffigineqartariaqarpoq, taarsigassarsinermi atugassarititaasunut akisussaajunnaartoq, akisussaajunnaarnissami tungaanut akiligassanut suli akisussaammat.


Taarsigassarsinermi atugassarititaasunut peqataalerneq
Inissialiornermi tapiissuteqartarneq aqqutigalugu illuummik kisimiillutit pigisaqaruit, katissimasat, inooqatit imaluunniit kingornussisussat illumik piginneqataalersinnaavoq. Piginneqatigiilerusukkussi aapparisat taarsigassarsinermi atugassarititaasunut peqataalernissaminik qinnuteqarsinnaavoq taamaalillunilu taarsigassarsianut, akiitsunut pisussaaffinnullu allanut peqatigalugit pituttorluni.

Taarsigassarsinermi atugassarititaasunut peqataalerniaraanni, taamaasillunilu inissialiornermut tapiissuteqartarneq aqqutigalugu illuummik piginneqataalerluni:

  • Inissialiornermut tapiissuteqartarneq aqqutigalugu illuummik allamik pisortat taarsigassarsiissutaat atorlugit pigisaqariissanngilatit
  • 18-inik ukioqalereersimassaatit
  • Siunissami illumi aalajangersimasumik najugaqartutut nalunaarsimassaatit, matumani inissialiornermut tapiissuteqartarneq aqqutigalugu illuummi najugaqarnissaq pisussaaffiummat

Qinnuteqarneq
Taarsigassarsinermi atugassarititaasunut atatillugu peqataalerusukkuit peqataajunnaarniarlutilluunniit, najukkanni INI-p allaffeqarfianut saaffiginnissaatit. Tassani paasissutissat annertunerusut pissarsiarisinnaavatit aamma qinnuteqaatip suliarinissaanut ikiorneqarsinnaavutit.

Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl